Read Ngaju HOSEA 8 Bible Online

HOSEA 8 - Ngaju bible

HOSEA 8

¹TUHAN hamauh, “Pahiau tanda bahaya! Musoh manyarang lewung-Ku kilau burong antang manyambar panginae! Ungkup-Ku malanggar janjing-Ku dengan ewen, tuntang malawan kare auh ajar-Ku.

²Aloh ewen manyewut Aku Hatallan ewen, tuntang hamauh iete ewen ungkup-Ku je kasene Aku,

³tapi ewen dia maku manarima taloh je bahalap. Awi te ewen kareh inggoang awi kare musoh ewen.

⁴Ungkup-Ku mintih raja dia misek tirok ayung-Ku. Ewen mangkat pamimpin dia misek kahandak-Ku. Ewen mimbit amas tuntang perak palus mawi hampatong dewa je mawi kabinasa akan ewen kabuat.

⁵Aku basingi dengan sapi amas je inyembah oloh lewu Samaria. Aku sangit toto dengan ewen. Sampai hamparea ewen harajur mamapa arep awi manyembah dewa?

⁶Sapi amas je inyembah intu Samaria te tampan kare tukang intu Israel! Jete dia Hatalla, tuntang musti imparotek!

⁷Ungkup-Ku manawor riwut, maka ewen kareh manggetem riwut barat! Tana gandom ewen dia mamua, palus dia mahasil tepong akan panginan. Tapi amon tana te mamua kea, palus gandome impalepah awi kare bangsa beken.

⁸Kilau kenceng je pusit, tumon te Israel jaton aton regae tinai, tuntang jari sama kilau bangsa je jaton kalabiee bara kare bangsa beken.

⁹Sama kilau kalidai bariar je malawan, kalote kare oloh Israel mado kanahuange kabuat. Ewen manggau pandohop bara Asur, tuntang mamili kapakat bara kare bangsa beken.

¹⁰Aloh kalote Aku akan mamumpong tuntang mahukum ewen.[13] Dia tahi hindai ewen akan manarahing awi kapehe, amon ewen ihenyek awi Asur.

¹¹Sasar are mesbeh imangun awi oloh Israel hapa marasih dosa, sasar are kea eka akan ewen mangat mawi dosa!

¹²Aku manyurat are toto ajar akan ewen, tapi uras inolak ewen awi ewen manirok taloh te jaton gunae akan ewen.

¹³Ewen rajin maluput parapah akang-Ku, tuntang kuman isin parapah te, tapi Aku, TUHAN, dia sanang dengan kare parapah te. Toh aku akan mingat dosan ewen tuntang mahukum ewen awi kare dosa te; Aku akan mangirim ewen haluli akan Misir!

¹⁴Oloh Israel mamangun kare istana, tapi ewen kalapean dengan je manjapa ewen. Oloh Yuda mampaare kare lewu je badinding batu, tapi aku akan mampamohon apui akan manusul lepah kare istana tuntang kare lewun ewen.”