Read Ngaju ESEKHIEL 48 Bible Online

ESEKHIEL 48 - Ngaju bible

ESEKHIEL 48

¹Helat petak intu silan hila utara manintu akan timor, nampara bara Tasik Bentok manintu lewu Hetlon, jalan tame akan Hamat, lewu Hasar-Enan, sampai akan helat dengan lewu Damaskus tuntang lewu Hamat. Genep suku musti uras mandino ije kabagi bara petak je hambirang bara helat timor manintu akan barat sampai Tasik Bentok, dengan girir kalotoh bara utara akan salatan: Dan Aser Naptali Manase Epraim Ruben Yuda

⁸Bagin petak je beken bara jete musti imisah awi tantai ihapan akan taloh beken. Kapanjange 12,5 kilometer bara helat utara sampai akan salatan. Kare helat hila timor tuntang hila barat sama kapanjange dengan kare bagi je inenga akan kare suku Israel. Human TUHAN akan impendeng intu bagin jete.

⁹Aton bara bagin petak te je tantai ingabeken akan TUHAN, iete ije kalambar petak intu hila bentok, kapanjange 12,5 kilometer tuntang kabukae 10 kilometer.[102]

¹⁰Intu hila bentok petak te akan impendeng Human TUHAN. Kare imam musti mandino bagi bara eka ije barasih te. Bagin ewen iete 12,5 kilometer bara saran hila timor akan barat, tuntang lime kilometer bara saran hila utara akan salatan.

¹¹Eka je imisah te akan jadi bagin kare imam turonan Sadok. Ewen jari bagawi akan TUHAN dengan baketep tuntang dia kilau oloh Lewi je beken je sama sukue dengan ewen, je omba mawi dosa hayak kare oloh Israel je beken.

¹²Tagal te akan turonan Sadok te musti inenga petak je tantai akan ewen, tuntang ewen kea mandino petak je akan inenga akan oloh Lewi. Petak je ingabeken tantai akan ewen te barasih haliai.

¹³Petak kare oloh Lewi te kapanjange 12,5 kilometer bara timor akan barat, tuntang kabukae lime kilometer bara utara akan salatan tuntang habambai dengan petak kare imam.

¹⁴Aloh ije gawang bara petak te dia tau ewen manjuale atawa manakirie; bagin je paling bahalap bara tanah Israel dia tau bindah akan lengen oloh beken, awi petak te jari ingabeken tantai akan TUHAN tuntang jadi Ie tempoe.

¹⁵Intu hila salatan bara petak je mambatang te, magon aton tisae je kapanjange 12,5 kilometer, tuntang kabukae due satengah kilometer. Eka te dia barasih tuntang tau ihapan eka rayat melai tuntang akan padang oru. Intu hila bentoke musti imangun ije lewu.

¹⁶Lewu te musti sagi epat pangue, genep sarae ukurae due saperepat kilometer.

¹⁷Hakaliling hapus lewu te musti petak buang je kabukae 125 meter.

¹⁸Intu hila timor tuntang barat lewu te aton petak buang je gagenepe ukurae lime kali due satengah kilometer. Kadadue petak buang te musti ihapan akan tana awi oloh lewu te.

¹⁹Kare oloh bara bangsa Israel je melai lewu te tau manguan petak te.

²⁰Jadi hapus eka te tamput petak je barasih tuntang petak akan lewu, sagi epat pangue je ukurae 12,5 kilometer intu genep lapake.

²¹Petak intu silan hila barat tuntang timor bara eka barasih je inyadia akan Human TUHAN, kare imam, oloh Lewi tuntang lewu te, iete akan oloh panguasa je marentah. Intu silan hila timor petak te hambirang sampai helat hila timor, tuntang intu silan hila barat sampai akan Tasik Bentok, tuntang ekae intu helang tanah Yuda dengan tanah Benyamin.

²³Petak je aton intu hila salatan bara eka barasih te, iete akan kare suku je beken. Palus petak te nampara bara helat hila timor akan barat sampai Tasik Bentok, tuntang imbagi manumon gilire inyusun bara utara akan salatan: Benyamin Simeon Isaskhar Sebulon Gad

²⁸Intu hila salatan tanah Gad aton helat je manampara bara barat daya Tamar mahalau tahasak danum Kades-Meriba, palus akan barat laut manyaroroi hapus helat dengan Misir sampai akan Tasik Bentok.

²⁹TUHAN Ije Pangkahai hamauh, “Kalote petak te musti imbagi-bagi akan kare suku bangsa Israel.”

³⁰ Bauntonggang tame akan lewu Yerusalem urase aton due walas. Kaepa-epat dindinge uras ukurae due saperepat kilometer, tuntang aton telo lawang. Genep lawang inggare manumon aran ije bara suku Israel. Kare lawang intu utara inggare Ruben, Yuda tuntang Lewi; kare lawang intu dinding timor inggare Yosep, Benyamin, tuntang Dan; je aton intu dinding salatan aton kare aran Simeon, Isaskhar tuntang Sebulon; tinai je intu dinding barat inggare Gad, Aser, tuntang Naptali.

³⁵Hapus dinding te kapanjange jalatien kilometer. Tuntang nampara katika toh oloh manggare lewu te: “TUHAN ATON INTU HETE!”