Read Ngaju ESEKHIEL 7 Bible Online

ESEKHIEL 7 - Ngaju bible

ESEKHIEL 7

¹TUHAN hamauh dengang-Ku,

²“O anak olon, Aku, TUHAN Ije Pangkahai, handak mansanan taloh toh akan tanah Israel: Jetoh kahapus saritan hapus tanah toh.”

³TUHAN hamauh, “O Israel, toh jari sampai kajariam. Ikau akan mangkeme kasangit-Ku. Ikau ihukum-Ku tumon gawim je papa.

⁴Aku dia akan masi tuntang mampun ikau. Aku akan mahukum ikau manumon uras kare kapapa je jari iawim. Maka ikau katawan je Aku toh TUHAN.”

⁵Jetoh je insanan TUHAN Ije Pangkahai akan bangsa Israel, “Calaka bewe-bewei akan mantakan ikau.

⁶Toh taloh handiai uras jari hapus. Jetoh kajariam belom. Jaton kaharap tinai akam.

⁷Toh uras jari hapus akam, o bangsa je melai intu tanah toh. Toh jaton tinai kare pesta intu kare mesbeh hunjun kare bukit. Je aton baya kaderoh[10] bewei.

⁸Dia tahi tinai ikau akan mangkeme kasangit-Ku je paham hai. Ikau ihukum-Ku tumon gawim. Aku akan mambaleh uras kare gawim je papa.

⁹Aku dia akan masi tuntang mampun ikau. Aku akan mahukum ikau tumon kare kapapa je jari iawim. Maka katawam je Aku toh TUHAN tuntang Aku je mahukum ikau.”

¹⁰Andau calaka akan bangsa Israel jari tokep. Kakaras sabak intu hete-hete. Kajoho mimbing kuasa.

¹¹Katulas mawi sabab labih are kapapa. Hapus panatau, kahai tuntang katamam ewen akan lepah lingis.

¹²Katikae bajeleng dumah, andaue jari tokep! Oloh je mamili tuntang je manjual jaton dinon ontong en-en, awi hukuman Hatalla akan mawi genep bitin oloh.

¹³Jaton oloh dagang je akan sampet mandino haluli taloh je jari injuale, awi kasangit Hatalla mawi eweh bewei. Oloh papa dia akan salamat.

¹⁴Tarompet mahiau tuntang uras oloh tata-tatap. Tapi jaton ije biti je haguet akan eka parang, awi kasangit Hatalla mawi uras oloh.

¹⁵Intu kare jalan lewu aton parang, intu kare huma aton panyakit sampar tuntang lau. Eweh bewei je aton intu luar lewu akan matei huang parang, tuntang je melai intu lewu akan buah panyakit tuntang lau.

¹⁶Belahe je olih liwus hadari akan kare bukit. Intu hete ewen akan kilau burong dara je iharak bara kare janah; urase akan manarahing awi kare dosan ewen.[11]

¹⁷Gagenep bitin oloh akan balemo lengee tuntang hagenjeh utute.

¹⁸Ewen akan hatapih kampil tuntang hapus bitie hagenjeh. Takolok ewen akan inggundul tuntang ewen impahawen.

¹⁹Amas tuntang perak akan inganan ewen kilau rotik, awi hong andau TUHAN manusoh kasangit Aie, amas tuntang perak te dia olih manyalamat ewen, tapi manamean ewen haream akan huang dosa. Ewen dia tau mahapae hapa mameda belaie atawa akan manyoang kanain ewen.

²⁰Bihin ewen rajin dengan intan ewen je bahalap; tapi awi ewen mahapae akan manampa hampatong dewa je papa, TUHAN mawi ramon ewen te jadi taloh je bakaike-ikeh.

²¹TUHAN hamauh dengan bangsa Israel, “Aku akan manalua kare oloh bangsa beken marampok keton. Kare oloh papa akan marampas ramon keton tuntang mamapae.

²²Aku dia akan mandohop amon humang-Ku irusak tuntang imapa awi kare parampok.

²³Hapus tanah uras buah kaderoh;[12] intu hete-hete aton oloh impatei tuntang katulas paham toto.

²⁴Kare bangsa je paling mamut akan impadumah-Ku uka melai huang kare human keton. Kare oloh menteng ayun keton akan mikeh amon kare bangsa te inalua awi-Ku marusak kare eka keton sombayang.

²⁵Ewen buah kapehen atei tuntang nihau kaharape, palus manggau kadamai, tapi dia ewen sondaue.

²⁶Calaka tuntang kabar papa akan dumah raju-rajur. Keton akan balaku uka kare nabi nahuang manujum, tapi ewen dia tau. Kare imam kea dia aton taloh en-en je akan iajar akan ungkup, tuntang kare pamimpin jari lepah nasehate.

²⁷Raja akan manangis, anake nihau kaharape tuntang rayat akan hagenjeh mikeh. Aku akan mahukum keton tumon kare gawin keton tuntang mamutus keton kilau keton mamutus oloh beken. Maka palus keton katawan je Aku toh puna TUHAN.”