Read Ngaju HOSEA 2 Bible Online

HOSEA 2 - Ngaju bible

HOSEA 2

¹Awi te, tehau sama arepm dengan aran “Ungkup Hatalla” tuntang “Iasi TUHAN.”

²TUHAN hamauh, “O kare anak-Ku, indum dia sawang-Ku tinai, tuntang Aku dia banae. Awi te imbit ie pakara, uka ie dia habandong tuntang malontei tinai.

³Amon ie tetep malontei aku akan mengkak pakaiae mangat ie halowai sama kilau hong andau ie inakan. Kareh iawiku ie kilau petak keang kamahau palus ie kareh matei teah belai.

⁴Keton, kare anake, dia akan mandino asing-Ku; keton inakan bara gawin lontei.

⁵Indu keton iete lontei je dia tau mahamen. Ie hamauh, ‘Aku kareh manalih kare je eka sintangku je manenga akangku taloh kinan tuntang taloh ihop, wol tuntang lena, undus saitun tuntang anggor.’

⁶Awi te, aku kareh mangurong ie hapan onak duhi, tuntang matep jalae dengan dinding batu.

⁷Ie kareh manggoang kare je eka sintae, tapi dia olih manjake ewen. Ie kareh manggau ewen, tapi dia sondau ewen. Palus ie hamauh, ‘Aku handak haluli talih banangku je solake; bihin ampingku labih bahalap bara toh.’

⁸Indu keton dia puji mangaku tahiu Aku je manenga akae gandom, anggor, undus saitun, tuntang uras amas perak je hapae manyembah Baal te.

⁹Awi te, intu wayah getem Aku manduan haluli panengang-Ku te, iete gandom tuntang anggor hayak wol tuntang lena je inenga-Ku indu pakaiae.

¹⁰Kareh impalowai-Ku ie intu baun kare je eka sintae. Jaton bara ewen je tau maliwus ie bara kuasang-Ku.

¹¹Uras pestae kareh impatende-Ku, aloh pesta nyelo taheta atawa pesta genep bulan tuntang kare andau Sabat; pandak auh uras pesta agamae.

¹²Aku kareh marusak kare batang anggor tuntang kare batang ara je manumon auh ayue upah gawie dengan kare je eka sintae. Kareh iobahku kare kabon anggor dengan kare kabon ara ayue je jadi parak kayu; kare meto basiak kareh marusake.

¹³Aku mahukum ie tagal kare andau je ihapae mamapui garo akan Baal, hayak makaian arepe dengan hiasan ayue, palus mangalapean aku samasinde. Aku, TUHAN jari hakotak.”

¹⁴TUHAN hamauh, “Awi te aku kareh mimbit ie akan padang pasir; intu hete ie kareh ingantau awi-Ku dengan kare auh sinta.

¹⁵ Kare kabon anggore kareh iliang-Ku akae, tuntang janah kasusah kareh iawi-Ku jadi bauntonggang kaharap. Intu hete ie kareh manyambut Aku kilau pesae tabela, metoh ie harue balua bara Misir.

¹⁶Balalu ie kareh manyewut aku banae, tuntang dia tinai Baal ayue.[4]

¹⁷Aku dia manyoho ie manyewut aran Baal tinai sampai oloh kareh mangalapean aran te.

¹⁸Katika te kareh aku mawi janji dengan kare macam meto mangat ewen dia maderoh ungkup-Ku. Aku kareh mampaterai kare parang tuntang manganan kare pakakas parang bara tanah ungkup-Ku te, tuntang mawi ewen belom tadoh sanai.

¹⁹Israel ikau akan iawi-Ku jadi sawang-Ku, kabaling-Ku ije sah sampai katatahie. Ikau akan iasi awi-Ku tuntang inyinta-Ku harajur; Aku kareh malalus kabujur tuntang kaketep.

²⁰Tumon janjing-Ku, Aku akan kawin dengam. Ikau akan mangaku Aku kilau TUHAN ayum kabuat.

²¹Metoh te, amon ungkup-Ku Israel[5] balakudoa, Aku akan mahining auh ewen. Bara langit Aku akan mawi ujan mohon sampai petak manenga hasil gandom, anggor tuntang undus saitun.

²³ Aku akan mawi ungkup-Ku belom sanang tuntang manetep hong tanah ewen. Akan ewen je inggare ‘Je Dia Iasi’ akan imparahang-Ku tahiu ewen kea iasi awi-Ku, tuntang akan ewen je inggare ‘Dia Ungkup-Ku’ kareh insanang-Ku, ‘Keton Ungkup-Ku’. Ewen akan tombah kalotoh, ‘Ikau Hatallan ikei.’ ”