Read Ngaju ESEKHIEL 33 Bible Online

ESEKHIEL 33 - Ngaju bible

ESEKHIEL 33

¹TUHAN hakotak tinai dengang-Ku, Koae,

²“O anak olon, suman akan bangsa ayum, amon Aku mawi parang intu ije tanah, jetoh je akan manjadi. Oloh je melai tanah te akan mintih marak ewen ije biti panjaga.

³Amon panjaga te mite musoh dumah, ie mampahiau tanda bahaya uka uras oloh jaga-jaga.

⁴Eweh je mahining tanda bahaya te tapi dia padulie, tuntang musoh dumah balalu mampatei ie, ie te matei awi kasalae kabuat. Jaka ih ie paduli tanda bahaya te, batantu ie salamat.

⁶Tapi jaka panjaga te mite musoh mampatei kare oloh badosa te, tuntang dia mampahiau tanda bahaya, balalu musoh mampatei kare oloh badosa te, tanggung jawab tagal pampatei ewen akan ilaku awi-Ku bara ie.

⁷O anak olon, ikau iangkat-Ku kilau panjaga bangsa Israel. Keleh manyampai akan ewen pampingat toh:

⁸Amon Aku mansanan je ije biti oloh papa akan matei, tapi ikau dia mampingat ie uka mobah gawie sampai ie salamat, palus ie matei magon kilau ije biti oloh badosa. Tapi tanggung jawab tagal pampateie akan ilaku-Ku bara ikau.

⁹Amon ikau mampingat oloh papa te tapi ie dia maku terai malalus kapapa, ie akan matei kilau oloh badosa, tapi ikau kabuat akan salamat.”

¹⁰TUHAN hamauh dengang-Ku, “O anak olon, nangkaluli akan oloh Israel auh ewen toh, ‘Ikei kapehe awi imbehat dosa tuntang kapapan ikei. Kilen ampie ikei tau belom?’

¹¹Sanan akan ewen iete tagal Aku, Hatalla je belom, TUHAN Ije Pangkahai, Aku dia sanang amon oloh papa matei; kabalikae Aku nahuang ie malihi kare dosae mangat ie tetep belom. O bangsa Israel, terai malalus kapapa! Mbuhen keton nahuang matei?

¹²O anak olon, sanan akan oloh Israel, amon oloh je bahalap mawi dosa, maka kahalape je bihin te dia tau mandohop ie. Amon oloh papa terai mawi dosa, ie dia akan ihukum. Tinai amon oloh bahalap mawi dosa, ie dia akan inyalamat.

¹³Olih jadi Aku jari hajanji akan manyalamat oloh je bahalap, tapi amon ie nampara mawi dosa balalu maharap je ie akan inyalamat awi kahalape je bihin te, ie sala. Aku dia akan mingat tinai kahalap je puji iawie bihin, tuntang ie matei awi kare dosae.

¹⁴Olih jadi kea Aku jari mampingat oloh papa je ie akan matei. Tapi amon ie terai mawi dosa tuntang nampara malalus taloh je bahalap tuntang bujur, paribasa ie malian ramon sanda ain oloh atawa ramo je jari inakaue, balalu manumon kare atoran je mimbit akan pambelom, maka ie dia akan matei.

¹⁶Aku dia akan mingat tinai kare dosa je jari ilaluse, tuntang ie akan belom awi malalus taloh je buah tuntang bahalap.

¹⁷Tapi bangsa te hamauh je gawing-Ku te dia adil! Padahal gawin ewen te je dia adil.

¹⁸Sinde tinai insanang-Ku amon oloh je bahalap nampara malalus taloh je papa, ie akan matei tagal jete.

¹⁹Amon oloh je papa terai mawi dosa, tuntang nampara malalus taloh je bahalap tuntang buah, maka ie akan belom tagal jete.

²⁰Aloh kalote bangsa Israel hamauh je gawing-Ku te dia adil. Toto, Aku akan mahakim ewen mije-mije manumon gawie.”

²¹ Hong tanggal lime bulan sapuluh, intu nyelo kaduewalas nampara bara ikei melai eka tawanan, ije biti oloh je olih salamat bara Yerusalem dumah tuntang mansanan akang-Ku iete lewu te jari manjato.

²²Hong alem je helo bara pandumahe, aku jari mangkeme kuasan TUHAN. Palus metoh oloh te manalih aku, aku jari tau hakotak tuntang dia bisu tinai.

²³TUHAN hamauh dengangku,

²⁴“O anak olon, kare oloh je melai intu duroh derep kare lewu intu tanah Israel te hamauh, ‘Abraham mandino hapus tanah toh, padahal ie baya kabuat bewei. Itah toh are biti, jadi tanah toh ayun itah.’ ”

²⁵Awi TUHAN Ije Pangkahai manyoho aku manyampai peteh toh akan ewen, “Keton kuman isin meto je magon aton dahae; Keton manyembah hampatong dewa tuntang mampatei. Bahanyi toto keton mangaku tanah toh kilau ayun keton.

²⁶Keton mampaandal padang keton. Gawin keton papa. Keton uras habandong. En magon bahanyi keton mangaku tanah toh kilau ayun keton?

²⁷Tagal Aku, Hatalla je belom, TUHAN Ije Pangkahai, kare oloh je melai kare lewu je tisa duroh derepe bewei akan buah patei. Ewen je melai intu kare janah akan kinan meto basiak. Ewen je manyahokan intu kare bukit tuntang kare goha akan matei awi panyakit.

²⁸Lewu te akan iawi-Ku jadi padang pasir je tunis benyem. Kuasa je impatamam ewen akan hapus. Kare bukit intu Israel akan benyem tunis sampai jaton oloh bahanyi mahalaue.

²⁹Katika Aku mahukum bangsa te awi kare dosan ewen tuntang mawi lewu te benyem suni, palus ewen katawan je Aku toh TUHAN.”

³⁰TUHAN hamauh, “O anak olon, ikau jadi tahiun oloh bangsa ayum katika ewen hasondau sama arep tokep kare dinding lewu atawa intu baun kare bauntonggang huma. Ewen hatehau, ‘Ayo, itah mahining narai peteh TUHAN andau toh.’

³¹Ewen dumah are biti tuntang kilau ungkup-Ku ewen mondok mahining kare auhm, tapi taloh je irentahm dia ewem manumoe. Totok ewen manyewut kare auh sinta, tapi atei ewen baya manggau kaontong.

³²Ikau ianggap kilau ije biti tukang manyanyi lagu sinta je mangat auhe tuntang apik mampahiau kacapi. Puna ewen mahining kare auhm tapi dia manumoe.

³³Uras taloh je insanan te akan manjadi, tuntang amon katika te sampai, ewen akan katawan ije biti nabi puji aton intu marak ewen.”