Read Ngaju ESEKHIEL 39 Bible Online

ESEKHIEL 39 - Ngaju bible

ESEKHIEL 39

¹TUHAN Ije Pangkahai hamauh, “O anak olon, nujum malawan Gog, raja hai bara kare lewu Mesakh tuntang Tubal, tuntang sanan akae je Aku toh musohe.

²Aku akan mambelok jalae tuntang mimbit ie balua bara lewu kejau intu utara akan kare bukit Israel.

³Intu hete Aku akan mahampas panahe sampai balekak bara lenge sambile, tuntang mampanjato kare anak panah bara lenge gantaue.

⁴Intu hunjun kare bukit Israel, Gog tuntang hapus tantarae hayak dengan kare oloh je pakat dengae akan matei, tuntang kare hantun ewen akan inenga-Ku akan indu kinan kare burong tuntang meto basiak.

⁵Kare tantarae te akan kalah tuntang matei intu kare tana. Aku, TUHAN Ije Pangkahai jari hakotak.

⁶Aku akan mawi taloh bakehu intu lewu Magog tuntang intu kare saran tasik eka oloh belom sanang mangat. Maka uras ewen katawan je Aku toh TUHAN.

⁷Tapi intu marak oloh Israel, akan imparahang-Ku arang-Ku je barasih, tuntang arang-Ku te dia akan imapa tinai. Maka kare bangsa katawan je Aku toh TUHAN, Hatalla je barasih bara Israel.”

⁸TUHAN Ije Pangkahai hakotak, “Toto, andau je inyewut-Ku te akan dumah.

⁹Kare oloh je melai kare lewun Israel balua bara-boho uka mamumpong kare pakakas parang je ilihi, iete talawang tuntang padang, panah hayak gagada hapa mamukul. Uras kare taloh te iawi ewen jadi pandok apui, tuntang jete sukup akan uju nyelo.

¹⁰Palus ewen dia perlu mamumpong pandok apui bara tana, atawa maneweng batang kayu intu himba. Awi kare pakakas je ilihi te sukup karee akan pandok apui. Ewen akan marampok tuntang marampas kare ramon oloh je jari marampok tuntang marampas ramon ewen. Aku, TUHAN Ije Pangkahai jari hakotak.”

¹¹TUHAN hamauh, “Amon kare taloh te uras manjadi, Aku handak manenga akan Gog petak kuburan intu Israel, intu Janah Eka Dimpah je aton intu hila timor Tasik Matei. Hete Gog tuntang hapus tantarae akan ingubur, tuntang janah te akan inyewut ‘Janah Pasukan Gog’.[77]

¹²Uju bulan katahie kare oloh Israel akan deroh mangubur uras kare hantu, uka tanah te dia papa tinai.

¹³Oloh hapus lewu akan mandohop gawin mangubur te; tuntang akan gawi te ewen akan manarima hormat hong andau kamanang-Ku. Aku, TUHAN Ije Pangkahai jari hakotak.

¹⁴Limbah uju bulan te halau, pire-pire biti akan inenga gawi mangombang hapus lewu te uka manggau kare hantu[78] je magon hakalampah intu petak, tuntang amon aton, balalu mangubure uka marasih lewu te bara taloh je papa.

¹⁵Hong jalanan te, sasining ewen sondau tulang olon, ewen akan manenga tanda intu balikate, mangat kare oloh je tukang mangubur mite jete balalu mangubur tulang te intu Janah Pasukan Gog.

¹⁶Dengan cara jete maka tanah te irasih bara taloh je papa. (Intu harian andau, intu janah te akan aton lewu je arae sama dengan pasukan Gog).”

¹⁷ TUHAN Ije Pangkahai hamauh dengangku, “O anak olon, tehau uras burong tuntang meto je beken, uka dumah bara hete-hete mangat kuman parapah je inyadia awi-Ku akan ewen. Aku akan mawi pesta hai intu kare bukit Israel, intu hete ewen tau kuman isin meto tuntang mihop daha.

¹⁸Ewen tau kuman kare hantun pahlawan, tuntang mihop dahan kare oloh panguasa je marentah hong kalunen. Kare pahlawan tuntang oloh panguasa je marentah te akan impatei kilau kare kambing hatue atawa kare anak kambing, atawa kare banting baseput.

¹⁹Limbah Aku mampatei kare oloh te kilau parapah, kare burong tuntang meto je beken akan kuman uras enyake sampai muta, tuntang mihop daha sampai babusau.

²⁰Intu mejang-Ku ewen tau mambesoh kanaie haya-hayak dengan kakare kuda tuntang oloh je manongkange tuntang dengan kare pajuang. Aku, TUHAN Ije Pangkahai jari hakotak.”

²¹TUHAN hamauh, “Aku akan mamparahan kahaing-Ku akan kare bangsa. Uras ewen akan mite kilen ampie Aku mahapan kuasang-Ku uka malalus kare kaputusan je adil.

²²Nampara bara katika te oloh Israel akan katawan je Aku Hatallan ewen.

²³Tuntang uras bangsa akan kasene je oloh Israel insahan akan eka tawanan awi dosan ewen dengang-Ku. Ewen jari ilihi awi-Ku tuntang inaluaku impakalah awi musoh tuntang impatei huang parang.

²⁴Aku mambaleh ewen tumon kapapan tuntang kadarhakan ewen, palus Aku malihi ewen.”

²⁵TUHAN Ije Pangkahai hamauh, “Tapi toh Aku akan masi ungkup Israel turonan Yakob, tuntang manjadian ewen sanang haluli. Tumon te Aku mahaga mangat arang-Ku tetep ihormat.

²⁶Amon ewen melai tinai dengan sanang mangat intu lewun ewen kabuat, tuntang jaton je mampikeh tuntang manderoh ewen, palus ewen akan mangalapean kilen ampie ewen jari impahawen awi jari mandarhaka dengang-Ku.

²⁷Aku akan mimbit ewen haluli bara kare lewun musoh ewen, tuntang karasih-Ku akan gitan awi kakare bangsa tagal gawing-Ku te.

²⁸Maka ewen katawan je Aku toh TUHAN, Hatallan ewen. Awi Aku je mangirim ewen akan eka tawanan, maka Aku kea je mimbit ewen buli akan lewun ewen kabuat, tuntang ije biti mahin dia je ilihi intu kanih.

²⁹Aku akan manusoh Roh-Ku akan bangsa Israel, tuntang dia akan malihi ewen tinai. Aku, TUHAN Ije Pangkahai jari hakotak.”