Read Ngaju ESEKHIEL 31 Bible Online

ESEKHIEL 31 - Ngaju bible

ESEKHIEL 31

¹Hong tanggal ije bulan telo intu nyelo kasawalas manampara bara ikei intu eka tawanan, TUHAN hamauh dengangku,

²“O anak olon, sanan peteh-Ku toh akan raja Misir tuntang hapus bangsae: Toto tamam kahaim! Jaton ije je tau mananding ikau!

³Ikau kilau kayu alau Libanon je dehen kontep edan je bajewong tuntang bungas. Batange bujur, lawie sampai akan baunandau.

⁴Ie belom awi danume sukup. Sungei hong penda petak manenga taloh kinae, manata kare uhate tuntang mambisa kare batang je beken.

⁵Awi danume dia puji tapas, ie tumbo bajewong, edae hai tuntang panjang. Bara kare batang kayu intu kare parak kayu, ie ih je paling gantong panju-panjung.

⁶Sepsimpan burong manyarangan intu patinge. Meto baliar manak intu penda edae. Uras bangsa je hai intu hapus kalunen mondok bakalindong intu pendae.

⁷Batang te bahalap akan tampayah; batange bujur, edae panjang. Uhate manembus kejau akan penda manyampai tahasak danum intu penda petak.

⁸ Kare batang kayu alau intu Eden, kabon ain Hatalla dia tau inyama dengae. Jaton ije kayu alau je tau manandinge, jaton ije batang kayu je kalote kapanjang edae. Toto intu kabon ain Hatalla te jaton ije batang kayu je sama kahalape dengae.

⁹Aku toh je mawi ie bakena dengan kare edae je panjang tuntang dawee je labat. Uras batang kayu intu kabon ain Hatalla bahiri mangabeho ie.

¹⁰Awi te, Aku, TUHAN Ije Pangkahai, mansanan akam taloh je akan manjadi dengan batang kayu je lawie sampai baunandau te. Awi sasar gantong, ie sasar bajoho.

¹¹Palus Aku akan mangabele ie tuntang handak manyarah ie akan oloh panguasa je marentah bara bangsa beken je akan mawi mantakan ie sama ampie tumon kapapae.

¹²Tantara bangsa beken je dia kasene asi akan maneweng ie palus manaluae. Kare patinge je jari bapelek akan baduroh intu kakare bukit tuntang janah intu tanah te. Uras bangsa je melai intu pendae akan haguet malihi ie.

¹³Kare burong akan dumah tuntang tingkep intu batange je jari balihang te, tuntang kare meto baliar akan mangijak-manandik kare edae.

¹⁴Uras taloh te manjadi uka nampara katika toh, jaton tinai batang kayu je belom tumon te kagantonge; jaton tinai lawin kayu je sampai baun andau aloh ie mandino danum je are sampai mamurai. Uras oloh akan matei kilau olon je hong kalunen, tuntang hinje dengan kare oloh je mohon akan huang kubur”

¹⁵Kalotoh koan TUHAN Ije Pangkahai, “Amon batang kayu te mohon akan huang kubur, Aku manyoho danum intu penda petak malelep ie kilau tanda kapehen atei. Aku akan manahan dehes sungei tuntang manabat kare anak sungei. Awi batang kayu te jari matei, Aku akan mawi kakaput akan kare bukit Libanon tuntang mampalayu kare batang kayu parak kayu.

¹⁶Metoh batang kayu te impamohong-Ku akan lewun oloh matei, auhe manjato manarewen kare bangsa. Uras batang kayu intu Eden tuntang kare batang kayu je buah intih intu Libanon je mandino danum malabien karee, tuntang je jari mohon akan petak je paling penda akan mangilak kanjato batang kayu te.

¹⁷Ewen akan mampahayake akan huang kubur tuntang hinje dengan ewen je jari manjato labih helo. Tinai uras oloh je bihin mondok intu penda batang kayu te akan inaburan marak kare bangsa.[67]

¹⁸Batang kayu te manampengan raja Misir tuntang bangsae. Dia aton batang kayu intu Eden je kalote kagantonge tuntang kahaie. Tapi toh, kilau kare batang kayu intu Eden kea, batang kayu te akan mohon akan lewun oloh matei tuntang hinje dengan ewen je dia mangasene Hatalla tuntang dengan ewen je matei huang parang. Aku, TUHAN Ije Pangkahai jari hakotak.”