Read Ngaju ESEKHIEL 8 Bible Online

ESEKHIEL 8 - Ngaju bible

ESEKHIEL 8

¹Hong tanggal lime bulan jahawen hong nyelo kajahawen bara tamparan ikei melai intu eka tawanan, kare pamimpin ain oloh tawanan suku Yuda dumah akan humang-Ku tuntang mondo-mondok dengang-Ku. Salenga kuasan TUHAN Ije Pangkahai manguasa aku.

² Aku manampayah akan hunjun tuntang mite taloh je kilau olon. Bara kahange akan penda ie gitan kilau apui, tuntang bara kahange akan hunjun ie malinyau kilau tambaga je inggosok.

³Ie moloh taloh je kilau lenge, palus manyingkap balauku. Limbah te hong paiteku, aku inggatang gantong akan langit awi Roh Hatalla tuntang imbit akan Human TUHAN hong Yerusalem, akan bauntonggang tame parantaran huang je hila utara. Intu hete aton hampatong dewa je jari mukei kasangit Hatalla.

⁴ Palus aku mite kalawa je manyirau je mananda pandumah Hatallan Israel, kilau je gitangku metoh aku aton intu sungei Kebar.

⁵Hatalla hamauh dengangku, “O anak olon, tampayah akan hila utara.” Aku manumon, tuntang intu balikat mesbeh tokep jalan tame, gitangku hampatong dewa je jari mukei kasangit Hatalla te.

⁶Hatalla hakotak dengangku, “O anak olon, gitam taloh je manjadi? Ite kare gawi papa je ilalus awi oloh Israel, je mangejau Aku bara humang-Ku! Kantoh, Aku akan mamparahan akam kare taloh je labih papa hindai.”

⁷Palus Ie mimbit aku akan bauntonggang tame parantaran luar tuntang imparahan Awie ije rumbak intu dinding.

⁸Koan Hatalla, “O anak olon, pahai rumbak toh.” Limbah aku malaluse te gitangku ije bauntonggang.

⁹Koae dengangku, “Tame tuntang ite kare gawi papa je bakajile-jilek je ilalus ewen intu hete.”

¹⁰Aku palus tame tuntang mitee. Intu kare dinding kamar te inggambar kare macam handipe tuntang kare meto pali[13] je beken, tuntang kea kare macam gambar hampatong dewa je inara awi kare oloh Israel.

¹¹Uju puluh biti pamimpin bangsa Israel aton intu hete, tuntang kea Yaasanya anak Sapan. Genep bitin ewen mimbing ije dadupan garo je mampalua asep.

¹²Hatalla hamauh dengangku, “O anak olon, gitam taloh je ilalus awi kare pamimpin oloh Israel suni-suni? Ewen sombayang intu huang kamar je kontep hampatong dewa te haranan koan ewen Aku jari malihi tanah toh tuntang dia mite gawin ewen.”

¹³Palus TUHAN hamauh dengangku, “Ikau akan mite ewen malalus taloh je labih bakajile-jilek tinai.”

¹⁴Palus imbit Awie aku akan lawang utara Human TUHAN. Ie mamparahan akangku kare oloh bawi je manatum Dewa Tamus.[14]

¹⁵TUHAN misek dengangku, “O anak olon, gitam jete? Magon are tinai je labih papa.”

¹⁶Ie mimbit aku akan parantaran huang intu Human TUHAN. Tokep bauntonggang tame akan kamar ije barasih, helat mesbeh dengan jalan, aton due puluh lime biti oloh. Ewen manalikut kamar ije barasih, tuntang sontop akan hila timor manyembah matanandau lembut.

¹⁷TUHAN hamauh dengangku, “O anak olon, gitam te? Kare oloh Yehudi toh dia sanang amon baya malalus taloh je bakajile-jilek tuntang malalus taloh je jaton mamparahan asi hong hapus tanah toh. Ewen haream malalus uras taloh te intu hetoh, intu huang humang-Ku tuntang mawi Aku labih sangit tinai. Ite, kilen ampie ewen manawah Aku hapan cara je paling eka kajilek[15] toh!

¹⁸Ewen akan mangkeme kasangit-Ku je paham! Aku dia akan mampun ewen. Aloh ewen mambo auh lakudoa akang-Ku hapan sakalepah kahain auhe, Aku dia handak mahininge!”