Read Ngaju ESEKHIEL 37 Bible Online

ESEKHIEL 37 - Ngaju bible

ESEKHIEL 37

¹Aku mangkeme kuasan TUHAN, tuntang Roh Ayue mimbit aku mohon akan janah je kontep dengan kare tulang.

²Aku ingagalan awi TUHAN mangumbang kaliling janah te. Aku mite hong hapus janah te are toto kare tulang je keang toto hakalampah.

³TUHAN misek aku, “O anak olon, en tau kare tulang toh belom haluli?” Aku tombah, “TUHAN Ije Pangkahai, baya ikau bewei je katawan.”

⁴Palus TUHAN manyoho aku manyampai peteh Ayue akan kare tulang je keang te.

⁵“Aku toh TUHAN Ije Pangkahai mahimon tahaseng akan huang arep keton uka keton belom haluli.

⁶Aku mandak uhat tuntang isi intu keton hayak mangalukop keton dengan upak. Keton akan inenga-Ku tahaseng sampai keton belom. Maka keton katawan je Aku toh TUHAN.”

⁷Palus aku Esekhiel hamauh dengan kare tulang te tumon parentah TUHAN. Tuntang metoh aku hakotak te, hiningku auh je rik-rak, awi kare tulang te nampara hatontong harait sama arepe.

⁸Metoh aku manampayahe, kare tulang te nampara aton uhate tuntang isie, palus aton upake kea tapi kare biti te hindai manahaseng.

⁹Hatalla hamauh dengangku, “O anak olon, hakotak dengan riwut.[74] Sanan je Aku, TUHAN Ije Pangkahai marentah ie uka dumah bara hete-hete, uka mahimon tahaseng akan kare biti je matei te sampai ewen belom haluli.”

¹⁰ Palus aku hakotak tumon parentah TUHAN tuntang riwut kea mahimon tahaseng akan kare biti te balalu ewen belom tuntang mendeng. Jumlah ewen are toto, sukop akan mawi pasukan tantara je hai.

¹¹Hatalla hakotak dengangku, “O anak olon, kare tulang toh kilau tampengan akan bangsa Israel. Ewen bakotok je ewen te keang, jaton kaharap tuntang jaton kare andau harian je inaharepe.

¹²Awi te, keleh manujum akan ungkup-Ku Israel te, iete Aku, TUHAN Ije Pangkahai akan muap kubur ewen. Aku akan mampalua ewen bara hete tuntang malian ewen akan tanah Israel.

¹³Limbah Aku malalus kakare taloh te, ungkup-Ku akan katawan je Aku toh TUHAN.

¹⁴Aku akan mahimon tahaseng akan huang bitin ewen mangat mambelom ewen, palus ewen tau melai intu lewun ewen kabuat. Maka ewen palus katawan je Aku toh TUHAN. Aku toh TUHAN jari hakotak tuntang musti akan malaluse.”

¹⁵TUHAN hamauh tinai dengangku,

¹⁶“O anak olon, duan ije sokah tuntang keleh manyurat kare auh toh intu hunjue, ‘Karajaan Yuda’. Palus duan ije sokah je beken, tuntang surat intu hunjue: ‘Karajaan Israel’.

¹⁷Limbah te imbing kadadue sokah te sampai kare tapakae hasampok tuntang jadi ije sokah.

¹⁸Amon bangsam misek rimae,

¹⁹sanan akan ewen, je Aku, TUHAN Ije Pangkahai akan manduan sokah je indu tampengan Israel tuntang mampahinjee dengan sokah je indu tampengan Yuda. Due sokah te iawi-Ku jadi ije tuntang imbing-Ku intu lengeng-Ku.

²⁰Imbing due sokah te tuntang parahan akan bangsa te.

²¹Palus sanan akan ewen, je Aku, TUHAN Ije Pangkahai akan manduan hapus bangsa-Ku bara kare lewu je akan hete ewen jari haguet. Ewen akan imumpong awi-Ku tuntang imbit-Ku haluli akan lewun ewen kabuat.

²²Ewen akan iawi-Ku jadi ije bangsa intu lewu te, intu kare bukit Israel. Ewen akan irentah awi ije raja tuntang dia akan hapisah tinai jadi due bangsa atawa due karajaan.

²³Ewen dia mamapa arepe tinai awi mawi dosa tuntang manyembah kare hampatong dewa je mawi kajilek. Aku akan maliwus ewen bara kakare karisang je mawi ewen darhaka dengang-Ku. Aku akan marasih ewen; ewen akan jadi ungkup-Ku, tuntang Aku jadi Hatallan ewen.

²⁴ Ewen akan impahinje penda ije biti raja kilau raja Dawid je akan marentah katatahie. Dengan kaketepe ewen akan manumon kare atoran aing-Ku. Tuntang sampai katatahie ewen tuntang turonan ewen akan melai tanah te, tanah je inenga-Ku akan Yakob tuntang ielai awi tato hiang ewen.

²⁶Aku akan mampendeng ije janji dengan ewen je musti akan manenga kasanang kamangat akan ewen sampai katatahie. Aku akan mamberkat tuntang mandahang jumlah ewen. Intu tanah ewen akan imangun awi-Ku Humang-Ku je tetep intu hete sampai katatahie.

²⁷ Aku akan melai dengan ewen, Aku akan jadi Hatallan ewen tuntang ewen jadi ungkup ayung-Ku.

²⁸Amon Humang-Ku jari aton intu marak ewen sampai katatahie maka kare bangsa beken katawan je Aku, TUHAN, jari mintih Israel jadi ungkup-Ku kabuat.”