Read Ngaju HOSEA 5 Bible Online

HOSEA 5 - Ngaju bible

HOSEA 5

¹TUHAN hamauh, “Hining, o kare imam! Seneh o oloh Israel. Hining o kare oloh turonan raja! Hukuman jari ilalus akan keton. Awi sapunae keton mamutus hapan kaadilan, tapi kabalikae keton jadi sama kilau jarat intu Mispa, sama kilau jabak intu bukit Tabor,

²tuntang sama kilau rumbak je handalem intu Sitim. Awi te Aku kareh mahukum keton handiai!

³Aku katawan taloh handiai tahiu ikau, o Israel! Dia badai ikau milim taloh en-en bara Aku. Ikau manyembah dewa tuntang dia tinai baketep dengang-Ku. Awi te, kare oloh ayum dia patut tinai manyembah Aku.”

⁴Kapapa je ilalus awi oloh Israel mawi ewen dia tau haluli manempo Hatallan ewen. Ewen jari ingaramak awi gawi manyembah dewa, sampai ewen dia paduli TUHAN tinai.

⁵Kajohon bangsa Israel gitan toto, tuntang jari bukti kasalan ewen. Dosan ewen mawi ewen tantarang tuntang balihang, tuntang bangsa Yuda omba manjato hayak ewen.

⁶Ewen haguet manggau TUHAN dengan mimbit tabiri tuntang sapi akan parapah, tapi urase taloh te dia baguna. Awi TUHAN jari malihi ewen tuntang ewen dia tau sundau Ie.

⁷Ewen dia baketep dengan TUHAN; kare anak ewen dia anake. Awi te, dia tahi tinai ewen akan imbinasa hayak dengan kare tanan ewen.

⁸Keleh mahimon tarompet intu Gibea! Pahiau tanda mantehau parang intu Rama! Pahiau lahap parang hong Betel![11] Ayo, oloh Benyamin, miar parang!

⁹Israel kareh binasa, awi jari dumah andau akan mahukum ie. Hining, o rayat Israel, taloh te musti akan manjadi.

¹⁰TUHAN hamauh, “Aku sangit awi kare kapalan oloh Yuda jari manyarang Israel tuntang marabut petake. Awi te aku akan malalus hukuman akan ewen sama kilau danum soho.

¹¹Israel ihenyek, ie nihau hak akan petake, awi ie jua-juan balaku dohop dengan taloh je katotoe dia tau mandohop.

¹²Jete bukue Aku kareh mampalomos bangsa Israel, tuntang mambinasa oloh Yuda.

¹³Bangsa Israel tuntang bangsa Yuda kasene arepe je rusak, palus Israel manalih Asur akan balaku pandohop bara raja hai. Tapi raja dia tau mandohop atawa mangambuah pambelom ewen.

¹⁴Sama kilau singa manyarang; kalote Aku akan manyarang oloh Israel tuntang Yuda. Aku kabuat je akan mamisak ewen, palus malihi ewen. Amon Aku akan mihir ewen haguet, jaton oloh je tau maliwus ewen.

¹⁵Ungkupku kareh ilihi-Ku sampai ewen jari sukup kapehe awi kare dosae, palus dumah manggau Aku. Awi ewen huang kapehee tau hirahe ewen akan mancoba manyondau Aku.”