Read Ngaju YO"EL 1 Bible Online

YO"EL 1 - Ngaju bible

YO"EL 1

¹Jetoh auh peteh TUHAN akan Yoël, anak Petuel.

²Hining, o kare pamimpin Israel; seneh, uras oloh hong Yuda. En puji taloh kalotoh manjadi hong jaman keton, atawa intu jaman tato hiang keton?

³Keleh manyarita kajadian te akan kare anak keton; mangat ewen manyampaie tinai akan kare anak ewen sarita te. Turonan je rahian musti mahininge kea, tuntang manyampaie akan turonan je rahian tinai.

⁴Kawan sangkalap je dia taraise karee, tingkep intu kare tana tuntang kuman hasil jete. Taloh je inisa awi kawan sangkalap toh, impalepah awi kawan je beken tinai.

⁵O kare oloh pambusau, keleh misik! O kare oloh pamihop, keleh manangis! Basa anggor je taheta jari irabut bara nyamam.

⁶ Agas sangkalap manyarang lewun itah; ewen abas tuntang dia taraise karee, kasingae sama kilau kanyihin taring singa bawi.

⁷Ewen mampalomos batang anggor itah, tuntang batang ara baya batisa tunggule. Ewen mangupak kare batange, sampai kare patinge malenak.

⁸Keleh manangis, o ungkup, kilau bawi bujang je kapehe atei je manatum pampatei bakal banae je eka sintae.

⁹Gandom tuntang anggor jari nihau bara Human TUHAN. Palus kare imam je baketep bagawi, akan TUHAN pungu-pungut kapehe atei.

¹⁰Toh kare tana uras rusak. Petak danum kapehe atei; basa kare gandom jari lingis, bua anggor jari keang, tuntang undus saitun jari lepah.

¹¹O oloh pamalan, keleh manatum! O tukang kabon anggor, keleh manatum. Basa gandom, jelei tuntang kakare taloh je inggetem lepah lingis.

¹²Kare batang bua intu padang uras keang, aloh batang anggor, apel, ara, korma tuntang delima kea. Maka kahanjak oloh handiai jaton tinai.

¹³O kare imam je bagawi intu mesbeh, keleh mahapan tapih karong, tuntang keleh manangis. Keleh tame akan Human TUHAN palus manangis hapus alem, basa jaton tinai parapah anggor tuntang gandom akan Hatallan keton.

¹⁴Keleh marentah ungkup keton uka puasa, keleh manampa parawei akan pumpong hai! Rawei kare pamimpin tuntang kare bakas lewu hayak kare oloh lewu Yuda, mangat dumah akan Human Hatalla, uka mantehau Hatalla mangat balaku awat.

¹⁵ Andau ain TUHAN jari tokep; andau je bakaike-ikeh; katika Je Jaton Tikas Kuasae te mimbit kabinasa.

¹⁶Taloh kinan lepah rusak intu taharep matan itah hong Human Hatallan itah jaton tinai auh surak-lahap.

¹⁷Binyi matei intu petak keang. Dia aton gandom indu ingkes, maka kare lepau buang tuntang manjadi ramon kaduroh.

¹⁸Meto mangkariak tuntang balisah; jaton tinai padang oru akae. Kawan tabiri mahin asi-asi.

¹⁹Aku balaku awat intu Ikau, o TUHAN basa kare padang oru baseha keang kare kayu mahin keang tuntang matei sama kilau je inyeha apui.

²⁰Kare meto bariar intu parak kayu mahin mantehau Ikau balaku awat. Ewen dia tau manganan teah belai, awi kare sungei uras teah.