Read Ngaju ESEKHIEL 4 Bible Online

ESEKHIEL 4 - Ngaju bible

ESEKHIEL 4

¹Hatalla hamauh, “O anak olon, duan ije batu bata, andak intu taharepm tuntang keleh manggaris intu hunjue sonton gambar lewu Yerusalem.

²Palus nampa gambar je mamparahan ampin lewu te ingapong, tuntang kare parite, kare timbok petak, eka kare kemah tuntang kare pakakas hapan manderep dinding kota hakalilinge.

³Duan ketel sanaman tuntang anggap jete ije dinding sanaman; andak ketel te helat ikau dengan lewu Yerusalem. Limbah te naharep lewu te kila-kilau jaka ikau te je mangaponge. Jete akan jadi tanda akan bangsa Israel.

⁴Palus ikau menter malingkir akan hila sambil, palus Aku[7] manusoh kare kasalan bangsa Israel akam. Katahin 390 andau ikau akan menter kalote tuntang kapehe awi kasalan ewen. Ije andau ikau menter kalote mananda ije nyelo hukum akan bangsa Israel.

⁶Limbah te menter malingkir akan hila gantau tuntang ngeme hukum akan bangsa Yuda epat puluh andau katahie; ije andau mananda ije nyelo hukum akan ewen.

⁷Tampayah Yerusalem ingapong. Juju tamparm akan lewu te tuntang nyampai peteh-Ku tahiu hukuman akan ewen.

⁸Ikau akan imasong awi-Ku sampai ikau dia tau mambalik bitim bara sambil akan hila gantau atawa bara gantau akan hila sambil sampai kapong te terai.

⁹Toh, duan gandom, jelei, kacang bahandang, bawak saretak, jawe tuntang tepong gandom. Ewoi jete urase balalu nampa rote. Jete panginan katahin 390 andau ikau menter malingkir akan hila sambil te.

¹⁰Rote te imbagim mangat genep andau ikau kuman baya 230 gram. Labih bara te dia tau.

¹¹Danum ihopm inikas kea, iete ije sampai due sangkir jandau.

¹²Tokan apui mahapan tain olon akan pandoke. Nyehei rotem intu hunjun apui te tuntang kinan rote jete intu taharep oloh are.”

¹³TUHAN hamauh, “Kalote ampie oloh Israel akan kuman panginan je ingahana[8] awi atoran Moses metoh ewen insahan awi-Ku akan kare lewun oloh bangsa beken.”

¹⁴Tapi aku tombah, “Kayah, TUHAN Ije Pangkahai! Bara korik sampai toh, hindai puji aku mamapa arepku hapan panginan hantun meto atawa tisan panginan meto basiak. Dia puji aku kuman panginan je papa.”

¹⁵Palus Hatalla hamauh, “Yoh, indu gantin tain olon, ikau tau mahapan tain sapi hapa mamapui rotem.”

¹⁶Limbah te Ie hamauh tinai, “O anak olon, Aku akan manganan taloh kinan intu Yerusalem. Dengan kagogop tuntang kagaer kare oloh akan manikas panginan je kinan ewen tuntang danum je ihop ewen.

¹⁷Ewen akan bageto kaharape awi jaton rote tuntang danum, tuntang kajariae ewen matei awi kare dosan ewen.”