Read Ngaju HOSEA 11 Bible Online

HOSEA 11 - Ngaju bible

HOSEA 11

¹ TUHAN hamauh, “Aku sinta Israel bara metoh ie korik, intehau-Ku anak-Ku balua bara Misir.

²Tapi sasar intehau-Ku anak-Ku te sasar ie mangejau arepe bara Aku. Ie mimbit parapah tuntang mamapui garo akan Baal tuntang kare dewa beken.

³Padahal Aku je majar Israel mananjong, tuntang je mamaluke dengan kasayang. Aku je mahaga ie tapi ie dia maku mangaku jete.

⁴Dengan salepah kasayang-Ku irantep-Ku ie dengang-Ku. Uras kapehe inyalawah-Ku, tuntang dengan sintang-Ku Aku mampakanan ie.[20]

⁵Kare oloh Israel te dia maku haluli omba Aku, awi te ewen ilian haluli akan Misir, tuntang bangsa Asur kareh marentah ewen.

⁶Parang sabak toto sampai akan huang kare lewun ewen; kare lawang kareh irusak, tuntang ungkup-Ku kareh imbinasa. Jete manjadi awi ewen manumon kanahuange kabuat,

⁷tuntang jua-juan malihi Aku. Ewen akan buah henyek, tapi jaton je maliwus ewen aloh ewen mangkariak balaku awat.”

⁸ TUHAN hamauh, “O Israel, dia baka ikau inalua atawa ilihi awi-Ku. Tinai en ikau akan impalomos awi-Ku sama kilau Adma? Atawa iawiku sama kilau Seboim?[21] Dia sampai ateiku malalus taloh te, awi sintang-Ku paham hai dengam!

⁹Ikau dia sampai ihukum awi-Ku huang kasangit-Ku; ikau dia akan imbinasa awi-Ku tinai. Awi aku Hatalla, dia olon. Aku, Je Barasih, mampahayak ikau, tuntang dia maku tinai sangit dengam.”

¹⁰TUHAN hamauh, “Ungkup-Ku akan manuntut Aku amon Aku manyakungkong sama kilau singa tuntang mampikeh musoh ewen. Ungkup-Ku balalu kaje-kajeng dumah bara hila barat uka manyembah Aku.

¹¹Bara Misir ewen akan dumah sama kilau kalias burong, tuntang bara Asur sama kilau kawan burong dara. Palus ewen akan iimbitku haluli akan human ewen. Aku, TUHAN, jari hakotak.”