Read Ngaju ESEKHIEL 44 Bible Online

ESEKHIEL 44 - Ngaju bible

ESEKHIEL 44

¹Limbah te oloh hatue te mimbit aku tinai akan lawang luar intu hila timor Human TUHAN. Lawang te tatutup.

²TUHAN hamauh dengangku, “Lawang toh musti tetep inutup tuntang dia tau imbangah. Jaton ije oloh je tau tamee, awi Aku, TUHAN, Hatallan Israel, jari tame akan Humang-Ku mahalau lawang toh. Jadi, lawang toh musti tetep inutup.

³Tapi oloh panguasa je marentah tau manalih lawang te uka kuman panginan barasih intu taharep-Ku. Ie musti tame mahalau kamar hai tuntang haluli mahalau hete kea.”

⁴Limbah te oloh hatue te mimbit aku akan lawang utara je hataharep dengan Human TUHAN. Aku mananture, tuntang aku mite Human TUHAN te inyangkulep awi kalawa je hasangkowong je mananda pandumah TUHAN. Palus aku mahingkep manyembah.

⁵Palus TUHAN hamauh dengangku, “O anak olon, ite bua-buah narai je gitam tuntang ihiningm. Aku akan mansanan akam uras kare atoran tuntang parentah tahiu Humang-Ku toh. Catet bua-buah eweh je tau tame Humang-Ku tuntang eweh je dia tau tame.

⁶Sanan akan ungkup Israel je rajin malawan te iete Aku, TUHAN Ije Pangkahai, dia maku tinai manalua ewen mawi kapapa.

⁷Ewen jari mamapa Humang-Ku, awi metoh enyak tuntang dahan parapah iluput akangku, ewen manyoho tame akan huange kare oloh bangsa beken je dia basunat, tuntang je dia manempo Aku. Dengan kare gawin ewen je bakajile-jilek, ewen jari malanggar janjing-Ku dengan ewen.

⁸Dia baya ewen kabuat je malalus kare gawi barasih huang Humang-Ku, malengkan kare oloh bangsa beken je inyoho ewen akae malaluse.

⁹Aku, TUHAN Ije Pangkahai, mansanan iete oloh bangsa beken je dia inyunat tuntang kakare oloh bangsa beken je dia manempo Aku, dia tau tame Humang-Ku, tatame kea kare oloh bangsa beken je manetep intu marak bangsa Israel.”

¹⁰TUHAN hamauh dengangku, “Aku akan mahukum kare oloh Lewi je haya-hayak oloh Israel je beken, jari malihi Aku tuntang manyembah hampatong dewa.

¹¹Intu huang Humang-Ku, ewen baya tau bagawi akang-Ku kilau kare panggawi tuntang panjaga lawang. Ewen tau manyambalih kare meto akan parapah je ingehu tuntang parapah je inyambalih bara bangsa ayung-Ku, tuntang ewen harajur bagawi akan ungkup.

¹²Tapi awi ewen jari malalus upacara manyembah hampatong dewa akan bangsa Israel, tuntang dengan cara te ewen mimbit bangsa te lawo akan huang dosa, palus Aku, TUHAN Ije Pangkahai, sumpah je ewen musti ihukum.

¹³Ewen dia tau tinai bagawi akang-Ku kilau imam atawa manigong taloh je barasih akang-Ku, atawa tame Eka Ije Barasih Haliai. Jete hukuman akan kare gawi papa je ilalus ewen.

¹⁴Toh ewen inyoho-Ku malalus gawi beken je perlu ilalus intu Humang-Ku.”

¹⁵TUHAN Ije Pangkahai hamauh, “Hong katika bangsa Israel malihi Aku, kare imam Lewi bara turonan Sadok tetep baketep bagawi akang-Ku intu Humang-Ku. Awi te baya ewen bewei je metoh toh tau bagawi akang-Ku tuntang dumah intu taharep-Ku uka maluput enyak tuntang daha bara kare parapah.

¹⁶Baya ewen bewei je tau tame akan huang Humang-Ku, bagawi akang-Ku intu mesbeh-Ku, tuntang mawi sombayang intu Humang-Ku.

¹⁷ Metoh ewen tame lawang manintu akan parantaran huang, ewen mahapan pakaian lena. Dia tau ewem mahapan pakaian bara wol amon metoh bagawi intu parantaran huang, atawa intu huang Humang-Ku.

¹⁸Uka dia balasut tuntang bebes, ewen mahapan salawar linen je dia mahapan peteng kahang, tinai peteng takolok bara lena.

¹⁹ Amon ewen haguet akan parantaran luar, eka ungkup hapumpong, kare imam te mengkak pakaian je hapan ewen bagawi, balalu mingkese intu kare Kamar Ije Barasih huang Humang-Ku, palus mahapan pakaian beken mangat pakaian je hapan ewen bagawi intu eka parantaran huang te dia mawi calaka akan ungkup.[92]

²⁰ Kare imam dia tau bagundul, atawa manalua balaue panjang. Balau te musti inggunting pandak kilau atoran je jari inukas.

²¹ Ewen dia tau mihop anggor amon handak tame akan parantaran huang.

²² Kare imam baya tau kawin dengan kare bawin oloh Israel je magon bujang atawa ije biti balon imam. Ewen dia tau kawin dengan oloh bawi je inulang awi banae.

²³ Kare imam majar akan kare ungkup-Ku uka tau mangasene, kueh je tantai ingabeken baya akang-Ku, tuntang kueh je dia, kueh ije barasih manumon agama tuntang kueh je papa.

²⁴Amon aton lembut perkara ewen musti mamutuse mahapan kare atoran ayung-Ku, tumon kaadilan ayung-Ku. Ewen musti mahaga kare pesta agama, manumon kare atoran tuntang kare parentah-Ku, hayak mahormat andau Sabat kilau andau je tantai akang-Ku.

²⁵ Ije biti imam dia tau mamapa arep awie manigong hantu, kacuali hantun oloh bakase, anake, paharaie atawa betaue je hindai kawin.

²⁶Limbah ie barasih haluli, ie musti mentai uju andau tinai,

²⁷palus haguet akan parantaran huang Humang-Ku, tuntang maluput parapah akan marasih arepe mangat ie tau bagawi tinai intu Humang-Ku. Aku, TUHAN Ije Pangkahai jari hakotak.

²⁸ Kare imam manarima pangkat imam te kilau bagi akan ewen bara taloh je inenga-Ku akan Israel girir-manggirir. Ain ewen dia tau taloh en-en intu Israel: Aku toh jadi panatau ewen.

²⁹ Ewen belom bara parapah gandom, parapah ampun dosa, tuntang parapah tewus kasalan; tuntang uras taloh je jari tantai ingabeken akang-Ku, musti inenga akan ewen.

³⁰Kare imam inenga bagi je pangkahalape bara kare macam hasil getem je solake, tuntang bara en bewei je iluput akang-Ku. Sining katika bangsa Israel mawi rote, maka rote je solake akan kare imam. Palus Aku akan mamberkat kare human bangsa Israel.

³¹ Burong tuntang kare meto beken je matei kabuate, atawa je inangkarap kare meto basiak, dia tau kinan awi kare imam.”