Read Ngaju DANIEL 3 Bible Online

DANIEL 3 - Ngaju bible

DANIEL 3

¹Hong sinde katika Raja Nebukadnesar manampa ije hampatong amas je kagantonge 27 meter tuntang kalombahe bilak 3 meter. Ie mampendenge intu janah Dura hong propinsi Babel.

²Limbah te raja marawei uras raja wilayah, kare gubernur, bupati, panasehat negara, bendahara, hakim, ahli hukum, tuntang uras pamimpin intu daerah uka manalih upacara maresmi hampatong je jari impendeng te.

³Limbah ewen uras dumah tuntang mendeng intu taharep hampatong te,

⁴ajudan raja palus mantehau hai auhe, “Kare pahari bara kare bangsa, suku tuntang basa. Hining parentah raja toh:

⁵Amon tarompet mahiau, inuntut auh suling, kacapi, rabab, gambus, sardam, tuntang kare pakakas musik je beken, kare pahari musti sontop manyembah hampatong amas je jari impendeng awi raja Nebukadnesar.

⁶Eweh je dia manumon parentah toh, balalu injakah akan apui pehon je nyalae ganda-gandang.”

⁷Sana mahining kare pakakas musik te impahiau, kare oloh bara hapus bangsa, suku tuntang basa, sontop tuntang manyembah hampatong amas te.

⁸Pire-pire biti oloh Babel mangguna gawie uka mawi calaka akan oloh Yehudi.

⁹Ewen hamauh dengan Raja Nebukadnesar, “Belom raja katatahie!

¹⁰Raja kabuat jari mampalua parentah iete sana kare pakakas musik impahiau, uras oloh sontop tuntang manyembah hampatong amas te,

¹¹tuntang eweh je dia manumon parentah te akan injakah akan apui pehon je nyalae ganda-gandang.

¹²Tapi pire-pire oloh Yehudi je jari inyarah awi Tuangku uka marentah propinsi Babel dia paduli parentah Tuangku te. Ewen te Sadrakh, Mesakh tuntang Abednego. Kare oloh te dia maku manara kare hatallan Tuangku tuntang dia manyembah hampatong amas je impendeng Tuangku.”

¹³Mahining auh te raja sangit toto palus manyoho uka katelo-telo biti oloh te iimbit manaharep ie.

¹⁴Raja misek ewen, “Sadrakh, Mesakh tuntang Abednego! En toto keton dia maku manyembah kare hatallangku tuntang dia kea maku sontop akan hampatong amas je jari impendeng te?

¹⁵En toh keton handak sontop manyembah hampatong te metoh musik mahiau? Amon keton dia maku, keton balalu injakah akan huang apui pehon je ganda-gandang. Tuntang dewa kueh je tau manyalamat keton bara kuasangku?”

¹⁶Sadrakh, Mesakh tuntang Abednego tombah, “Ikei dia handak mampabujur arep ikei.

¹⁷Amon Hatalla je inyembah ikei tau manyalamat ikei bara nyalan apui pehon je ganda-gandang te tuntang bara kuasan Tuangku, batantu Ie malaluse. [2]

¹⁸Tapi jaka Ie dia malaluse kea, keleh Tuangku katawan ikei dia handak manara dewan Tuangku tuntang dia kea manyembah hampatong amas je impendeng Tuangku te.”

¹⁹Palus kasangit Raja Nebukadnesar mangambuar dengan Sadrakh, Mesakh tuntang Abednego, sampai baue masak-maranga. Ie marentah mangat apui pehon te iawi uju tingkat labih balasot bara je bahut.

²⁰Palus ie manyoho pire-pire biti je paham abas bara tantarae akan manjarat Sadrakh, Mesakh tuntang Abednego, hayak manjakah ewen akan apui pehon je nyalae ganda-gandang te.

²¹Balalu katatelo biti oloh te imeteng dehen dengan kare pakayae iete kameja, jubah, tanggoi tuntang pakaian je beken, palus intarik akan apui pehon je nyalae ganda-gandang te.

²²Awi parentah raja te paham karas, apui pehon te jari imandok gawi toto sampai nyalan apui mawi kare oloh je manggatang Sadrakh, Mesakh tuntang Abednego manokep eka apui te matei bakehu.

²³Tumon te katetelo biti je imeteng dehen te manjato akan huang apui pehon je hanjala te.

²⁴Salenga Raja Nebukadnesar tarewen toto. Ie bajeleng mendeng tuntang mantehau kare pagawaie, “En dia itah endau mameteng telo biti tuntang mantarik ewen akan huang apui te?” Ewen tombah, “Puna toto, Tuangku.”

²⁵Tombah raja, “Tapi mbuhen gitangku epat biti tanjo-tanjong intu bentok apui te? Ewen dia imeteng tuntang dia samasinde buah taloh en-en. Tuntang je kaepat te ampie kilau dewa.”

²⁶Palus Nebukadnesar manokep bauntonggang eka apui te tuntang mantehau, “Sadrakh, Mesakh tuntang Abednego, kare rewar ain Hatalla Pangkahai! Keleh balua bara apui te!” Palus ewen balua.

²⁷Uras wakil raja, kare gubernur, bupati tuntang kare pagawai je beken mangaliling katatelo oloh te. Ewen mite ewen telo te samasinde dia buah apui. Balau ewen dia bakehu tuntang pakaian ewen dia kea, ewau asep mahin jaton intu ewen.

²⁸Palus raja hamauh, “Tara Hatalla je inyembah Sadrakh, Mesakh tuntang Abednego. Ie jari manyoho malekat Ayue akan manyalamat katatelo reware je percaya dengae. Ewen jari malanggar parentahku tuntang labih nahuang matei bara manyembah atawa manara dewa kueh bewei, baya Hatallan ewen kabuat.

²⁹Awi te aku marentah je genep biti bara bangsa, suku atawa bara kueh bewei, je hakotak manawah Hatalla je inyembah Sadrakh, Mesakh tuntang Abednego, akan inasang-raga tuntang humae inderep jadi toyok paramon huma je rusak. Awi jaton aton dewa je tau malalus taloh je jari ilalus Hatalla te.”

³⁰Limbah te raja mampandai pangkat Sadrakh, Mesakh tuntang Abednego, sampai ewen jadi kare pagawai gantong hong Babel.