Read Ngaju ESEKHIEL 9 Bible Online

ESEKHIEL 9 - Ngaju bible

ESEKHIEL 9

¹Limbah te hiningku Hatalla mantehau, “Kantoh o kare oloh je akan malalus hukuman je iawi-Ku akan lewu toh. Imbit kare pakakas parangm.”

²Salenga lembut jahawen biti oloh bara hila luar lawang utara Human TUHAN, tuntang genep bitie mimbit pakakas parang. Hayak dengan ewen aton oloh hapakaian lena je mimbit taloh hapan manyurat. Ewen tame tuntang mendeng tokep mesbeh tambaga.

³Palus aton kalawa je manyirau je mananda pandumah Hatallan Israel, mamancar bara kare kerub,[16] palus bindah bara ekae solake te akan bauntonggang tame Human TUHAN. Balalu TUHAN mantehau oloh je hapakaian linen te, Koae,

⁴ “Lius kumbang akan hapus lewu Yerusalem tuntang nenga tanda intu lingkau genep bitin oloh je mangkeme kapehen atei tagal uras gawi papa je ilalus intu lewu te.”

⁵Aku mahining Hatalla hamauh dengan kare oloh je beken, “Nuntut ie mangumbang akan hapus lewu tuntang patei genep oloh je sondau keton tuntang ela masi ie.

⁶Patei uras oloh hatue tuntang bawi, bakas tuntang tabela, oloh bakas tuntang anak oloh. Tapi ela manigong samasinde oloh je aton tanda intu lingkaue. Nampara bara hetoh, bara humang-Ku toh.” Palus ewen manampara gawin ewen mampatei kare pamimpin oloh Israel je kanjeran mendeng intu Human TUHAN.

⁷Hatalla hamauh dengan ewen, “Mapa humang-Ku toh! Ngontep parantarae hapan kare hantu. Has, nampara!” Palus ewen manampara mampatei kare oloh intu huang lewu.[17]

⁸Katahin pampatei te ilalus, aku aton intu hete kabuatku. Aku sontop tuntang mantehau, “TUHAN Ije Pangkahai, en kalote kasangit Aim dengan Yerusalem sampai Ikau handak mampatei uras oloh je magon aton intu Israel toh?”

⁹Hatalla tombah, “Kare oloh Israel tuntang Yuda jari mawi dosa je hai toto. Ewen mampatei oloh huang hete-hete hong kare eka, tuntang Yerusalem imapa hapan kadarhaka. Ewen hamauh, tahiu Aku, TUHAN jari malihi tanah toh sampai dia olih mite taloh gawin ewen.

¹⁰Aku dia akan masi ewen. Aku akan mawi ewen kilau ewen kea mawi oloh beken.”

¹¹Limbah te oloh je hapakaian lena te haluli tuntang mansanan akan TUHAN, koae, “Kakare parentah TUHAN jari ilalus.”