Read Ngaju DANIEL 8 Bible Online

DANIEL 8 - Ngaju bible

DANIEL 8

¹Hong nyelo katelo raja Belsasar marentah, aku mandino paite kadue.[12]

²Huang paite te kasenangku arepku intu propinsi Elam, intu Susan, lewu hai eka raja Persia marentah. Aku mendeng tokep Sungei Ulai.

³Tuntang intu saran Sungei te gitan ije kongan tabiri hatue je aton due tandoke panjang, je ije labih panjang tuntang labih taheta bara je beken.

⁴Gitangku tabiri hatue te manandok manintu barat, utara tuntang salatan. Jaton meto je olih manaharepe atawa liwus bara kuasae. Ie mawi tumon kanahuange tuntang bajoho.

⁵Metoh aku manampayahe, gitan ije kongan kambing hatue dari-dari bara hila barat dimpah petak. Kalote kalajun darie, sampai paie dia manigong petak. Helat due matae aton ije tandok je mansuloh.

⁶Kambing hatue te manokep tabiri hatue je gitangku intu saran Sungei te, palus manyarang manintu ie dengan kasiake.

⁷Gitangku ie manyarang tabiri hatue te. Ie paham basiak sampai mantakan tabiri hatue te tuntang mamelek kadadue tandoke. Tabiri hatue te dia olih malawan. Ie halelek intu petak tuntang ihunje-nandike, hayak jaton oloh je tau mandohop.

⁸Kambing hatue te sasar hai. Tapi metoh ie sampai akan salepah kuasae, tandoke je hai te palus bapelek, balalu intu eka te lembut epat tandok je mansuloh, genep tandok maninjok akan tintun eka je hakabeken.

⁹Intu ije bara kare tandok te aton lembut tandok korik je palus paham hai tuntang kuasae tayap akan hila salatan, akan hila timor tuntang akan hila petak je basiwoh.

¹⁰ Tandok te sasar hai sampai sukup kaabase akan manyarang tantara sorga iete kare bintang, tuntang pire-pire bara marak ewen injakahe akan petak tuntang ihunje-nandike.

¹¹Ie mahin manantang pangkalima tantara sorga, mampaterai parapah sining andau je iluput akan pangkalima te, tuntang manderep huma sombayang akae.

¹²Palus kare oloh intu hete nampara badosa tuntang dia maluput kare parapah je inyoho te.[13] Maka sombayang je toto jari injakah akan petak. Tandok te mandino hasil huang kare gawie.

¹³Limbah te hiningku ije malekat hamauh dengan ije beken, “Sampai pire katahie uras je gitan huang paite te akan ilalus? Sampai hamparea dosa hai te mangganti parapah sining andau? Sampai hamparea tantara sorga tuntang huma sombayang te ihunje-inandik?”

¹⁴Hiningku malekat ijee tinai tombah, “Sampai 1.150 andau tinai. Katahin te parapah halemei tuntang parapah hanjewu dia iluput. Limbah te harue huma sombayang ihalalian.”

¹⁵Metoh aku mancoba maharati riman paite te, salenga intu taharepku mendeng taloh je kilau olon.

¹⁶ Hiningku auh je mantehau intu dipah Sungei Ulai, koae, “Gabriel, tarang akae paite te.”

¹⁷Palus Gabriel je mendeng intu hila baungku te manokep aku. Aku balalu paham mikeh sampai aku balongkang. Koan Gabriel dengangku, “O anak olon, ikau patut katawan tahiu paite te iete tahiu lawin jaman.

¹⁸“Metoh ie hakotak, aku tujah. Tapi ie mimbing aku tuntang mandohop aku mendeng haluli. Palus ie hamauh,

¹⁹“Aku akan mansanan akam narai je musti manjadi kilau kajarian kasangit Hatalla. Awi paitem te maninjok akan lawin jaman.

²⁰Tabiri hatue je gitangku te je tempon due tandok, tampengan karajaan Media tuntang Persia.

²¹Kambing hatue te tampengan karajaan Yunani, tuntang tandok je mansuloh helat due matae te iete raja je solake.

²²Epat tandok je lembut limbah tandok je solake te bapelek, rimae iete karajaan Yunani akan tabagi jari epat karajaan, tapi ije mahin dia tumon kaabas je solake te.

²³Tokep kahapus kare karajaan te, amon kapapa jari sabak, palus lembut ije raja je badungil, tuntang pintar manipu.

²⁴Ie abas toto, tapi dia awi kaabase kabuat. Ie akan mimbit kabinasa je bakaike-ikeh tuntang en bewei je ilaluse akan mandino hasil. Ie akan mambinasa oloh gagah, tuntang ungkup Hatalla.

²⁵Awi ie bakalilit kare tipue uras aton hasile. Ie mampatamam arepe tuntang dia ie mansanae labih helo ie akan mambinasa are oloh. Ie bahanyi haream malawan Raja Pangkahai. Tapi ie akan imparotek dia dengan kaabas olon.

²⁶Paite tahiu parapah halemei tuntang hanjewu je jari inarang akam te, toto-toto akan manjadi. Tapi urase te akan manjadi hong wayah je naharep je magon kejau; awi te ela manyaritae akan ewe-eweh bewei.”

²⁷Limbah te aku mangkeme balemo palus haban pire-pire andau katahie. Limbah te aku misik tuntang malalus kare gawingku akan raja. Tapi aku balisah manirok kare paite te tuntang dia olih maharatie.