Read Ngaju DANIEL 5 Bible Online

DANIEL 5 - Ngaju bible

DANIEL 5

¹Sinde andau Belsasar marawei sakoyan biti oloh hai akan manalih pesta je hai, tuntang mihop anggor.

²Metoh ewen miho-mihop, Belsasar marentah uka manduan kare mangkok amas tuntang perak, je jari irabut awi Nebukadnesar, bapae, bara Human TUHAN hong Yerusalem. Kahandak Belsasar iete uka kare oloh hai, kare sawae, kare gundike tuntang ie kabuat, mihop mahapan kare mangkok te.

³Balalu kare mangkok te iimbit akae, palus ewen uras mihop mahapan kare pakakas mihop te.

⁴Sambil mihop ewen manara-nara kare dewa je inampa bara amas, perak, tambaga, kayu tuntang batu.

⁵Salenga gitan lengen oloh je manyurat taloh intu dinding istana hong eka je paling balawa buah kalawan sumbo, sampai raja tau tarang mitee.

⁶Ie palus kalas toto tuntang paham mikeh, sampai utute hagenjeh.

⁷Hayak mangkariak ie balaku mangat kare ahli nujum, oloh pangaji tuntang kare ahli bintang intehau. Metoh ewen dumah raja hamauh, “Ewe-eweh je tau mambasa surat te tuntang mansanan rimae akangku, akan inengaku pakaian karajaan iete jubah ungu tuntang saling amas tanda oloh je ihormat. Beken bara te ie akan iangkatku jadi oloh kuasa nomor telo huang karajaangku.”

⁸Kare oloh pintar mingkang miar, tapi jaton je tau mambasa surat te atawa mansanan rimae akan raja.

⁹Raja Belsasar sasar kalas tuntang mikeh; kalote kea kare oloh hai ayue paham bingung.

¹⁰Mahining kare tangkariak raja tuntang kare oloh hai ain raja, indu raja tame akan kamar pesta. Palus ie hamauh, “Belom Tuangku katatahie! Keleh atei Tuangku salawah tuntang ela kalas.

¹¹Awi huang karajaan Tuangku aton ije biti oloh hatue je ingontep awi roh kare dewa[8] je barasih. Metoh jaman bapa Tuangku marentah, oloh te toto puna aton kapintar, kaharati tuntang pangatawan tahiu kapintar tuntang kaharati, je kilau pangatawan kare dewa. Bapam Raja Nebukadnesar jari mangkat ie kilau kapalan kare ahli nujum, oloh pangaji tuntang kare oloh ahli bintang.”

¹²Ie paham pintar tuntang harati hayak ahli hong manarang nupi, mansanan taloh basilim tuntang manombah kare paisek je bahali. Arae Daniel, tapi raja manggare ie Beltsasar. Tehau ie. Ie akan mansanan akan Tuangku riman surat toh.”

¹³Bajeleng Daniel iimbit manaharep raja. Palus raja misek ie, “En ikau Daniel, oloh Yehudi tawanan, je jari iunda awi apangku bara tanah Yuda?

¹⁴Hiningku ikau ingontep awi roh kare dewa je barasih, tuntang ikau aton kapintar, kaharati, tuntang pengatawan tahiu kapintar tuntang kaharati je malabien.

¹⁵Kare oloh pintar tuntang oloh pangaji jari mancoba mambasa surat toh tuntang mansanae akangku. Tapi ewen dia olih.

¹⁶Harue ih aku mahining je ikau tau mangatawan kare taloh basilim tuntang manombah kare paisek je bahali. Amon ikau tau mambasa surat toh tuntang mansanan rimae akangku, ikau akan inengaku pakaian karajaan iete jubah ungu tuntang saling amas tanda oloh je ihormat. Beken bara te ikau akan iangkatku jadi oloh kuasa je nomor telo huang karajaangku.”

¹⁷Daniel tombah, “Tuangku dia usah manenga kare panenga te akangku, tenga ih akan oloh beken. Aku akan mambasa surat te akan Tuangku tuntang mansanan rimae.

¹⁸Hatalla Pangkahai mawi Nebukadnesar Tuangku jadi raja pangkahai tuntang manenga akae kagantong tuntang aran je basewut.

¹⁹Ie paham hai, sampai kare oloh bara kakare bangsa, suku, tuntang basa, hagenjeh tuntang mikeh dengae. Amon ie nahuang mampatei oloh, impateie bewei oloh te. Ie mampagantong atawa mamparandah eweh bewei manumon kahandake.

²⁰Tapi metoh ie jari bajoho, badungil tuntang hapan kakaras, ie impanjato bara padadusan karajae sampai ie nihau kahaie.

²¹Ie iharak bara marak olon tuntang tiroke jadi kilau tirok meto. Ie belom dengan kalidai parak kayu, kuman oru kilau sapi, tuntang batiroh intu petak talampas sampai imbisa ambon. Kajariae ie mangaku je Hatalla Pangkahai kuasa mahunjun karajaan olon tuntang karajaan te inenga akan eweh bewei je intihe.

²²Tapi anake, iete Tuangku kabuat, dia maku mamparandah arep, aloh Tuangku katawan taloh handiaie te.

²³Tuangku mampagantong arep taharep TUHAN intu sorga tuntang bahanyi manyoho mimbit tame kare mangkok je jari irabut bara Human TUHAN. Palus Tuangku hayak kare oloh hai, kare sawae tuntang kare gundik Tuangku mihop bara kare mangkok te. Tuangku tara-tara dengan kare dewa je inampa bara amas, perak, tambaga, sanaman, batu tuntang kayu, kare dewa je dia tau mite atawa mahining atawa harati taloh en-en. Tuangku dia mahormat Hatalla je manukas pambelom tuntang pampatei Tuangku.

²⁴Jete bukue Hatalla manyoho lenge te akan manyurat peteh Aie.

²⁵Toh ie surate, ‘Ise, ise, inimbang, imbagi.’

²⁶Tuntang toh rimae: Ise, katahin Tuangku marentah jari ise awi Hatalla tuntang impahapuse;

²⁷inimbang, Tuangku jari inimbang tuntang gitan dia babehat;

²⁸imbagi, karajaan Tuangku imbagi tuntang inenga akan oloh Media tuntang Persia.”[9]

²⁹Balalu Belsasar marentah kare pagawai ayue uka mangkepan intu Daniel jubah ungu tuntang manyaling saling amas intu uyate. Palus ie mangkat Daniel jadi panguasa je katelo huang karajaae.

³⁰Hong alem te kea Belsasar raja Babel buah patei.