Read Ngaju ESEKHIEL 38 Bible Online

ESEKHIEL 38 - Ngaju bible

ESEKHIEL 38

¹TUHAN hamauh dengangku,

² “O anak olon, keleh manyapa Gog raja hai bara kare lewu Mesekh tuntang Tubal intu tanah Magog.

³Sanan akae je Aku, TUHAN Ije Pangkahai, musoh ayue.

⁴Aku akan mabelok jalae, mangkepan kawit intu ijange, tuntang manjijit ie balua hayak dengan hapus pasukae. Are toto pasukae je mahapan kuda tuntang hapakaian seragam te. Genep tantara mimbit talawang tuntang padang.

⁵Raja impahayak awi kare tantara bara Persia, Sudan tuntang Libia, genep bitie mimbit padang tuntang tanggoi waja.

⁶Uras kawan parang bara kare lewu intu Gomer tuntang Bet-Togarma intu utara, miar hayak ie, tuntang are bangsa beken omba kea.

⁷Nyoho ie tata-tatap tuntang rentah hapus tantara je omba ie uka tatap manumon parentahe.

⁸Pire-pire nyelo tinai ie akan irentah-Ku uka manyarang ije lewu dengan kare oloh je melai intu hete je jari imumpong haluli bara marak kare bangsa tuntang je limbah te melai intu lewu te dengan kasanang kamangat. Gog akan manguasa kare bukit Israel je jari tahi benyem tuntang kontep dengan karak duroh derep taloh, tapi je katika toh ielai awi rayat je belom dengan kasanang kamangat.

⁹Ie tuntang tantarae hayak dengan kare bangsa je mampahayak ie akan dumah manyarang kilau riwut barat tuntang manyangkulep hapus lewue kilau baunandau.”

¹⁰TUHAN Ije Pangkahai hamauh dengan Gog, “Hong katika te ikau akan mawi rencana je papa.

¹¹Ikau manukas manyarang lewu je dia aton kotae te, eka kare oloh je melai hete belom sanang mangat intu kare lewu je dia badinding tuntang jaton pakakas hapa mawat arepe.

¹²Ikau akan marampok tuntang marampas kare ramon oloh intu lewu je bihin baya aton duroh derep taloh bewei. Oloh je melai intu hete je imumpong bara sepsimpan bangsa, katika toh jari aton tempon kare ramo tuntang meto tuntang ewen melai intu bentok kalunen toh.

¹³Oloh Seba tuntang Dedan hayak kare oloh dagang intu kare lewu intu tanah Spanyol akan misek kalotoh, ‘En ikau mirak tantaram baya akan marampas tuntang marampok amas, perak, meto tuntang panatau, hayak munda urase kare taloh te?’ ”

¹⁴Awi te TUHAN Ije Pangkahai manyoho aku manyampai akan Gog peteh toh, “Pas katika ungkup-Ku Israel belom sanang mangat, ikau dumah manyarang.

¹⁵Ikau haguet[75] bara ekam melai, kejau intu utara, impahayak tantara je hai tuntang tamam, urase pasukan je mahapan kuda bara kakare macam bangsa.

¹⁶Palus ikau manyarang ungkup-Ku Israel kilau riwut barat mawi kalunen. Amon katikae sampai, ikau akan inyoho awi-Ku uka manguasa lewung-Ku. Dengan gawing-Ku hajamban ikau, o Gog, kare bangsa akan katawan eweh Aku, iete Hatalla je barasih.

¹⁷En dia tahiu ikau Aku bihin hakotak hajamban kare rewar aing-Ku kare nabi Israel? Ewen jari manujum intu katika je akan dumah Aku akan manyoho ije biti oloh uka manyarang Israel. Aku toh TUHAN Ije Pangkahai jari hakotak.”

¹⁸TUHAN Ije Pangkahai hamauh, “Tapi bajeleng limbah Gog manyarang Israel, Aku akan mamok.

¹⁹Tuntang dengan kasangit je paham Aku akan maancam, iete hong andau te aton petak hagerek je dia laluen kahaie intu tanah Israel.

²⁰Uras lauk tuntang burong, uras meto hai tuntang korik, tuntang uras oloh hapus kalunen akan hagenjeh mikeh manaharep Aku. Kare bukit akan baduroh, kare tiwing akan batusot tuntang uras dinding kota akan baderep.

²¹Palus Gog akan inareweng-Ku hapan kare macam calaka.[76] Aku toh TUHAN Ije Pangkahai jari hakotak. Kare oloh ayue akan hasarang sama arepe hapan padang ewen.

²²Ie akan ihukum awi-Ku hapan panyakit tuntang pampatei. Ujan labat tuntang ujan es, apui tuntang barirang kareh inusoh-Ku akae tuntang tantarae tuntang akan kare bangsa je jari omba ie.

²³Hapan cara jete Aku mamparahan akan uras kare bangsa, tahiu Aku toh puna tinduh-kahai tuntang barasih. Maka ewen katawan je Aku toh TUHAN.”