Read Ngaju ESEKHIEL 5 Bible Online

ESEKHIEL 5 - Ngaju bible

ESEKHIEL 5

¹TUHAN hamauh, “O anak olon, duan padang je banyihi tuntang keleh mahapan jete ikau manggundul balau takolokm tuntang janggutm. Limbah te nimbang balau te intu dacing palus mbagi akan telo kabagi.

²Sapertelo imapuim intu bentok lewu te limbah kapong terai. Sapertelo tinai inejepm hapan padangm sambil mangaliling lewu te. Tuntang sapertelo je tisae inaworm akan hunjun, palus Aku manggoange hapan padang-Ku.

³Pelai isut bara balau te tuntang mungkus intu lipet jubahm.

⁴Limbah te duan isut tinai bara balau te, jakah akan huang apui, tuntang nalua bakehu. Bara hete apui akan tayap akan hapus bangsa Israel.”

⁵TUHAN Ije Pangkahai hamauh, “Ite, toh Yerusalem. Lewu toh iandak intu bentok kalunen, dengan kare karajaan beken hakalilinge.

⁶Tapi Yerusalem jari manolak parentah-Ku tuntang ampie labih papa bara kare bangsa beken, labih dia manumon haream bara kare karajaan hakalilinge. Yerusalem malanggar kare atoran aing-Ku tuntang dia maku manumon kare parentah-Ku.”

⁷TUHAN Ije Pangkahai hamauh, “O Yerusalem, hining! Ikau dia manumon kare parentah-Ku tuntang kare atoran aing-Ku; ikau labih badungil bara kare bangsa beken hakalilingm; ikau jari omba hadat kare bangsa te.

⁸Palus Aku, TUHAN Ije Pangkahai, mansanan, je Aku toh musohm. Ikau akan ihukum-Ku intu taharep kare bangsa beken.

⁹Awi kare gawim je inyingi-Ku, kare oloh lewum ihukum-Ku tumon kabehat je dia puji iawi-Ku tuntang dia akan iawi-Ku tinai.

¹⁰ Oloh bakas akan kuman anake kabuat tuntang anake akan kuman oloh bakas ayue. Kalote ewen akan ihukum awi-Ku, tuntang je magon belom akan inaburan awi-Ku akan hete-hete.

¹¹Aku Hatalla ije belom, TUHAN Ije Pangkahai, tuntang toh ie auh-Ku: Awi ikau jari mamapa Humang-Ku hapan kare gawim je papa tuntang bakajile-jilek, Aku akan mamparotek ikau tuntang dia aton ampun.

¹²Sapertelo bara kare oloh lewum akan matei awi panyakit tuntang lau je mantakan lewu te. Sapertelo akan impatei hapan padang intu luar lewu, tuntang sapertelo tinai akan inaburan awi-Ku akan hete-hete tuntang akan inggoang-Ku hapan padang.

¹³Ikau akan mangkeme buah amok kasangit-Ku je paham sampai salepah angat huang-Ku. Limbah taloh handiai te uras manjadi, ikau akan percaya je Aku, TUHAN, jari hakotak dengam, awi Aku sangit tagal karisangm.

¹⁴Ikau akan jadi karak derep lewu bewei tuntang kare bangsa hakalilingm akan mahalalea ikau; genep oloh je mahalau akan mangejau arepe bara ikau.

¹⁵Amon Aku balait tuntang sangit hayak mahukum ikau, maka uras bangsa hakalilingm mangkarieng. Ewen akan mahalalea ikau tuntang bajilek mite ikau.

¹⁶Aku akan mampalingis taloh kinam tuntang manalua kare oloh lewum balau. Ewen akan mangkeme kapehen angat balau, kilau panah batajim je manembus tuntang mambinasa ikau.

¹⁷ Beken bara lau impadumah-Ku kea panyakit, katulas tuntang parang akan mampatei oloh lewum, tuntang kare meto basiak akan mampatei kare anak ewen. Aku, TUHAN, jari hakotak.”