Read Ngaju HOSEA 4 Bible Online

HOSEA 4 - Ngaju bible

HOSEA 4

¹TUHAN aton perkara dengan kare oloh tanah toh. O Israel hining taloh je insanan Awie, “Hong tanah toh jaton kaketep atawa sinta, tuntang oloh tanah toh dia mangaku aku kilau Hatalla.

²Ewen sumpah, tapi ewen dia malaluse;[8] ewen mananjaro, mampatei, manakau tuntang habandong. Kapapa mandahang, tuntang pampatei manjadi bewe-bewei.

³Awi te lewu toh palus keang, tuntang uras taloh je belom intu hete akan matei. Kakare macam meto hong udara, petak tuntang tasik kareh binasa.”

⁴TUHAN hamauh, “O kare imam, ela aton je manyalan atawa malait ungkup-Ku, awi keton te je inyalan awi-Ku!

⁵Handau hamalem keton mawi kasalan, kalote kea kare nabi. Awi te Aku akan mambinasa Israel, indum.

⁶Keton, kare imam, dia paduli Aku, palus ungkup aing-Ku kea dia paduli Aku sampai ewen calaka. Keton manolak kare ajar aing-Ku. Jadi, Aku kea akan manolak keton, tuntang kare anak keton dia Aku mangakue kilau kare imam ayung-Ku.

⁷Sasar are bitin keton mandahang, sasar badosa haream keton dengang-Ku, o kare imam! Awi te ampin keton kareh iubahku: Keton dia tinai ihormat, malengkan inawah.

⁸Keton jari tatau awi dosan ungkup-Ku, awi te keton nahuang uka ewen harajur mawi dosa.

⁹Keton akan kapehe sama kilau rayat! Aku akan mahukum keton tumon kare ampin gawin keton.

¹⁰Keton akan kuman bara kare parapah je iluput, tapi keton kareh tetep balau. Keton akan manyembah kare dewa kajewong, tapi rayatm tetep dia mandahang, awi keton jari malihi Aku uka manyembah kare hatalla beken.”

¹¹TUHAN hamauh, “O Ungkup-Ku, aloh anggor je tahi, aloh anggor je taheta, jari mampalepah kaabasm uka tau manirok taloh tumon kabujure.

¹²Keton balaku tingak bara ije katetek kayu! Ije tongkeh mansanam akam narai je handak ingatawam! Ikau kilau ije biti oloh bawi je jadi lontei, padahal ikau aton banam; ikau malihi Aku tuntang manyarah bitim akan kare hatalla beken.

¹³Intu kare eka manyembah hampatong intu kare tantan bukit tuntang bukit gantong, ikau maluput parapah, tuntang mamapui garo intu penda kare batang kayu hai je labih labat intu kanih awi eka te kanjungen. Tapi narai kajariae? Kare oloh bawi bujangm jadi lontei tuntang kare manantum je bawi habandong!

¹⁴Tapi aku dia mahukum gawin ewen te, awi ikau kabuat manalih kare lontei je bagawi intu kare human dewa,[9] tuntang hayak ewen ikau maluput parapah akan dewa. Puna toto auh toh: ‘Bangsa je jaton aton kaharatie tahiu Hatalla kareh binasa.’

¹⁵O keton oloh Israel, keton dia baketep dengang-Ku! Tapi, aku maharap, Yuda dia mawi kasalan je sama! Ela sombayang intu Gilgal atawa Betel.[10] Ela sumpah intu kanih tagal aran Hatalla je belom.

¹⁶Keton, o oloh Israel, paham badungil! Kilen ampie Aku tau manyakatik keton sama kilau tabiri intu padang oru?”

¹⁷Ungkup Israel jari heret dengan hampatong dewa, awi te nalua ih ewen.

¹⁸Limbah babusau awi mihop are anggor, ewen malontei hanja-hanjak. Ewen labih sanang inawah bara ihormat.

¹⁹Awi te ewen akan lilap kilau inantawus riwut. Ewen akan mahamen awi kare parapah je iluput ewen akan kare dewa.