Read Ngaju HOSEA 6 Bible Online

HOSEA 6 - Ngaju bible

HOSEA 6

¹Oloh Israel hamauh, “Keleh itah haluli akan TUHAN. Ie mangapehe itah, tapi Ie kea je kareh mampakeleh. Ie je mampahimang tapi Ie kea je mameteng kare himang itah.

²Hong kadue atawa katelo andau toh Ie akan mampakeleh itah. Itah akan belom hong kalindonge.

³Awi te keleh itah nahuang toto-toto uka gasene Hatalla. Ie musti manalih itah sama panumah andau sawah, tuntang sama kilau ujan je mambisa petak intu lawin wayah pangujan.”

⁴Tapi TUHAN hamauh, “O Israel tuntang Yuda! Narai je iawi-Ku akam? Sintam dengang-Ku jeleng lilap sama kilau asep atawa ambon hanjewu.

⁵Awi te Aku manyoho kare nabin aing-Ku uka mansanan akam tahiu tukas aing-Ku je akan mahukum tuntang mambinasa ikau. Je ilaku awi-Ku dengam jari tarang toto:

⁶ Aku labih rajin ikau mangasene Aku tuntang harajur sinta dengang-Ku, bara ikau mamapui tuntang maluput parapah akang-Ku.

⁷Tapi kilau Adam[12] ikau malanggar janjim dengang-Ku.

⁸Gilead jete lewu je kontep dengan oloh papa tuntang oloh pamuno.

⁹Kare imam intu lewu te kilau ije baris parampok je mimpa oloh mahalau. Intu jalan je manintu lewu barasih Sikhem ewen mahin mampatei! Uras kapapa te ilalus ewen puna tantai ihat.

¹⁰Intu Israel Aku mite taloh je mawi atei-Ku marawan: ungkup-Ku mamapa arepe awie manyembah dewa.

¹¹Tahiu ikau, o oloh Yuda, Aku jari manukas katikae akan mahukum ikau kea ganan taloh gawim.”