Read Ngaju YO"EL 2 Bible Online

YO"EL 2 - Ngaju bible

YO"EL 2

¹Keleh mahimon tarompet, pahiau auh tanda bahaya intu bukit Sion je barasih, eka Hatalla melai. Keleh hagenjeh, o oloh lewu Yuda! Basa Andau ain TUHAN jari tokep tuntang bajeleng sampai.

²Andau te kaput tuntang kalam, paham kabus hayak marindem. Agas sangkalap dumah-dumaha sama kilau baun andau je maniring arepe intu hunjun kare bukit. Taloh je kilau te dia puji aton, tuntang dia kareh manjadi tinai sampai katatahie.

³Sama kilau apui je manyeha tuntang mangehu ewen mampalomos kakare taloh imbul. Helo bara te, lewo te kilau Eden kabun ain TUHAN, rahian tinai, sama kilau padang keang kamahau. Jaton ije taloh en-en je batisa, jaton ije je luput bara amok asang ewen te.

⁴ Ampin ewen sama kilau kuda; darie sama kilau kuda intu padang eka kalahi.

⁵Ewen bara kajok intu tantan kare bukit gantong, auhe mangandarat sama kilau auh karetan oloh parang tuntang sama kilau kadarat apui je manyeha tampilai. Ewen habaris sama kilau pasukan mamot-menteng je tatap miar akan padang eka oloh kalahi.

⁶Katika ewen mantakan, uras kare oloh hagenjeh, ampin kare oloh uras mucat tuntang baputi kalas.

⁷Sama kilau pangkalima, ewen mawi tuntang mandai dinding sama kilau oloh paceh parang. Ewen babaris bujur akan baun, dia mahiwang atawa mobah haluan.

⁸Ewen dia hajuju sama arep ewen intu jalan ayue-ayue. Rami-rami ewen manelak kakare eka oloh manahan, barisan ewen dia olih impatende.

⁹Ewen manyarang akan huang lewu, tuntang dari-daria intu hunjun dinding. Ewen mandai akan huang kare huma; sama kilau maling ewen tame jalan baun sengok.

¹⁰ Metoh ewen miar, petak hagerek, tuntang langit mahin hagenjeh. Matanandau tuntang bulan palus kaput, tuntang kalawan kare bintang nihau.

¹¹ Auh TUHAN mangguntur manenga tanda, akan kawan oloh parang Ayue. Lalehan kapaham kare kawan oloh parang Ayue! Lalehan kahain kaabas je malalus parentah! Toto tamam tuntang andal Andau ije ain TUHAN! Jaton ije oloh je olih manahan.

¹²TUHAN hamauh, “Tapi toh keleh, haluli manalih Aku hapan salepah atei, sambil puasa, manatum tuntang manangis.

¹³Ela marabit pakaiam, tapi rabit ateim.” Mules arepm talih TUHAN, Hatallam. Ie olih manyarenan kalaite tuntang sintae jaton bara tikas, Ie tau tuntang kontep asi dengan ungkup Ayue Ie sanang mampun tuntang dia rajin mahukum.

¹⁴Aya-ayau TUHAN Hatallam mobah tiroke, tuntang Ie manenga kutoh berkat akam. Sampai ikau olih maluput parapah anggor tuntang gandom, akan TUHAN Hatallam.

¹⁵Keleh mahimon tarompet intu Sion, bukit ain Hatalla, keleh mansanan andau puasa, keleh malalus pumpong hai.

¹⁶Keleh mamumpong hapus rayat keleh mirak oloh are akan pumpong ungkup. Soho kare oloh bakas dumah, kare anak korik tuntang kare anak awau kea. Kare panganten taheta keleh dumah kea. Soho ewen malihi kamare.

¹⁷Soho kare imam je bagawi akan TUHAN, manangis helat mesbeh tuntang parantaran hila baun, sambil hamauh, “Keleh ikau manyayang ungkup Ayum, o TUHAN; ela manalua kare oloh Ayum inawah,” sampai kare bangsa beken manyindir tuntang hamauh, “Hong kueh Hatallan ewen?”

¹⁸Palus TUHAN manantuani petak Ayue, tuntang masi ungkup Ayue.

¹⁹Ie tombah auh ewen kalotoh, “Toh keton samandiai uras inenga-Ku: gandom, anggor, tuntang undus saitun akan panginan, mangat keton uras besoh. Aku kareh dia manalua keton inawah atawa inantawe awi kare bangsa.

²⁰Agas sangkalap bara hila utara kareh iharak-Ku. Belahe iharak-Ku akan padang. Akan Tasik Matei Aku maharak barisan je hila baun, akan Tasik Bentok Aku manggian barisan je hila likute. Kare hantue kareh bahewau. Ewen imbinasa-Ku awi ewen jari mangapehe keton.

²¹Ela mikeh, o tana, keleh ikau manyanang ateim; ingat taloh hai je ilalus TUHAN akam!

²²O kare meto, ela bagalabah. Kare padang oru kanjerae bahijau. Kare batang bua mamua labat, bua anggor tuntang bua ara paham manjadi.

²³O rayat Sion, keleh keton hanjak! Keleh keton hanjak barami-rami tuntang basasurak! Tagal kakare kahalap bara TUHAN, Hatallam. Intu wayah dawen baduroh inengae sukup danum ujan akam.[1] Hong wayah sadingen ujan impalabat, kalote kea wayah kambang lembut sama kilau bahut.

²⁴Palus gandom kareh basuang tinai eka mihik; anggor tuntang undus saitun kareh mamulak bara eka mahamis.

²⁵Aku kareh mangganti kakare karugim hong kare nyelo katika sangkalap kuman hasil getem aim. Basa aku manyoho agas sangkalap te manalih ikau.

²⁶Panginan kareh sukup akan keton sampai keton besoh. Keton kareh akan maninduh mampahai TUHAN Hatallan keton, basa Ie malalus are taloh heran akan keton. Oloh dia tinai manawah ungkup aing-Ku!

²⁷Maka keton Israel palus katawan, je Aku aton marak keton, tuntang je Aku toh TUHAN, Hatallan keton. Jaton Hatalla beken, baya Aku bewei. Ungkup-Ku kareh dia impahawen tinai.”

²⁸ “Limbah te kareh kakare oloh inyuang-Ku hapan roh-Ku. Maka kare anak keton bawi hatue kareh manyampai kare auh peteh-Ku; kare oloh bakas marak keton kareh sondau nupi panampayah kareh inenga akan kare oloh tabela.

²⁹Katika te roh-Ku kareh inusoh-Ku kea akan kare jipen bawi tuntang hatue.”

³⁰Intu langit tuntang hunjun petak kareh aku mawi are taloh heran. Kareh aton pampatei, nyalan apui tuntang kangkewul asep.

³¹ Matanandau kareh kaput tuntang bulan palus bahandang sama kilau daha. Uras taloh te kareh manjadi helo bara Andau ain TUHAN sampai, andau je manarewen tuntang bakaike-ikeh!

³² Tapi eweh bewei je balaku pandohop bara TUHAN, kareh inyalamat. TUHAN hamauh, “Hong Yerusalem kare oloh je iintih-Ku kareh salamat!”