Read Ngaju DANIEL 9 Bible Online

DANIEL 9 - Ngaju bible

DANIEL 9

¹ Hong nyelo je solake anak Ahasweros, iete Darius oloh Media te marentah intu Babel, aku, Daniel, mambasa kare buku agama. Aku mangumang iete manumon auh TUHAN akan Nabi Yeremia, lewu Yerusalem akan tetep manjato katahin uju puluh nyelo.

³Palus aku balakudoa toto-toto intu Hatalla tuntang balaku asin Aie. Aku kea puasa tuntang mahapan benang kampil hayak mondok hunjun kawo.

⁴Hapus dosan bangsa ayungku ingakuku akan TUHAN, Hatallangku. Koangku, “TUHAN, Hatalla, ikau hai tuntang ikei mahormat ikau. Ikau harajur malalus janjim tuntang mamparahan sintam je katatahie akan ewen je sinta dengam tuntang malalus taloh je inyohom.

⁵Ikei jari badosa, ikei jari mawi kapapa, tuntang malalus kasalan. Ikei jari malekak arep ikei bara ikau tuntang malanggar parentah Aim tuntang mahiwang bara kare atoran Ayum.

⁶Ikei dia manumon kare auh nabi, kare rewar Aim te, je jari hakotak hapan Aram akan kare rajan ikei, akan kare pamimpin, kare tato hiang tuntang hapus bangsa ikei.

⁷O TUHAN, gawin Aim harajur buah tuntang bujur, tapi ikei harajur mampahawen arep ikei, iete ikei je uras melai hong Yudea tuntang hong Yerusalem tuntang uras oloh sama bangsa ikei je jari inawor Awim akan kare lewu je kejau tuntang je tokep awi ewen dia baketep Dengam.

⁸Kare rajan ikei, kare pamimpin tuntang tato hiang ikei jari malalus kare taloh je mampahawen tuntang jari badosa dengam, o TUHAN.

⁹Ikau kontep ampun tuntang asi, aloh ikei jari malawan ikau.

¹⁰Ikei dia mahining auh Ayum, o TUHAN, Hatallan ikei, katika Ikau manyoho ikei belom manumon kare parentah Aim je inenga Awim akan ikei mahalau kare nabi, kare rewar Ayum te.

¹¹Hapus Israel jari malanggar kare parentah Aim tuntang dia maku mahining auh Ayum. Ikei badosa Dengam, tuntang awi te Ikau jari mawi ikei hapan sapa je jari inyurat huang buku Moses, rewar Aim.

¹²Ikau malalus taloh je buah tumon jari injanji Awim akan ikei tuntang akan oloh je manguasa ikei. Yerusalem jari ihukum awim labih babehat bara lewu je kueh bewei intu kalunen toh.

¹³Kakare calaka je inyurat hong buku Moses jari inempak Awim akan ikei. Tapi aloh kalote, o TUHAN, Hatallan ikei, ikei magon kea dia maku manyanang atei Aim. Ikei tetep dia maku malihi kare dosan ikei tuntang dia maku kea manantuani kare auh ajar Aim.

¹⁴Ikau, o Hatallan ikei, jari mahukum ikei dengan calaka je jari inyadia Awim; gawin Ayum harajur buah tuntang bujur, tapi ikei dia mahining auh Ayum.

¹⁵O TUHAN, Hatallan ikei, Ikau jari mamparahan kuasan Aim dengan mimbit ungkup Ayum balua bara Misir, tuntang kuasa Aim te magon tetep ingenang. Ikei jari badosa tuntang mawi kasalan.

¹⁶Ikau jari milang intu jaman horan, awi te ela sangit tinai dengan Yerusalem, lewun Ayum kabuat bukit Ayum je barasih.[14] Awi dosan ikei tuntang kapapan tato hiang ikei, palus uras oloh hakaliling ikei mamanah Yerusalem tuntang ungkup Ayum.

¹⁷O Hatallan ikei, hining lakudoa tuntang palakungku. Halalian human Ayum je jari impalomos te, kambuah mangat uras oloh katawan je ikau Hatalla.

¹⁸Hining auh ikei, o Hatalla, ite ikei tuntang nantuani ikei hayak karusak lewu je inggare hapan Aram. Ikei balakudoa intu Ikau dia ganan kare kahalap gawin ikei, malengkan awi Ikau kontep asi.

¹⁹TUHAN, hining auh ikei, ampun ikei, ite ikei tuntang dohop bajeleng! Ela landar, uka uras oloh katawan je Ikau te Hatalla. Awi Yerusalem tuntang ungkup Ayum katatahie.”

²⁰Aku tetep balakudoa tuntang mangaku dosangku tuntang dosan bangsa ayungku Israel, hayak balaku dengan TUHAN, Hatallangku, uka mahalalian huma Ayue je barasih.

²¹ Metoh aku balakudoa, Gabriel je gitangku huang paiteku je helo te, tarawang manintu aku. Metoh te katika oloh maluput parapah halemei.

²²Palus Gabriel manarang tumon toh, “Daniel, aku dumah mangat mandohop ikau manarang riman tujum te.

²³Metoh ikau nampara balaku dengan Hatalla, ie tombah. Aku dumah awi ie manyampaie awi ie masi ikau. Toh, hining bua-buah katika aku manarang riman paite te.

²⁴Uju kali uju wayah iete katika je inukas Hatalla akan maliwus bangsa ayum tuntang lewun ayum je barasih te bara dosa tuntang kapapa. Uras dosa akan iampun tuntang kaadilan je katatahie akan impendeng, sampai paite tuntang tujum te manjadi gitan, tuntang Human TUHAN[15] je barasih te akan iawi manempo TUHAN tinai.

²⁵Catet tuntang iharatim toh: Uju kali uju nyelo akan mahalau, nampara bara katika impalua parentah akan mamangun haluli Yerusalem, sampai panumah ije pamimpin paintih Hatalla. Katahin uju kali jahawen puluh due nyelo kare jalan tuntang kare kota Yerusalem akan imangun haluli, tapi wayah te kea kontep kapehe.

²⁶Intu kahapus wayah te pamimpin paintih Hatalla akan impatei, aloh ie jaton kasalae. [16] Maka dumah tantara ain ije biti raja je abas, palus mambinasa lewu Yerusalem tuntang Human TUHAN. Kahapus jaman te akan dumah sama kilau danum soho je mimbit parang tuntang karusak, kilau je jari inukas awi Hatalla.

²⁷ Raja te akan mawi janji je dehen dengan are oloh katahin uju nyelo. Intu benteng wayah te, ie mampaterai gawi maluput parapah. Limbah te taloh kajilek je inyewut Kapapa je mampahancor[17] akan impendeng intu Human TUHAN tuntang tetep aton intu hete sampai ie je mampendenge intu hete buah kabinasa je inukas awi Hatalla akae.”