Read Ngaju HOSEA 12 Bible Online

HOSEA 12 - Ngaju bible

HOSEA 12

¹TUHAN hamauh, “Bangsa Israel mangaliling Aku hapan tanjaro tuntang tipu; bangsa Yuda tetep malawan Aku, Hatalla je barasih tuntang baketep.

²Uras je iawi oloh Israel bara hanjewo sampai hamalem dia baguna tuntang mambinasa sama kilau riwut timor. Katulas tuntang kakaras mandahang marak ewen. Ewen mawi kare janji dengan Asur tuntang mimbit undus akan Misir kilau tanda kapakat.”

³ TUHAN aton perkara Aie dengan bangsa Yuda; Ie kea akan mahukum Israel awi gawin ewen. Ie akan mambaleh gawin ewen.

⁴ Manampara bara metoh huang kanai, Yakob tato hiang ewen jari manipu Esau paharie je hatatup dengae; tuntang hong katagangae Yakob hatangkarap dengan Hatalla.

⁵Ie hatangkarap dengan ije malekat, tuntang ie manang. Palus ie manangis tuntang balaku imberkat. Limbah te intu Babel, Hatalla manalih Yakob tato hiang itah te, tuntang hakotak dengae.

⁶Hatalla te iete TUHAN Pangkahai. Arae iete TUHAN. Hapan aran te Ie nahuang oloh sombayang intu Ie.

⁷Awi te, o turonan Yakob, keleh percaya dengan Hatallam tuntang haluli Dengae. Keleh belom dengan kontep sinta tuntang kabujur, tuntang entai dengan sabar sampai Hatallam mandohop.

⁸TUHAN hamauh dengan bangsa Israel, “Ikau tulas sama kilau oloh Kanaan. Kare oloh dagang ayum rajin mamikir langganae hapan timbangan je dia bujur.

⁹ ‘Itah metoh toh tatau; koan ewen. Itah ontong! Jaton je tau mandawa itah mandino panatau te dia bujur’.

¹⁰Tapi aku, TUHAN, Hatallam, je mimbit ikau balua bara Misir, kareh mawi ikau melai tinai intu kare tingkap kilau horan metoh Aku manalih ikau intu padang pasir.

¹¹Aku jari hakotak dengan kare nabi, tuntang manenga are paite akan ewen. Hajamban ewen Aku mansanan kare rancana aing-Ku akam ungkup aing-Ku,

¹² aloh kalote magon aton je manyembah hampatong intu Gilead, tuntang maluput parapah sapi intu hunjun mesbeh intu Gilgal. Tapi ewen je manyembah hampatong te akan matei, tuntang kare mesbeh intu Gilgal te akan manjadi toyok batu intu kare tana.”

¹³ Yakob, tato hiang itah hadari akan Mesopotamia, palus uka mandino sawae, ie manempo oloh intu kanih tuntang manyakatik kare tabirin oloh te.

¹⁴TUHAN manyoho ije biti nabi uka mimbit oloh Israel balua bara kahajipen intu Misir, tuntang akan manjaga ewen.

¹⁵Oloh Israel jari mawi TUHAN sangit toto, ewen patut buah hukum awi kapapan ewen. TUHAN akan mahukum ewen awi ewen jari mawi oloh manawah Ie.