Read Ngaju ESEKHIEL 42 Bible Online

ESEKHIEL 42 - Ngaju bible

ESEKHIEL 42

¹Limbah te oloh hatue te mimbit aku akan parantaran luar tuntang mangagalan aku akan huma beken intu hila utara Human TUHAN, dia kejau bara huma hai intu hila barat Human TUHAN te.

²Pangun huma te kapanjange lime puluh meter, tuntang kabukae due puluh lime meter.

³Ije bara saran huma te manaharep akan tambiran je kabukae sapuluh meter te, tuntang saran balikat je beken manaharep akan laseh batu intu parantaran luar. Bangunan te susun telo; genep susun maname labih akan hila huang bara susun je pendae.

⁴Intu baun kare kamar te, intu hila huang aton jalan je kabukae lime meter tuntang kapanjange lime puluh meter.[88] Kare bauntonggange manaharep akan hila utara.

⁵Kare kamar intu susun hunjun labih korik bara kare kamar intu kare susun je pendae, awi kare jalan intu baun kamar je hunjun te labih hai bara je aton intu pendae.

⁶Kare kamar te susun telo tuntang dia inongket awi kare jihi kilau kare huma intu parantaran.

⁷Saparo bara susun penda, je kapanjange due puluh lime meter te baya dinding bewei. Tapi intu hila je tisae, kea due puluh lime meter, imangun kare kamar. Intu susun je paling hunjun aton kare kamar hapus pangun huma te.

⁹Intu penda kare kamar, intu tapakan hila timor bangunan toh, tuntang intu upon dinding, aton ije bauntonggang je manintu parantaran luar. Intu saran hila salatan[89] Human TUHAN, aton bangunan je sama, ekae dia kejau bara bangunan je hila barat.

¹¹Intu baun kare kamare aton ije jalan je sama kilau jalan intu hila utara. Ukurae sama, pangue sama, tuntang kare bauntonggange kea sama.

¹²Intu penda kare kamar intu saran hila salatan, iete intu tapakan hila timor hong upon dinding aton kea ije bauntonggang.

¹³Oloh hatue te hamauh dengangku, “Kadadue huma te barasih. Intu hete, kare imam je tau manaharep pandumah TUHAN, kuman kare parapah je paling barasih. Intu hete kea ewen mingkes kare parapah je paling barasih iete: parapah gandom tutang parapah ampun dosa atawa parapah panewus kasalan.

¹⁴Amon kare imam jari lepah gawie intu Human TUHAN, tuntang handak haguet akan parantaran luar, maka pakaian je tantai ihapan ewen metoh malalus sombayang ilihi ewen intu kare kamar te. Ewen mahapan pakaian beken, limbah te harue ewen tau haguet akan eka rayat hapumpong.”

¹⁵Limbah oloh hatue te lepah mukur Human TUHAN intu hila huang, ie mimbit aku balua mahalau lawang timor, palus mukur kaliling petak Human TUHAN.

¹⁶Hapan sukahe ie mukur saran hila timor: 250 meter.

¹⁷Limbah te ie mukur saran hila utara, saran hila salatan tuntang saran hila barat: genep sarae kapanjange sama iete 250 meter.

²⁰Jadi, petak Human TUHAN iete ije kalambar petak sagi epat, ukurae 250 meter intu genep sarae. Petak te ingaliling ije dinding akan mamisah eka je tantai akan TUHAN bara eka je akan oloh are.