Read Ngaju DANIEL 4 Bible Online

DANIEL 4 - Ngaju bible

DANIEL 4

¹Jetoh pansanan Nebukadnesar je ingirime akan kare oloh bara hapus bangsa, suku tuntang basa hong hapus kalunen:

²“Salamat akan keton! Aku handak manyarita tahiu taloh heran je jari ilalus Hatalla Pangkahai akangku.

³Lalehan kahain taloh kuasa je inampa Awie! Lalehan katamam taloh heran je ilalus Awie! Hatalla akan jadi raja sampai katatahie. Ie kuasa hapus jaman.”

⁴Aku melai sanang huang istanangku tuntang belom bara kalabien.

⁵Tapi sinde alem metoh aku batiroh, aku nupi tuntang mandino paite je paham mampikeh aku.

⁶Palus intehauku kare oloh pintar je aton hong Babel akan manarang akangku riman nupi te.

⁷Tapi metoh kare tukang manujum, tabit, kare oloh je are pangatawae, ahli bintang dumah tuntang inyarita awiku nupingku te akan ewen, jaton ije je tau manarang rimae.

⁸Kajariae dumah kea Daniel je inyewut kea Beltsasar kilau aran dewangku. Daniel ingontep awi roh kare dewa[3] je barasih. Inyaritaku nupingku akae kea, koangku,

⁹“O Beltsasar, kapalan kare oloh pintar, aku katawan je ikau ingontep awi roh kare dewa[4] je barasih, sampai jaton taloh basilim je basahokan bara ikau. Hining nupingku toh,[5] tuntang narang rimae.

¹⁰Metoh aku batiroh, gitangku ije batang kayu je belom intu bentok kalunen.

¹¹Batang kayu te gantong toto; batange hai tuntang dehen. Lawie sampai akan langit, sampai tau gitan awi uras oloh hong kalunen.

¹²Kare dawee bajewong tuntang buae labat toto, sukup indu kinan awi oloh hapus kalunen. Kare meto baliar menter penda kanjungee tuntang kare burong manyarangan intu kare edae. Tuntang hapus taloh belom tau kuman kare buae.

¹³Metoh aku mangumang paite te, gitangku ije biti malekat mohon bara sorga, je ampie barendeng hayak jaga-jaga.

¹⁴Hayak hai auhe ie hakotak, ‘Neweng batang kayu te tuntang netek kare edae, nduroh kare dawee tuntang nawor kare buae. Harak kare meto je menter intu pendae tuntang kare burong je manyarangan intu kare edae.

¹⁵Tapi nalua tunggule melai intu huang petak. Meteng dengan rantai sanaman tuntang tambaga palus lihi intu padang oru. Nauh ie imbinasa ambon, tuntang belom hayak kare meto tuntang kare taloh imbul.

¹⁶Keleh tirok kaoloe hobah jadi tirok meto katahin uju nyelo.

¹⁷Jete tukas ikei kare malekat je bajaga. Maksud ikei iete uka kare oloh hong kueh bewei mangaku, je Hatalla Pangkahai kuasa taharep karajaan olon tuntang karajaan te inenga akan eweh bewei je intihe, aloh akan oloh je paling jaton rimae!’

¹⁸O Beltsasar, jete nupingku. Toh sanan rimae akangku. Jaton ije bara oloh pintar je aton intu karajaangku tau mansanae akangku, tapi ikau tau, awi ikau ingontep dengan roh kare dewa[6] je barasih.”

¹⁹Mahining auh te, Daniel je inggare kea Beltsasar, tarewen tuntang hengan hanjulo. Palus aku, Raja Nebukadnesar hamauh dengae, “Beltsasar, ela ikau mikeh awi nupi tuntang rimae te.” Beltsasar tombah, “Tuangku, lalehan kahalape jaka kare taloh je inujum awi nupi te buah kare musoh Tuangku tuntang dia Tuangku.

²⁰Batang je gitan Tuangku te gantong toto, sampai lawie manepe langit, tuntang tau gitan awi uras oloh hong kalunen.

²¹Kare dawee bajewong tuntang kare buae labat sampai sukop akan mampakanan oloh hapus kalunen. Kare meto baliar menter penda kanjungee, tuntang kare burong manyarangan intu kare edae.

²²O Tuangku, ikau toh batang je gantong tuntang abas te. Kahain Tuangku mandahang sampai akan langit tuntang kuasan Tuangku tayap akan hapus kalunen.

²³Tuangku mite kea ije biti malekat mohon bara langit sambil hakotak, ‘Teweng batang toh tuntang impalingis, tapi nauh tunggule melai intu petak. Peteng dengan rantai sanaman tuntang tambaga tuntang lihi intu padang oru. Nauh ie imbinasa ambon tuntang belom hayak kare meto katahin uju nyelo.’

²⁴Tuangku, toh riman paite te, tuntang toh je inukas Hatalla Pangkahai tahiu Tuangku kabuat.

²⁵Tuangku kare iharak bara marak olon tuntang belom marak kare meto intu janah. Katahin uju nyelo Tuangku akan kuman oru kilau sapi tuntang batiroh intu petak talampas, sampai imbisa awi ambon. Limbah te Tuangku akan mangaku je Hatalla Pangkahai kuasa mahunjun karajaan olon, tuntang karajaan te inengae akan eweh bewei je intihe.

²⁶Kare malekat marentah uka tunggul batang kayu te inalua melai intu huang petak. Jete rimae Tuangku akan jadi raja tinai limbah Tuangku mangaku tahiu Hatalla je manguasa hapus kalunen.

²⁷Tagal te keleh Tuangku manumon nasehatku. Ela Tuangku badosa tinai, tapi lalus taloh je bahalap tuntang adil, tuntang keleh masi oloh je belom susah.[7] Tumon te Tuangku akan tetep sanang.”

²⁸Urase te manjadi akangku, Raja Nebukadnesar.

²⁹Due walas bulan limbah te, metoh aku tanjo-tanjong intu kabon kabungas intu tingkat hunjun istanangku hong Babel,

³⁰aku hamauh, “Item, lalehan katamame lewu Babel! Aku je mamangue jadi lewu hai eka raja marentah akan mansanan kaabas tuntang kuasangku, kagantong tuntang kahaingku!”

³¹Aku hindai lepah hakotak metoh tarahining auh bara langit, “Raja Nebukadnesar hining toh! Kuasam kilau raja jari induan bara ikau.

³²Ikau akan iharak bara marak olon, tuntang belom kilau kare meto intu janah. Katahin uju nyelo ikau akan kuman oru kilau sapi. Limbah te ikau mangaku je Hatalla Pangkahai kuasa mahunjun karajaan olon tuntang karajaan te inenga Awie akan eweh bewei je intih Awie.”

³³Katika te kea, kare auh te palus gitan manjadi. Aku, Nebukadnesar iharak bara marak olon tuntang kuman oru kilau sapi. Bitingku imbisa ambon, balauku jadi kapanjang bulun antang, tuntang silongku kapanjang silon burong.

³⁴Sana wayah uju nyelo te jari halau, aku mananggera akan langit, palus pangingat haluli. Palus inarewengku Hatalla Pangkahai. Impahaiku Ie je belom katatahie te. “Hatalla akan jadi raja katatahie. Ie kuasa sahapus jaman.

³⁵Kare bangsa hong kalunen jaton rimae. Hatalla manguasa malekat hong sorga tuntang oloh hong hunjun petak. Jaton oloh je tau malawan kahandak Ayue, jaton je bahanyi misek narai taloh je ilalus Awie.”

³⁶Metoh pangingatku haluli akangku, maka kahai, kagantong tuntang sewut karajaangku je basewut ilian akangku. Aku inyambut awi kare pagawai tuntang kare oloh hai aingku, tuntang aku ilian akan karajaangku, kahaingku hai haream bara je helo.

³⁷Maka toh aku, Nebukadnesar manara, mampagantong tuntang mampahai Raja Sorga. Uras gawin Aie bujur tuntang adil, tuntang Ie tau mamparandah oloh je bajoho!