Read Ngaju ESEKHIEL 47 Bible Online

ESEKHIEL 47 - Ngaju bible

ESEKHIEL 47

¹ Oloh hatue te mimbit aku haluli akan bauntonggang tame Human TUHAN. Gitangku danum mahasor bara penda bauntonggang te akan hila timor, sama kilau Human TUHAN kea manaharep akan hila timor. Danum te mahasor bara penda bauntonggang Human TUHAN hila salatan mahalau balikat hila salatan bara mesbeh.

²Limbah te oloh hatue te mimbit aku balua mahalau lawang utara tuntang mangagalan aku akan lawang timor. Sungei korik te mahasor bara balikat hila salatan lawang te.

³Sambil mukur mahapan sukah je hapa mukur te, oloh hatue te mimbit aku manyaroroi dehes sungei te akan timor sampai 500 meter kakejaue, palus manyoho aku dimpah. Intu eka te danume baya sampai bukulaling kandaleme.

⁴Limbah te ie mukur 500 meter tinai, tuntang intu hete danume sampai utut. Ie mukur 500 meter tinai, tuntang danume sampai kahang.

⁵Sinde tinai ie mukur 500 meter kakejaue, tuntang intu hete danume lalau handalem, dia olih dimpah hapan pai. Amon oloh handak dimpah ie musti hanangoi.

⁶Palus koan oloh te dengangku, “O anak olon, tampayah jetoh, nantuani taloh handiai te bua-buah.” Limbah te ie mimbit aku haluli manyaroroi sungei,

⁷tuntang aku mite je intu kadadue saran sungei te are toto batang kayu.

⁸Ie hamauh dengangku, “Sungei toh mahasor akan hila timor mahalau lewu toh tuntang mahalau Janah Sungei Yordan manintu akan Tasik Matei. Amon danume sampai akan huang Tasik Matei, palus tasik je bakahing te inggantie dengan danum batawah.

⁹Akan kueh bewei sungei te mahasor, intu hete kea akan aton uras macam lauk tuntang meto beken. Danum Tasik Matei akan iawie jadi danum batawah, tuntang akan kueh bewei danum te mahasor intu hete akan aton taloh belom.

¹⁰Bara kare tahasak danum hong En-Gedi sampai kare tahasak danum hong En-Eglaim, intu kare saran danume akan rami dengan kare oloh palauk je mekei jala ain ewen intu hete. Uras macam lauk akan aton intu huang danum te, kilau je aton intu Tasik Bentok.

¹¹Tapi danum intu kare loau tuntang kare napo hapus saran danum te dia akan batawah, malengkan tetep kilau eka uyah.

¹² Hapus kadadue saran sungei te tumbo sepsimpan batang bua. Dawen batang bua te dia puji balayu tuntang kare buae dia puji lepah. Kare batang bua te akan mahasil kare bua je taheta genep bulan, awi danum je mambisae mahasor bara Human TUHAN. Kare buae jadi panginan tuntang kare dawee baguna akan indu tatamba.”

¹³TUHAN Ije Pangkahai hamauh, “Jetoh kare helat petak je handak imbagi-bagi akan due walas suku Israel. Suku Yosep manarima due kabagi.[100]

¹⁴Aku jari sumpah je petak te akan inenga-Ku akan tato hiang keton. Awi te, duan petak te tuntang bagi rata akan sama arep keton.

¹⁵Helat intu hila utara inampara bara Tasik Bentok manintu akan timor sampai lewu Hetlon, manintu Hamat, palus akan lewu Sedad,

¹⁶akan Berota tuntang Sibraim (kare lewu te aton helang lewu Damaskus tuntang lewu Hamat), limbah te lewu Hasar-Enan, intu helat dengan lewu Hauran.

¹⁷Jadi helat silan hila utara inampara bara Tasik Bentok sampai akan timor, akan lewu Hasar-Enan; awi te tanah Damaskus tuntang Hamat aton intu silan hila utara helat te.

¹⁸Helat intu silan hila timor manintu akan salatan, bara ije eka helang daerah Damaskus tuntang daerah Hauran. Jadi Sungei Yordan kilau helat tanah Israel intu silan hila barat tuntang Gilead intu silan hila timor, sampai akan Tamar[101] intu saran Tasik Matei.

¹⁹Helat intu hila salatan manintu akan barat daya, bara Tamar akan tahasak danum Kades-Meriba, palus akan barat laut manyaroroi hapus helat dengan Misir sampai akan Tasik Bentok.

²⁰Helat intu hila barat iete Tasik Bentok, palus manintu akan hila utara akan ije eka intu silan hila barat jalan tame akan Hamat.

²¹Mbagi tanah te akan sama arep keton, manumon kare suku Israel;

²²tuntang petak te ayun keton sampai katatahie. Kare oloh bangsa beken je manetep intu marak keton, tuntang aton anak je inakan intu hete, musti kea dinon bagi bara tanah te. Ewen musti ianggap kilau oloh Israel, tuntang ewen musti omba inenong uka mandino petak katika malalus gawi mambagi petak marak kare suku bangsa Israel.

²³Genep oloh bangsa beken je melai marak keton inenga petak hayak dengan suku oloh Israel intu kueh ie melai. Aku, TUHAN Ije Pangkahai jari hakotak.”