Read Ngaju DANIEL 10 Bible Online

DANIEL 10 - Ngaju bible

DANIEL 10

¹Intu nyelo katelo metoh Raja Kores marentah Persia, ije peteh insanan akan Daniel alias Beltsasar. Peteh te toto, tapi bahali toto maharatie.[18] Metoh mancoba maharatie, Daniel manarima pansanan tahiu riman peteh te intu ije paite.

²Metoh te aku kanjeran batapa telo minggo katahie.

³Katahin te aku dia kuman panginan je mangat atawa isin meto; aku dia mihop anggor, tuntang dia kea manyarak balau.

⁴Hong tanggal due puluh epat bulan je solake nyelo te, aku metoh mendeng intu saran Sungei Tigris je hai te.

⁵ Aku mananggera, palus gitangku ije biti je mahapan pakaian bara lena tuntang panding bara amas tulen.

⁶Bitie hapancar sama kilau permata, baue balawa kilau kalawan kilat, tuntang matae hanyala kilau apui. Penange tuntang paie mangilat kilau tambaga je inggosok, tuntang auh tarahininge kilau auh oloh are.

⁷Baya aku kabuat je mite paite te. Kare oloh je hayak dengangku dia mitee, tapi ewen mikeh sampai hadari manyahokan.

⁸Aku ilihi intu hete kabuat, sambil manampayah paite je manarewen te. Aku palus halelek tuntang baungku balalu kalas mucat.

⁹Metoh aku mahining auhe, aku palus tujah sampai aku tapahingkep intu petak.

¹⁰Limbah te aton lenge manigong aku tuntang mawi aku misik hayak mendeng hapan lenge tuntang ututku.

¹¹Malekat te hamauh dengangku, “Daniel, ikau inyinta awi Hatalla. Harikas tuntang mendeng palus seneh auhku toh bua-buah. Aku toh jari inyoho manalih ikau.” Metoh ie hamauh te, aku palus mendeng hayak hagenjeh.

¹²Balalu koae dengangku, “Daniel, ela mikeh, Hatalla jari mahining lakudoam bara andau je solake ikau manukas akan mamparandah arepm uka jadi pintar harati. Aku jari dumah kilau panombah akan lakudoam.

¹³ Malekat kalindong karajaan Persia malawan aku katahin due puluh ije andau. Palus Mikhael, ije bara kare kapalan malekat, dumah mandohop aku. Ilihiku ie intu kanih, hong Persia.

¹⁴Aku dumah uka mawi ikau tau maharati narai je akan manjadi taharep bangsam. Paite toh tahiu andau je naharep.

¹⁵Metoh ie mansanan auh te, aku sontop tuntang dia olih hakotak.

¹⁶Limbah te malekat je kilau olon te manjuju lengee tuntang manigong biwihku. Aku hamauh dengae, “Tuan, paite toh mawi aku paham mikeh sampai aku halelek.

¹⁷Aku kilau ije rewar intu taharep tempoe. Kilen ampie aku tau hakotak dengam? Kaabasku lepah tuntang tahasengku seke.”

¹⁸Palus sinde tinai ie manigong aku, palus kameangku kaabasku mandahang.

¹⁹Ie hamauh, “Hatalla sinta dengam, awi te ela bagalabah atawa mikeh, ayo, keleh abas!” Metoh ie mansanan auh te, aku mangkeme labih abas tinai tuntang hamauh, “Keleh hakotak, Tuan. Tuan jari mandahang kaabasku.”

²⁰Palus ie tombah, “Katawam mbuhen aku manalih ikau? Maksud aie iete uka mansanan akam taloh je tarasurat intu huang Buku Katoto. Toh aku haluli uka parang malawan malekat kalindong[19] Persia. Limbah te malekat kalindong Yunani akan dumah. Jaton je akan mandohop aku, baya Mikhael, malekat kalindong Israel, lewun ayum.