Read Ngaju ESEKHIEL 41 Bible Online

ESEKHIEL 41 - Ngaju bible

ESEKHIEL 41

¹Oloh hatue te mimbit aku akan huang kamar bentok, je inyewut Eka Ije Barasih. Ie mukur jalan je manintu akan hete: kapanjange telo meter, [84]

²tuntang kabukae lime meter. Dinding intu due sarae kakapale due satengah meter. Palus ie mukur Eka Ije Barasih te: kapanjange 20 meter tuntang kabukae sapuluh meter.

³Limbah te ie tame kamar huang. Ie mukur jalan je manintu akan hete: kapanjange ije meter, kabukae telo meter, tuntang dinding intu due sarae kakapale telo satengah meter.[85]

⁴Palus ie mukur kamar te kea: pangue sagi epat kapanjange tuntang kabukae uras sapuluh meter. Limbah te ie hamauh dengangku, “Jetoh Eka Ije Barasih Haliai.”

⁵Limbah te oloh hatue te mukur dinding huang Human TUHAN: kakapale telo meter. Intu dinding hakaliling Human TUHAN te aton kare kamar je kabukae due meter.

⁶Kare kamar te susun telo tuntang hong genep susun aton 30 kamar. Dinding luar genep susun labih banipis bara dinding susun pendae, sampai kare kamar te tau inyusun aloh dia usah marombak dinding Human TUHAN te.

⁷Bara luar, dinding Human TUHAN te sama kakapale bara penda sampai hunjun. Intu dinding luar Human TUHAN, intu hila luar kare kamar te, aton due tangga hai sampai oloh tau mandai bara susun je penda sampai susun kadue tuntang katelo.

⁸Dinding luar kare kamar te kakapale due satengah meter. Bangunan te aton bauntonggange je manintu akan kare kamar intu hila utara Human TUHAN, tuntang bauntonggang je beken je manintu akan kare kamar intu hila salatan. Intu hakaliling Human TUHAN aton tambiran je kabukae due satengah meter; pandudukae telo meter bara petak, tuntang inampa sama kagantonge dengan galang kare kamar intu dinding Human TUHAN. Intu helat parantaran tuntang kare bangunan je ihapan kare imam, aton eka buang je kabukae sapuluh meter, intu sambil gantaun Human TUHAN.

¹²Intu dipah parantaran hila barat, aton bangunan hai je kapanjange 45 meter tuntang kabukae 35 meter, tuntang kakapal kare dindinge due satengah meter

¹³Oloh hatue te mukur kapanjang Human TUHAN: 50 meter. Bara hila likut Human TUHAN sampai akan dinding likut bangunan hai je intu silan hila barat te kakejaue kea 50 meter.

¹⁴Hila baun bara Human TUHAN je manaharep akan hila timor dengan parantaran intu sambil gantaue, kabukae kea 50 meter.

¹⁵Oloh hatue te mukur bangunan je hai je manaharep parantaran hila barat: kabukae 50 meter, tatame kare dinding sambil gantaue. Kare kamar intu Human TUHAN, kamar baun Eka Ije Barasih, tuntang Eka Je Barasih Haliai,

¹⁶ihias hapan bingkai kayu, bara laseh sampai kare baunsengoke. Kare baunsengok te tau iatep hapan benang.

¹⁷Hapus dinding hila huang ihias hapan kare ukir

¹⁸batang korma helat due Kerub. Kerub te aton due ampin baue,

¹⁹ije sama kilau ampin baun olon je manaharep akan batang korma hila sambil, tuntang kilau ampin baun singa je manaharep batang korma hila gantau. Kare ukir te aton intu hapus Human TUHAN,

²⁰nampara bara laseh sampai akan hila hunjun bauntonggang.

²¹Kare jihin bauntonggang ain Eka Ije Barasih sagi epat pangue. Intu baun Eka Ije Barasih Haliai aton ije taloh je ampie kilau mesbeh bara kayu.

²²Kagantonge ije satengah meter tuntang kabukae ije meter. Kare putinge, lapike[86] tuntang dindinge inampa bara kayu. Oloh hatue te hamauh dengangku, “Jetoh meja je ingkes intu taharep TUHAN.”

²³Intu lawin jalan je manintu akan Eka Ije Barasih aton ije bauntonggang, kalote kea intu lawin jalan je manintu akan Eka Ije Barasih Haliai.

²⁴Kare bauntonggang te aton due lawange je buap bara bentok.

²⁵Kare bauntonggang intu Eka Ije Barasih ihias dengan kare ukiran batang korma tuntang kare kerub, sama tampae kilau intu kare dindinge. Intu hila baun kamar baun iete hila luare, aton atep bara kayu.

²⁶Intu kadadue saran dinding balikat kamar te aton kare baunsengok, tuntang kare dindinge te ihias hapan ukir batang korma.[87]