Read Ngaju ESEKHIEL 34 Bible Online

ESEKHIEL 34 - Ngaju bible

ESEKHIEL 34

¹TUHAN hamauh dengangku,

²“O anak olon, tingak kare rajan Israel, tuntang sanan taloh je Aku, TUHAN Ije Pangkahai hamauh dengan ewen, ‘Calaka keton, o kare sakatik Israel. Keton baya manirok taloh je akan arep keton kabuat, dia taloh je akan kare tabirin keton.

³Susue ihop keton, bulue iawi keton jadi pakaian, tuntang tabiri je paling baseput inyambalih tuntang kinan keton.

⁴Kare tabiri je balemo dia keton mahagae, je haban dia keton manatambae, je bahimang dia keton mametenge, je layang tuntang nihau dia keton manggaue tuntang mimbite haluli. Keton manyangit tulas haream mawi tabirin keton.

⁵ Awi jaton sakatik, kare tabiri te pisah darai tuntang kinan meto basiak.

⁶Palus kare tabiring-Ku malayap intu kare lungkoh je gantong tuntang intu kare bukit. Ewen kasaburan akan hapus kalunen, jaton ije oloh je manantuani atawa manggau ewen.

⁷O kare sakatik, hining auh bara Aku, TUHAN Ije Pangkahai hakotak dengan keton:

⁸Tagal Aku, Hatalla je belom, seneh! Kare tabiring-Ku jari inangkarap tuntang kinan meto basiak, awi jaton ije oloh je manyakatik ewen. Keton kare sakatik aing-Ku dia paduli dengan kare tabiri te. Keton baya manirok arep keton kabuat, dia akan kare tabirin keton.

⁹Awi te, hining o kare sakatik,

¹⁰Aku, TUHAN Ije Pangkahai hamauh dengan keton je Aku toh musoh keton. Kare tabiring-Ku toh akan induang-Ku haluli bara keton tuntang Aku dia tinai manyarah akan keton uka mahagae; Aku dia akan manyoho keton manirok taloh je baya akan arep keton bewei. Aku akan manyalamat tabiring-Ku bara keton mangat ewen dia jadi panginan keton.’ ”

¹¹TUHAN Ije Pangkahai hamauh, “Aku kabuat akan manggau kare tabiring-Ku tuntang mahaga ewen,

¹²sama kilau ije biti sakatik manggau tuntang mamumpong kare tabirie je pisah darai palus mahaga ewen. Aku akan mimbit ewen buli bara kare eka ewen kasaburan hong andau je kaput tuntang basial te.

¹³Aku akan mampalua ewen bara marak kare bangsa tuntang kare tanah bangsa beken palus imumpong-Ku tuntang imbit-Ku akan tanah ayue kabuat. Aku akan manyakatik ewen intu kare bukit tuntang intu kare janah Israel tuntang ingagalang-Ku ewen akan kare padang oru je mangat.

¹⁴Toto, Aku akan manatap akan ewen kare padang oru je bajewong intu kare bukit tuntang intu kare janah hong tanah Israel. Intu hete ewen akan malayan kahekae tuntang kuman oru dengan kamangate.

¹⁵Aku kabuat akan jadi sakatik kare tabiring-Ku tuntang manyadia eka malayan kaheka akan ewen; Aku, TUHAN Ije Pangkahai jari hakotak.

¹⁶Je nihau akan inggau-Ku, je layang akan imbit-Ku buli, je bahimang akan imbabat-Ku, je haban akan inatamba-Ku; tapi je baseput tuntang je abas akan imbinasa awi-Ku, awi Aku sakatik je malalus taloh je bahalap.

¹⁷Hining, o kare tabiring-Ku! Aku, TUHAN Ije Pangkahai hakotak dengan keton tahiu Aku je akan mahakim keton mije-mije tuntang mamisah taloh je bahalap bara taloh je papa, kare tabiri bara kare kambing.

¹⁸Bara marak keton aton je dia ombet belaie baya mampalepah oru je paling bahalap, tapi kea mangijak-manandik kare oru je dia ewen kumae! Ewen mihop danum je katining palus mangeroh danum je dia ewen mihope!

¹⁹Kare tabiring-Ku je beken balalu kuman oru je jari ingijak-inandik tuntang mihop danum je jari ingeroh.

²⁰Tagal te, Aku, TUHAN Ije Pangkahai mansanan akan keton, o kare tabiri je baseput, Aku akan dumah jadi hakim marak tabiri je abas tuntang tabiri je balemo.

²¹Keton manggian hayak manandok tabiri je haban sampai ewen iharak bara kawan tabiri.

²²Tapi Aku kabuat akan manyalamat kare tabiring-Ku, mangat ewen dia tinai iawi hapan katulas. Aku akan mahakim kare tabiring-Ku mije-mije tuntang mamisah je bahalap bara je papa.

²³ Aku akan mangkat ije biti raja je kilau rewar-Ku Dawid, je akan manjadi baya ije bewei sakatik akan ewen, tuntang ie mahaga ewen.

²⁴ Aku, TUHAN akan jadi Hatallan ewen, tuntang raja je sama kilau rewar-Ku Dawid te akan jadi oloh panguasa je marentah mahunjun ewen, Aku toh TUHAN jari hakotak.

²⁵Aku akan mampendeng janji dengan ewen, je tau mahaga ewen. Aku akan maharak uras meto basiak bara hapus tanah, sampai kare tabiring-Ku tau melai sanang intu kare padang tuntang batiroh intu kare parak kayu.

²⁶Aku akan mamberkat ewen tuntang manyoho ewen melai hakaliling bukit-Ku je barasih.[71] Aku akan manenga akan ewen ujan amon ewen perlu ujan.

²⁷Kare batang bua akan mamua, kare tana akan manenga hasil, tuntang uras oloh akan melai dengan aman intu petake kabuat. Amon rantai je mameteng ungkup-Ku jari inggeto awi-Ku tuntang ewen jari iliwus-Ku bara kare oloh je mahajipen ewen, maka ewen katawan je Aku toh TUHAN.

²⁸Ewen dia tinai irampok awi kare bangsa je dia kasene Aku, atawa inangkarap awi kare meto basiak. Ewen akan belom sanang, tuntang ije biti mahin jaton oloh je akan mawi kikeh akan ewen tinai.

²⁹Aku akan mampajewong kare tanan ewen sampai dia aton wayah lau tinai hong tanah te. Ewen dia akan inawah tinai awi kare bangsa beken.

³⁰Palus uras oloh katawan je Israel te ungkup ayung-Ku tuntang je Aku mangalindong ie. Aku, TUHAN Ije Pangkahai jari hakotak.

³¹Toto, keton toh katawan tabiring-Ku je impakanang-Ku. Keton toh ungkup-Ku, tuntang Aku Hatallan keton. Aku, TUHAN Ije Pangkahai jari hakotak.”