Read Ngaju DANIEL 7 Bible Online

DANIEL 7 - Ngaju bible

DANIEL 7

¹Sinde katika hong ije alem hong nyelo je solake Belsasar jadi raja intu Babel, aku, Daniel, nupi tuntang mandino paite. Nupi te incatetku tuntang narai ampie tahiu paite te inyarita kalotoh. Riwut paham dumah bara hete-hete tuntang mawi riwut barat intu tasik.

³ Limbah te epat kongan meto hai lembut bara huang danum, je ije beken bara ijee beken tinai.

⁴ Je solake ampie kilau singa, tapi ayue aton palapas burong garuda. Metoh aku mananturee salenga palapase pajawut balalu balekak; ie hagatang bara petak tuntang impendeng hong due pai kilau olon, palus inenga tirok olon.

⁵Meto je kadue ampie kilau bahuang. Ie mendeng hapan pai je likut, tuntang mimbit telo katetek tulang balawar helat kare kasingae. Hiningku auh hakotak dengae, “Ayo kinan isie sapire kanahuangm!”

⁶Metoh aku mananturee, lembut meto je beken. Ampie kilau hangkulih, tapi intu likute aton epat palapas burong, tuntang ie hatakolok epat. Ampie ie te kuasa.

⁷ Metoh aku mananturee, meto je kaepat lembut. Ie paham abas tuntang tamam hayak bakaike-ikeh, hapan kare kasingae je hai tuntang kilau katekang sanaman, ie mamparotek tuntang manegok taloh kinae, palus mahunje-manandik tisae. Beken ampie bara kare meto je helo ie hatandok sapuluh.

⁸ Metoh aku manampayah kare tandoke, salenga ije tandok beken lembut intu helate. Tandok te korik tapi tau manggian tuntang manjawut telo bara kare tandok je solake te. Tandok korik te aton matae kilau matan olon tuntang nyamae je mangamburau dengan kajohoe.

⁹ Metoh aku tetep mananture, pire-pire padadusan kanjerae iandak. Palus Ie je belom katatahie mondok hunjun ije bara kare padadusan te. Pakaiae tuntang balaue baputi lentah kilau kapas. Padadusae dengan kare rodae banyala-nyala awi kambuar apui.

¹⁰ Tuntang hasor apui manyambar bara padadusan te. Bakoyan oloh mandohop Ie, tuntang bajuta oloh mendeng intu taharep Ie. Limbah te inampa pangadilan, tuntang kare buku imbuka.

¹¹Metoh aku manampayahe, magon ih hiningku tandok korik te mangamburau dengan kajohoe. Limbah te meto je kaepat te impatei, tuntang hantue intarik akan apui sampai lilap.

¹²Kare meto je beken injawut kuasae, tapi ewen inyoho belom sampai katika je inukas.

¹³ Huang paiteku hamalem te, gitangku taloh je kilau olon. Ie dumah ingaliling baun andau palus haguet manalih Ie je belom katatahie tuntang insanan akae.

¹⁴ Ie inenga hormat tuntang kaabas kilau raja, sampai kare oloh hapus bangsa, suku tuntang basa manempo ie. Kuasae dehen katatahie, parentahe dia akan impalongkang.

¹⁵Kare paite je gitangku te mambingung tuntang mawi kikehku.[10]

¹⁶Palus inokepku ije bara je mendeng intu hete tuntang iisekku tahiu riman uras taloh te. Palus ie mansanae.

¹⁷Ie hamauh, “Epa-epat kongan meto hai te iete epat karajaan je akan lembut intu kalunen.

¹⁸ Tapi ungkup Hatalla Pangkahai akan manarima hak akan marentah tuntang marentah dehen sampai katatahie.”

¹⁹Limbah te aku handak katawan riman meto je kaepat te, je beken bara meto je beken; je ampie bakaike-ikeh tuntang mambinasa tuntang kuman kare taloh kinae dengan silo tambaga tuntang kasinga sanaman, hayak mahunje-manandik tisae.

²⁰Aku handak katawan kea tahiu sapuluh tandok intu takoloke tuntang tahiu tandok korik je lembut limbah te tuntang manjawut telo bara kare tandok je solake te. Tandok korik te aton mata tuntang nyamae je mangamburau dengan kajohoe. Ie labih bakaike-ikeh bara kare tandok je beken te.

²¹ Metoh aku mitee, tandok te parang dengan ungkup Hatalla tuntang mampakalah ewen.

²² Limbah te Ie je belom katatahie te dumah palus manenga tukas je mampamanang[11] ungkup Hatalla Pangkahai. Katikae jari sampai akan ewen manarima kuasa akan marentah.

²³Jetoh rimae je dinongku, “Meto je kaepat te iete karajaan je kaepat je akan mendeng intu kalunen tuntang beken bara karajaan je helo. Karajaan te akan mamparotek tuntang manegok hapus kalunen tuntang mahunje-manandik tisae.

²⁴ Sapuluh tandok te iete sapuluh raja je akan marentah karajaan te. Limbah te ije biti raja je beken akan lembut; ie beken toto bara kare raja je solake. Tuntang ie akan mampakalah telo biti raja.

²⁵ Ie akan hakotak malawan Hatalla Pangkahai tuntang mahenyek sampai matei ungkup Hatalla. Ie handak mobah kare parentah tuntang kare pesta agama ain ungkup Hatalla, tuntang ewen akan inguasae katahin telo satengah nyelo.

²⁶Palus pangadilan sorga akan ilalus tuntang manduan kuasae hayak mamparotek ie sampai binasa.

²⁷ Kuasa tuntang kahain hapus karajaan hong hunjun petak kareh inenga akan ungkup Hatalla Je Pangkahai. Kuasan ewen uka marentah dia akan lepah tuntang kakare panguasa hong hunjun petak akan manempo ewen dengan kaketep.

²⁸Sampai hetoh auh pansanan toh. Aku paham balisah sampai kalas, tapi aku dia mansanan akan ewe-eweh tahiu urase taloh te.