Read Ngaju ESEKHIEL 43 Bible Online

ESEKHIEL 43 - Ngaju bible

ESEKHIEL 43

¹Limbah te oloh hatue te mimbit aku akan lawang je manaharep akan hila timor,

² tuntang intu hete gitangku dumah bara hila timor kalawa hasangkowong je mananda pandumah Hatallan Israel. Auh Hatalla tarahining kilau auh gotok tasik, tuntang petak barangilat awi kalawan pandumah Hatalla.

³Paite te sama kilau je gitangku metoh Hatalla akan marusak Yerusalem, tuntang kilau je gitangku intu sungei Kebar. Palus aku mahingkep manyembah.

⁴Kalawa je hasangkowong te miar mahalau lawang timor palus tame akan huang Human TUHAN.

⁵Roh TUHAN manggatang aku tuntang mimbit aku akan parantaran huang; intu hete gitangku Human TUHAN inyangkulep sangkowong kalawan pandumah TUHAN.

⁶Katika oloh hatue te mendeng intu balikatku, hiningku TUHAN hamauh dengangku bara huang Human TUHAN, Koae,

⁷“O anak olon, toh padadusang-Ku. Intu hetoh Aku melai intu marak ungkup Israel tuntang marentah ewen katatahie. Aloh ewen, tuntang kare rajan ewen, dia tinai mamapa arang-Ku je barasih awie manyembah dewa[90] atawa awie mangubur hantun kare rajan ewen intu eka toh.

⁸Bihin kare rajan ewen mawi kare lambang tuntang kare jihin bauntonggang istanan ewen intu balikat kare lambang tuntang kare jihin bauntonggang Humang-Ku, sampai baya aton ije dinding bewei helate. Ewen jari mamapa arang-Ku je barasih awi gawin ewen je bakajile-jilek. Awi te huang kasangit-Ku Aku mambinasa ewen.

⁹Tapi nampara bara toh ewen musti terai manyembah hampatong dewa tuntang mindah kare hantun[91] rajan ewen. Limbah te Aku akan melai intu marak ewen sampai katatahie.”

¹⁰Palus TUHAN hamauh tinai, “O anak olon, sanan akan ungkup Israel tahiu Humang-Ku toh, tuntang nyoho ewen manantuani ampin pangue. Pahawen ewen tagal dosan ewen.

¹¹Tuntang limbah ewen mahamen tagal dosan ewen, keleh manarang ampin rencana bangunan Humang-Ku toh akan ewen: tampae, kare bauntonggange eka tame tuntang balua, susun pangue, uras atoran tuntang kare hukum ayung-Ku. Nyurat urase taloh handiai te akan ewen mangat ewen tau mitee tuntang manantuani ampin cara maharago taloh handiai, tuntang manumon uras kare atorae.

¹²Jetoh ie taloh je beken haliai tahiu Human TUHAN: Hapus tanah hakalilinge intu tantan bukit jete barasih haliai.”

¹³ Jetoh ukuran mesbeh manumon ukuran je ihapan akan mukur Human TUHAN. Intu kaliling pain mesbeh aton ije parit je kandaleme satengah meter tuntang kabukae satengah meter kea, dengan papar intu saran luare kagantonge saperepat meter.

¹⁴Bara parit sampai balur mesbeh je paling penda, kagantonge ije meter. Hila bentenge kagantonge due meter, tuntang satengah meter labih korik bara kaliling pain mesbeh. Je kateloe, iete hunjun mesbeh, kea satengah meter labih korik bara kaliling hila bentenge.

¹⁵Je katelo toh iete eka mamapui parapah; kagantonge due meter. Intu epat putinge aton ekae je hadugol kilau tanduk.

¹⁶Hunjun mesbeh te lapak epat pangue; genep sarae ukurae jahawen meter.

¹⁷Hila bentenge kea sagi epat, genep sarae ukurae uju meter, dengan ije papar intu saran luar je kagantonge saperepat meter. (Kalombah parite satengah meter). Intu saran hila timor aton lampat je manintu akan lawin mesbeh.

¹⁸ TUHAN Ije Pangkahai hamauh dengangku, “O anak olon, hining taloh je insanang-Ku akam. Amon mesbeh te jari imangun, ikau musti manahbise dengan mamapui parapah intu hunjue tuntang mambirike dengan dahan parapah.

¹⁹Baya Imam turonan Sadok bara suku Lewi bewei je tau dumah intu taharep-Ku uka mawi sombayang. Aku, TUHAN Ije Pangkahai, je marentah taloh te. Tenga akan ewen ije kongan sapi hatue tabela akan parapah ampun dosa.

²⁰Duan isut dahae tuntang ohos intu kare tandok intu epat puting hunjun mesbeh te, kea intu kare puting hila bentenge hayak intu hakaliling saran mesbeh te. Dengan cara te ikau marasih mesbeh te tuntang tantai mawie akang-Ku.

²¹Limbah te, keleh manduan sapi hatue akan manganan dosa te, tuntang mapui intu eka je inukas iete intu luar hila eka je barasih Human TUHAN.

²²Andau jewue ikau musti maluput ije kongan kambing hatue je tinduh akan parapah ampun dosa. Parasih mesbeh te dengan dahan kambing te, sama dengan je iawim dengan sapi hatue tebela te.

²³Amon jari hapus ikau malaluse, duan ije kongan sapi hatue tabela tuntang ije kongan kambing hatue tabela, kadadue te je tinduh,

²⁴palus imbit akang-Ku. Kare imam musti manawor uyah akan hunjun due meto te balalu mamapuie indu parapah akang-Ku.

²⁵Genep andau, katahin uju andau, ikau musti maluput ije kongan kambing, sapi hatue tabela, tuntang kambing hatue akan parapah ampun dosa. Kare meto te dia aton cacate.

²⁶Uju andau katahie kare imam musti mawi upacara manahbis mesbeh te tuntang manatape mangat tau ihapan.

²⁷Limbah uju andau te hapus, kare imam musti nampara maluput intu hunjun mesbeh te parapah je ingehu tuntang parapah hapa badamai akan ungkup. Palus Aku akan rajin dengan keton handiai. Aku, TUHAN Ije Pangkahai jari hakotak.”