Read Ngaju ESEKHIEL 6 Bible Online

ESEKHIEL 6 - Ngaju bible

ESEKHIEL 6

¹TUHAN hamauh dengang-Ku,

²“O anak olon, tampayah kare bukit gantong Israel, tuntang nyampai peteh-Ku tahiu hukuman akan ewen.

³Soho kare bukit, kare lungkoh, kare ruak sungei tuntang kare janah manyeneh auh bara Aku, TUHAN Ije Pangkahai. Toto, Aku akan mangirim padang hapa marusak kare eka manyembah hampatong dewa.

⁴Kare mesbeh akan inderep tuntang kare eka parapen ewen akan imusit. Uras oloh intu hete akan impatei intu baun hampatong dewae.

⁵Aku akan mawi kare hantun oloh Israel hakalampah; tuntang kare tulang ewen akan inawor-Ku hakaliling kare mesbeh te.

⁶Aku akan mampalomos kare lewun Israel, uras mesbeh tuntang hampatong dewae rotek ramok, eka parapen ewen panting jakah, tuntang uras taloh je inampa ewen akan nihau.

⁷Intu hete-hete aton oloh buah patei, tuntang ewen je salamat akan katawan je Aku toh TUHAN.

⁸Isut biti bara ewen akan iliwus-Ku bara pampatei te tapi ewen akan inaburan marak kare bangsa;

⁹intu hete ewen belom hong eka tawanan palus ewen akan mingat Aku hayak harati je Aku mahukum tuntang manawah ewen[9] awi atei ewen dia baketep dengang-Ku. Ewen jari malihi Aku tuntang mintih hampatong dewa indu ganting-Ku. Palus ewen akan bajilek dengan arep ewen kabuat tagal kare kapapa je jari ilalus ewen.

¹⁰Ewen akan katawan je Aku toh TUHAN tuntang uras pampingat-Ku dia baya hapa mampikeh ngahus bewei.”

¹¹TUHAN Ije Pangkahai hamauh, “Keleh kapehe atei! Keleh manangis! Keleh manatum tagal kare kapapa je jari ilalus bangsa Israel. Ewen akan matei awi parang, lau tuntang panyakit.

¹²Uras ewen akan mangkeme amok kasangit-Ku. Kareh oloh je kejau intu eka tawanan akan haban palus matei; oloh je tokep akan matei hong parang, tuntang tisae akan matei balau.

¹³Kare hantu akan hakalampah helat kare hampatong dewa tuntang hakaliling kare mesbeh, tinai intu genep bukit je gantong, intu genep tantan bukit, intu penda genep batang kayu je bajewong tuntang intu gagenep kayu hai; pandak auh, hong kueh bewei ewen mamapui parapah akan hampatong dewan ewen. Maka uras oloh katawan je Aku toh TUHAN.

¹⁴Yoh, Aku akan mantajok lengeng-Ku tuntang mamparotek lewun ewen sampai jadi tunis benyem, nampara bara padang pasir hila salatan sampai Ribla intu utara. Bara kare eka je ielai oloh Israel, ije mahin jaton oloh je inyalamat. Maka kakare oloh akan katawan je Aku toh TUHAN.”