Read Ngaju ESEKHIEL 36 Bible Online

ESEKHIEL 36 - Ngaju bible

ESEKHIEL 36

¹TUHAN hamauh, “O anak olon, suman akan kare bukit Israel tuntang soho ewen mahining auh TUHAN Ije Pangkahai.

²‘Metoh kare bangsa hakaliling manyarang tuntang marampok keton, ewen jari manawah hapus Israel. Dengan kahanjake ewen hamauh koae toh kare bukit je bara horan te jadi ayun ewen. Tagal te, o kare lungkoh tuntang kare bukit, kare anak sungei tuntang janah, o lewu je baya tisan taloh baduroh bakarak tuntang je jari ilihi awi oloh je melaie hayak irampok tuntang ihalalea awi kare bangsa hakalilinge, hining taloh je insanan TUHAN Ije Pangkahai akan keton: Huang kambuar kasangit-Ku, Aku malait kare bangsa hakaliling keton tuntang je mambatang Edom, awi ewen mamparahan kahanjake tuntang mahina, jari marampas tanah-Ku tuntang marampas kare padang orue. Toh Aku sangit tuntang mamok awi kare bangsa te jari paham mahina tuntang mamparandah keton.

⁷Aku toh TUHAN Ije Pangkahai sumpah je kare bangsa hakaliling keton te akan ihina kea.

⁸Tapi akan keton insanang-Ku, o kare bukit Israel, kare batang kayu ain keton akan manyalundik tuntang mamua tinai akan ungkup-Ku Israel je bajeleng akan buli lewue.

⁹Aku aton intu hila ikau o Israel, tuntang Aku manukas je petak ayum akan inyangkul tinai tuntang inawor binyie.

¹⁰Aku akan mandahang jumlah ungkup-Ku Israel. Ewen akan melai intu kare lewu tuntang mamangun haluli kare taloh je jari baduroh baderep.

¹¹Kakare oloh tuntang meto ayum akan indahang awi-Ku, sampai are toto, labih are bara solake, tuntang ewen akan manak meso are. Ewen akan melai intu kanih kilau solake tuntang iawi-Ku jaton bara katapas sama kilau je hindai puji keton mangkemee. Maka ewen katawan je Aku toh TUHAN.

¹²Ungkup-Ku Israel akan imbit-Ku buli balalu melai intu lewu humae tinai. Tanah te akan jadi ayun ewen kabuat tuntang akan harajur manenga hasile sampai kare anak ewen dia tinai matei balau.’

¹³Aku toh TUHAN Ije Pangkahai hamauh, ‘Puna toto petak toh inggare panguman olon tuntang parampas kare anak oloh — bangsa je melaie.

¹⁴Tapi nampara bara katika toh petak toh dia kuman olon tinai atawa marampas kare anak ewen. Aku toh TUHAN Ije Pangkahai jari hakotak.

¹⁵Dia usah tinai tanah toh mahining auh baka bara kare bangsa atawa mananggong auh oloh je mahina. Petak toh dia tinai mampalomos bangsa je melaie. Aku toh TUHAN Ije Pangkahai jari hakotak.’ ”

¹⁶TUHAN hakotak dengangku,

¹⁷“O anak olon, metoh kare oloh Israel melai intu tanah ewen kabuat, ewen jari mamapae dengan gawin ewen kabuat. Aku maanggap gawin ewen te papa, kilau oloh bawi je metoh dumah bulae.[73]

¹⁸Inampohak awi-Ku kasangit-Ku akan ewen awi ewen are mampatei intu tanah te tuntang mamapae dengan kare hampatong dewan ewen.

¹⁹Ewen ihukum-Ku tumon ampin pambelom tuntang gawin ewen, palus ewen inaburan awi-Ku akan kare tanah bangsa beken.

²⁰Akan kueh bewei ewen haguet, ewen harajur mamapa arang-Ku je barasih. Awi kare oloh hamauh kalotoh, ‘bangsa jetoh, ungkup Hatalla, tapi ewen musti malihi tanah je inenga Hatalla akan ewen.’

²¹Aku paham manyayang awi arang-Ku je barasih jari imapa awi kare oloh Israel akan kueh bewei ewen haguet.

²²Awi te, keleh manyampai akan bangsa Israel auh bara Aku toh TUHAN Ije Pangkahai, ‘Taloh je akan ilalus-Ku kareh dia tagal keton, o kare oloh Israel, malengkan tagal arang-Ku je barasih, je jari imapa keton akan kueh bewei keton haguet.

²³Aku akan mamparahan karasih arang-Ku je hai te, aran je jari imapa keton intu marak kare bangsa, palus ewen katawan je Aku toh TUHAN. Aku toh TUHAN Ije Pangkahai jari hakotak. Aku akan mahapan keton uka mamparahan akan kare bangsa je Aku toh barasih, TUHAN Je Barasih Haliai.

²⁴Bara genep bangsa tuntang lewun oloh, keton akan imumpong-Ku tuntang iliang-Ku akan lewun keton kabuat.

²⁵Limbah te keton akan imbirik-Ku hapan danum katining, uka keton barasih bara kare dewan keton tuntang bara kare taloh je jari mamapa keton.

²⁶ Palus keton inenga-Ku atei je taheta tuntang tirok je taheta. Atei keton je batekang sama kilau katekang batu akan ingganti-Ku hapan atei je panumon.

²⁷Roh-Ku akan inusoh-Ku akan huang atei keton tuntang keton akan injaga awi-Ku uka belom manumon kare atoran ayung-Ku hayak manumon kare parentah-Ku.

²⁸Maka keton akan melai intu lewu je jari inenga-Ku akan tato hiang keton. Keton akan jadi ungkup-Ku tuntang Aku kea akan jadi Hatallan keton.

²⁹Keton akan iliwus-Ku bara uras kare kapapan keton. Aku akan manenga parentah akan gandom uka belom bajewong mangat keton dia puji tinai buah lau.

³⁰Aku akan mandahang kajewong kare batang bua ain keton tuntang kare hasil tanan keton. Tagal te keton akan dia tinai mangkeme wayah lau je marusak aran keton marak kare bangsa.

³¹Keton akan mingat gawin keton je papa tuntang gawin keton je dia patut te, palus keton manjadi bajilek dengan arep keton kabuat tagal kare dosa tuntang kapapan keton te.

³²Ingat o Israel, uras kare taloh te ilalus-Ku dia tagal keton. Keton musti mahamen tuntang mangkeme papa awi gawin keton. Aku toh TUHAN Ije Pangkahai jari hakotak.’ ”

³³TUHAN Ije Pangkahai hamauh, “Limbah keton irasih-Ku, bara kare dosan keton, keton akan inyoho-Ku melai intu kare lewun keton tinai, tuntang mamangun haluli kare taloh je jari baduroh baderep.

³⁴Bihin kare oloh je mananjong mahalau kare petak keton mite kapaham kakeang petak te. Tapi Aku akan manenga kaolih akan keton manguan petak te tinai.

³⁵Maka uras oloh akan hengan, awi petak je keang kamahau te, katika toh hobah jadi kabon Eden. Kare petak je tunis benyem, rusak tuntang jadi karam taloh, katika toh jadi kare lewu je dehen kotae tuntang are oloh melaie.

³⁶Palus kare bangsa tetangga keton je magon aton, akan katawan je Aku, TUHAN, jari mamangun haluli kare lewu je jari hancor, tuntang manguan haluli kare tana je keang. Aku, TUHAN, jari hakotak tuntang musti akan malaluse.”

³⁷TUHAN Ije Pangkahai hamauh, “O bangsa Israel, keton inyohoku tinai balaku dohop dengang-Ku; Aku akan mandahang hasean keton kilau tabiri.

³⁸Kare lewu je metoh toh hancor, akan kontep oloe kilau Yerusalem hong kare andau hai intu katika je halau, kontep dengan kare tabiri je iluput indu parapah. Maka keton katawan je Aku toh TUHAN.”