Read Ngaju ESEKHIEL 32 Bible Online

ESEKHIEL 32 - Ngaju bible

ESEKHIEL 32

¹Hong tanggal ije bulan duewalas intu nyelo kadue walas metoh ikei jari intu eka tawanan, TUHAN hamauh dengangku,

²“O anak olon, tingak toto-toto raja Misir. Sanan peteh-Ku toh akae, ‘Ikau mampatamam arepm kilau singa tabela marak kare bangsa, tapi ikau labih sama kilau bajai je hakacapok manyi arepe intu danum. Paim mampakeroh tuntang mamapa kakare batang danum.

³Metoh kare bangsa hapumpong, Aku akan manyingkap ikau mahapan jala aing-Ku tuntang manalua kare bangsa te mihir ikau akan hunjun petak.

⁴Aku akan marapitan ikau akan petak tuntang uras kare burong hayak meto bara hapus kalunen inyoho-Ku kuman bitim.

⁵Palus kare bukit tuntang kare janah akan ingontep-Ku hapan hantum je maram te.

⁶Daham akan inusoh-Ku sampai mambisa kare bukit tuntang mangontep kare sungei.

⁷ Metoh Aku mampatei ikau, langit akan iatep-Ku tuntang kare bintang akan ingaput-Ku. Matanandau akan inyahokang-Ku intu likut baunandau tuntang bulan dia akan mampalua kalawae.

⁸Toto, uras kalawa intu langit akan imbelep-Ku tuntang kalunen iawi-Ku kaput pijem. Aku, TUHAN Ije Pangkahai jari hakotak.

⁹Metoh Aku mansanan kabar tahiu karusakm intu kare lewu je hindai ikau kasenee, are bangsa akan jadi gaer.

¹⁰Toto, Aku akan mariwis padang tuntang mampakalah ikau. Kare raja tuntang kare bangsa akan mite gawing-Ku te dengam. Katika te ewen akan hagenjeh mikeh tuntang haketer awi mikeh matei.’ ”

¹¹TUHAN Ije Pangkahai hamauh dengan raja Misir, “Padang raja Babel akan intajok akam.

¹²Kare tantara bara kare bangsa je tulas akan inyoho-Ku manyilak padang ain ewen tuntang manyambalih uras kare rayat ayum. Rayat ayum tuntang kakare taloh je impatamam awim akan lepah rusak rambai.

¹³Meto ayum akan inyambalih-Ku intu saran kare sungei eka ewen mihop. Aloh olon atawa meto dia akan mangeroh sungei te tinai.

¹⁴Palus kare sungei intu tanahm iawi-Ku jadi katining tuntang iawi-Ku mahasor rangka-rangkah. Aku, TUHAN Ije Pangkahai jari hakotak.

¹⁵Amon Misir iawi-Ku jadi padang pasir je tunis benyem, hayak imbinasa-Ku uras taloh je melai intu hete ewen akan katawan je Aku toh TUHAN.

¹⁶Pampingat je karas toh akan jadi auh nyanyi hapa manatum. Kare oloh bawi bara kare bangsa beken akan manyanyi jete kilau tanda kapehen atei akan Misir tuntang hapus rayate. Aku, TUHAN Ije Pangkahai jari hakotak.”

¹⁷Hong tanggal limewalas bulan ije[68] intu nyelo kaduewalas nampara bara ikei hong eka tawanan, TUHAN hamauh tinai dengang-Ku,

¹⁸“O anak olon, keleh manatum akan rayat Misir. Ngirim ewen akan huang kubur haya-hayak dengan kare tanah je abas je beken.

¹⁹Sanan akan ewen, ‘Inyangkam ikau ih je paling bahalap? Ikau akan mohon akan lewun oloh matei, tuntang ingujoh marak kare oloh je dia kasene Hatalla.’

²⁰Bangsa Misir akan matei hayak dengan ewen je matei huang parang. Ije padang jari tatap akan mampatei ewen samandiai.

²¹Kare pahlawan je menteng tuntang kare oloh je parang omba mandohop Misir, manambang dengan kahanjak pandumah oloh Misir akan lewun oloh matei. Ewen basasurak kalotoh, ‘Kare oloh je dia kasene Hatalla te jari matei huang parang. Toh ewen dumah akan hetoh tuntang menter intu hetoh!’

²²Asur menter intu hete, ingaliling awi kubur kare tantara ayue. Ewen uras jari matei huang parang. Kubur ewen aton intu hila je paling handalem intu lewun oloh matei. Metoh belom ewen mawi kikeh intu kalunen.

²⁴Elam aton intu kanih dengan kubur tantara ayue hakalilinge. Marak dia basunat ewen uras matei huang parang, palus mohon akan eka lewun oloh matei. Metoh belom ewen mawi kikeh, tapi toh ewen jari matei tuntang impahawen hayak dengan kare oloh je jari matei huang parang.

²⁶Mesekh tuntang Tubal aton intu hete, ingaliling awi kubur kare tantara ain ewen. Marak dia basunat, ewen uras matei huang parang. Metoh belom ewen mawi kikeh hong kalunen.

²⁷Ewen dia ingubur dengan hormat sama kilau pahlawan intu jaman horan[69] je mohon akan eka lewun oloh matei mahapan pakakas parang je sukup. Kare pahlawan te ingubur, padang ina intu penda takoloke tuntang talawang[70] intu hunjun usoke. Metoh magon belom, kare pahlawan toto menteng sampai uras oloh mikeh.

²⁸Tumon te oloh Misir akan ingubur tuntang ingujoh marak kare oloh je dia kasene Hatalla tuntang matei intu parang.

²⁹Edom aton intu kanih dengan uras kare raja tuntang pamimpie. Bihin ewen te kare tantara je abas, tapi toh ewen menter intu eka lewun oloh matei hayak dengan kare oloh matei je beken je dia kasene Hatalla.

³⁰Uras pangeran bara utara aton intu hete, kalote kea kare oloh Sidon. Bihin kuasan ewen mawi kikeh, tapi toh ewen impahawen tuntang marak dia basunat ewen mohon akan eka lewun oloh matei haya-hayak dengan kare oloh je matei huang parang. Intu kanih ewen menter tuntang mananggong kajilek haya-hayak dengan kare oloh je mohon akan lewun oloh matei.

³¹Amon raja Misir dengan tantarae sampai akan eka lewun oloh matei tuntang mite uras oloh te je jari matei huang parang, ewen akan mangkeme iampong. Aku toh TUHAN Ije Pangkahai jari hakotak.

³²Aku toh je mawi buku raja Misir mampalembut kikeh akan kare oloh je belom, tapi ie tuntang tantarae akan matei tuntang ingujoh hayak dengan kare oloh je dia kasene Hatalla tuntang matei hong parang. Aku, TUHAN Ije Pangkahai jari hakotak.”