Read Ngaju ESEKHIEL 30 Bible Online

ESEKHIEL 30 - Ngaju bible

ESEKHIEL 30

¹TUHAN hakotak tinai, Koae,

²“O anak olon, keleh manujum tuntang sanan akan bangsa Misir taloh je Aku toh TUHAN Ije Pangkahai mansanan akan ewen. Keleh mangkariak tuntang manatum kalotoh: Hakayah! Andau TUHAN jari tokep! Ie akan bajeleng mawi. Andau te kaput tuntang are baunandau, katika kare bangsa manarima hukuman.

⁴Calaka hai akan mawi Sudan. Intu Misir akan aton parang. Kare hantu akan hakalampah; hapus tanah irampok tuntang imparusak sampai jadi karak-karake.

⁵Hong parang te akan matei kea kare tantara je inyewa bara Sudan, Lidia, Libia, Arab, Kub, tuntang bara bangsa ayung-Ku kabuat.”

⁶TUHAN Ije Pangkahai hamauh, “Bara Migdol intu utara sampai akan Aswan intu salatan, uras bangsa je pakat dengan Misir akan matei hong parang. Tuntang tantara Misir je balecak te akan impakalah. Aku toh TUHAN Ije Pangkahai jari hakotak.

⁷Tanah te akan jadi tanah je benyem tunis marak kare tanah je benyem je beken. Tuntang kare lewue akan jadi baderep karak-karake.

⁸Amon Aku manusul Misir tuntang mampatei uras oloh je pakat dengae, palus ewen katawan je Aku toh TUHAN.

⁹Amon andau te dumah, tuntang Misir jari rusak, Aku akan mangirim kare sarohan dengan kare kapal hapa manarewen kare oloh Sudan je laya te, palus ewen akan mikeh. Toto, andau te akan dumah!”

¹⁰TUHAN Ije Pangkahai hamauh, “Aku akan mahapan Raja Nabukadnesar bara Babel uka mamparusak hapus panatau Misir.

¹¹Nabukadnesar dengan tantarae je dia kasene asi akan dumah tuntang marusak lewu te. Ewen akan manyarang Misir dengan padang, tuntang kare hantu akan hakalampah intu lewu te.

¹²Aku akan mampateah batang danum Nil tuntang manyarah hapus Misir akan kare oloh papa. Kare oloh bangsa beken akan inyoho-Ku mampalomos hapus lewu te. Aku, TUHAN, jari hakotak.”

¹³TUHAN Ije Pangkahai hakotak, “Aku akan mamparusak kare hampatong dewa intu Mempis. Jaton tinai kare raja intu Misir. Hapus oloh lewue akan iawi-Ku mikeh.

¹⁴Hapus Misir salatan iawi-Ku tunis benyem tuntang lewu Soan intu utara akan inusul-Ku. Tebe batang lewu te akan ihukum-Ku,

¹⁵tuntang panataue akan ipalomos-Ku. Aku akan manusoh kasangit-Ku akan Pelusium, lewu hadinding batu ain Misir,

¹⁶tuntang lewu te akan paham kapehe. Toto Aku akan manusul Misir. Kare dinding lewu Tebe akan baderep tuntang lewu te akan ilambun danum soho.[66]

¹⁷Kare oloh tabela lewu Heliopolis tuntang Bubastis akan matei hong parang, tuntang kare oloh bawi akan inawan.

¹⁸Katika Aku mampahapus kuasan Misir tuntang manduan kuasae je paham ingilake, Tahpanhes akan inyangkulep kakaput tuntang kare oloh bawie akan inawan.

¹⁹Tumon te Aku akan mahukum Misir, palus ewen katawan je Aku toh TUHAN.”

²⁰Hong tanggal uju bulan ije intu nyelo kasawalas manampara bara ikei intu eka tawanan, TUHAN hamauh dengangku,

²¹“O anak olon, Aku jari mamelek lengen raja Misir, tuntang jaton ije oloh je mambabat lengee atawa murute mangat keleh tuntang mangat olih mimbing padang tinai.

²²Aku toh TUHAN Ije Pangkahai hamauh: Aku toh musoh raja Misir, tuntang kadadue lengee akan imelek-Ku, aloh je magon abas atawa je jari bapelek. Palus padang te akan manjato bara lengee.

²³Aku akan manaburan oloh Misir akan hapus kalunen.

²⁴Palus akan mampaabas lengen raja Babel, tuntang ingkes-Ku padang ayung-Ku intu lengee. Tapi lengen raja Misir akan imelek awi-Ku sampai ie akan manarahing tuntang matei intu taharep raja Babel, musohe.

²⁵Toto, raja Misir akan impalemo awi-Ku, tapi raja Babel akan impaabas awi-Ku. Amon Aku manenga padang-Ku akae, tuntang ie mantajoke manintu Misir, ewen akan katawan je Aku toh TUHAN.

²⁶Aku akan manaburan kare oloh Misir akan hapus kalunen. Maka ewen katawan je Aku toh TUHAN.”