Read Ngaju HOSEA 10 Bible Online

HOSEA 10 - Ngaju bible

HOSEA 10

¹Israel sama kilau batang anggor je mamua labat. Sasar mandahang panataue, sasar are mesbeh je iawie. Sasar sanang, sasar bahalap kea kare turus batu je inyembahe.

²Kare oloh je ateie tulas te, toh akan mananggong kajarian dosae. Hatalla akan mamparotek mesbeh ewen, tuntang mampalongkang kare turus batu ain ewen.

³Dia tahi tinai ewen kareh hamauh, “Itah jaton tempon raja awi itah dia mikeh dengan TUHAN. Narai gunae ije biti raja akan itah?”

⁴Ewen mangamburau tuntang mawi janji tanjaro hayak mampendeng janji je dia baguna. Kare atoran imutar balik sampai taloh je dia adil lembut sama kilau taloh imbul bawisa intu tana je jari inyangkul.

⁵Oloh lewu Samaria akan mikeh; ewen tuntang kare imam je manempo sapi amas intu Betel[17] te akan kapehe atei tuntang manangis awi uras kahain hampatong dewan ewen te jari lilap.

⁶Hampatong te kareh iunda akan Asur uka inenga akan raja hai. Israel omba rencana je mawi ewen mahamen tuntang inawah.

⁷Samaria akan hancor tuntang rajae akan iimbit haguet sama kilau ije katetek kayu je impahantong intu danum.

⁸ Kare human taloh intu kare bukit hong Betel [18] eka oloh Israel manyembah hampatong, akan irusak. Duhi tuntang oru akan lembut intu mesbeh ewen. Palus ewen mangkariak akan kare bukit, “Sangkolep ikei!” tuntang akan kare lungkoh “Enyet ikei!”

⁹ TUHAN hamauh, “Bara kajadian intu Gibea, oloh Israel hindai kea terai mawi dosa malawan Aku. Awi te intu Gibea[19] kea ewen akan buah parang.

¹⁰Aku akan manyarang kare oloh je badosa te, tuntang mahukum ewen, kare bangsa akan hinje uka malawan ewen, tuntang ewen akan ihukum tagal dosan ewen je are te.

¹¹Bihin Israel kilau sapi tabela je talatih bahalap, tuntang je rajin mihik gandom. Aku dia usah mangkepan gandar intu tekoke je bahalap te. Tapi toh aku jari manukas mamaksa ie bagawi babehat. Yuda inyohoku maluku, Israel inyohoku manyarak petak.

¹² Aku hamauh, ‘O Israel! Nguan tana taheta akam, tawor binyin kaadilan, tuntang getem berkat je ihasil awi katoton sintam dengang-Ku. Awi jari katikae ikau manggau Aku, TUHAN ayum. Aku akan dumah tuntang mujan ikau hapan berkat-Ku.’

¹³Tapi ikau malalus taloh je hakalawan; ikau mawi kapapa, tuntang manggetem kadarhaka. Ikau jari kuman kare bua hasil tanjarom.” TUHAN hamauh tinai, “O bangsa Israel, awi ikau mampaandal kare kareta parangm tuntang tantaram je karean,

¹⁴maka rayatm kareh intakan parang, tuntang uras kota aim akan inderep. Karusake sama kilau intu andau raja Salman mambinasa kota Bet-Arbel huang parang, tuntang malitek kare indue dengan kare anake.

¹⁵Jete je akan manjadi dengam, o oloh je melai Betel, awi ikau jari malalus kapapa je hai. Metoh andau sawah, sana parang manampara, rajam kareh matei.”