Read Ngaju ESEKHIEL 46 Bible Online

ESEKHIEL 46 - Ngaju bible

ESEKHIEL 46

¹TUHAN Ije Pangkahai hamauh, “Lawang timor je manintu akan parantaran huang musti tetep inutup katahin jahawen andau bagawi. Lawang te baya tau imbuka hong andau Sabat tuntang andau Pesta Bulan Taheta.

²Hong kare andau te oloh panguasa je marentah musti tame bara parantaran luar mahalau kamar hai balalu mendeng intu balikat jihin lawang, metoh kare imam maluput parapah je ingehu tuntang parapah hapa badamai bara oloh panguasa je marentah. Intu lawang te ie musti sontop tuntang manyembah TUHAN, palus haguet. Limbah te, sampai hamalem lawang dia tau inutup.

³Intu hila baun lawang te kea, hapus rayat musti sontop manyembah TUHAN genep andau Sabat tuntang Pesta Bulan Taheta.

⁴Hong andau Sabat oloh panguasa je marentah musti maluput akan TUHAN parapah je ingehu bara jahawen kongan anak tabiri tuntang ije kongan tabiri hatue, uras je tinduh.

⁵Hayak dengan kare tabiri hatue te musti iluput kea parapah gandom 17,5 liter, tuntang hayak dengan genep anak tabiri, musti iluput parapah gandom tumon kare kanahuange. Genep parapah gandom musti impahayak dengan parapah telo liter undus saitun.

⁶Hong Pesta Bulan Taheta parapah te musti bara ije kongan tabiri hatue, jahawen kongan anak tabiri, tuntang ije kongan tabiri hatue, uras je tinduh.

⁷Hayak dengan genep sapi hatue tuntang kambing hatue, ie musti maluput gandom 17,5 liter, tuntang hayak genep anak tabiri, pire bewei karee tumon kanahuange. Genep parapah gandom musti impahayak dengan parapah telo liter undus saitun.

⁸Amon oloh panguasa je marentah handak sombayang intu Humang-Ku, ie musti tame mahalau kamar hai, tuntang buli mahalau jalan jete kea.

⁹Kabalikae, amon hong kare andau hai rayat dumah sombayang akan TUHAN, maka ewen je tame mahalau lawang utara, pambulie musti mahalau lawang salatan limbah ewen jari sombayang. Tuntang ewen je tame mahalau lawang salatan, pambulie musti mahalau lawang utara. Kare oloh ingahana buli mahalau jalan je ihalau metoh tame; ewen musti buli mahalau lawang je intu dipah silae.

¹⁰Oloh panguasa je marentah musti tame Human TUHAN haya-hayak dengan rayat tuntang hong pambulie kea musti haya-hayak kea.

¹¹Intu kare andau pesta, hayak dengan sapi hatue tuntang tabiri hatue musti iluput gandom 17,5 liter, tuntang hayak dengan genep anak tabiri, tumon kare kanahuang oloh je sombayang. Genep parapah gandom musti impahayak dengan parapah telo liter undus saitun.

¹²Amon oloh panguasa je marentah handak manenga parapah tumon kahias ateie akan TUHAN, aloh parapah je ingehu atawa parapah hapa badamai, maka lawang hila timor je manintu akan parantaran huang musti imbuka akae. Ie musti maluput parapah te dengan cara je sama kilau je ilaluse hong andau Sabat. Tapi sana ie buli, lawang te musti inutup tinai.”

¹³TUHAN hamauh, “Genep andau sining hanjewu, ije kongan anak tabiri je ije nyelo umure tuntang je tinduh musti iluput akan parapah je ingehu akan TUHAN.

¹⁴Beken bara te, sining hanjewu musti iluput kea due kilogram gandom tuntang ije liter undus saitun akan ewoi gandom te. Jete parapah gandom je genep andau iluput akan TUHAN; atoran te ilalus sampai katatahie.

¹⁵Genep hanjewu, musti harajur iluput akan TUHAN: ije kongan anak tabiri, parapah gandom tuntang undus saitun.”

¹⁶TUHAN Ije Pangkahai manenga parentah, Koae, “Amon oloh panguasa je marentah je manenga belahe bara petak pusakae akan ije anak hatue ayue, petak te jadi ayun anak hatue te tuntang jete jadi ramon pusaka akan keluargae.

¹⁷ Tapi amon oloh panguasa je marentah te manenga belahe bara petak pusakae akan ije biti bara reware, petak te akan haluli buli akan oloh panguasa je marentah te hong Nyelo Mahalalian.[98] Petak te ayue tuntang baya ie tuntang kare anak hatue ayue bewei je tau tempon petak te palus katatahie.

¹⁸Oloh panguasa je marentah te dia tau manduan aloh isut bara ramo pusaka ain rayat. Baya petak ayue kabuat ih je tau inenga akan kare anake mangat jaton ije biti bara ungkup-Ku tau imisah bara taloh je puna ie tempoe.”

¹⁹Limbah oloh hatue te mimbit aku mahalau bauntonggang intu balikat lawang, akan kare kamar barasih je manaharep akan hila utara. Kare kamar te inyadia akan kare imam. Oloh hatue te maninjok kamar intu tapakan hila barat,

²⁰tuntang hamauh, “Hong eka toh kare imam musti maluntoh parapah ampun dosa tuntang parapah tewus kasalan hayak manyehei parapah gandom, uka aloh isut bara parapah je barasih te dia iimbit akan parantaran luar awi tau mawi calaka akan rayat.”[99]

²¹Limbah te aku imbite akan parantaran luar tuntang imparahae akangku iete intu epa-epat putinge, gagenep putinge aton parantaran je labih korik, kapanjange 20 meter tuntang kabukae 15 meter.

²³Genep parantaran te ingaliling awi dinding batu, tuntang intu dinding te aton kare tungku.

²⁴Koan oloh hatue te dengangku, “Jetoh kare dapur eka kare ayang Human TUHAN malontoh kare parapah rayat.”