Read Ngaju YO"EL 3 Bible Online

YO"EL 3 - Ngaju bible

YO"EL 3

¹TUHAN hamauh, “Hong katika te Aku kareh mahalalian katatau-kasanang akan Yerusalem tuntang Yuda.

²Kakare bangsa kareh imumpong-Ku tuntang iimbit-Ku akan Janah Basara. Palus intu hete aku mamutus taloh ije patut akan ewen tagal kapapae dengan ungkup-Ku. Basa ewen jari mambagi-bilah tanah Israel tuntang ewen manganan ungkup-Ku akan kakare lewu beken.

³Ewen manenong eweh kareh je tau mandino kare oloh tawanan. Ewen manjual oloh tabela bawi-hatue uka manjadi jipen. Tuntang duite ihapan ewen habandong tuntang mihop danum anggor.

⁴ Handak iawim akan en Aku toh, o Tirus, Sidon tuntang hapus tanah Pilistin? En ikau nahuang mambaleh bunom dengang-Ku? Toh keleh tarima baleh bara Aku je dumah manantekas.

⁵Amas tuntang perak aing-Ku jari irampokm, tuntang ramong-Ku je barega jari iimbitm akan pasah dewam.

⁶Oloh lewu Yuda tuntang Yerusalem jari iimbitm kejau bara lewue; limbah te keton manjual ewen akan bangsa Yunani.

⁷Toh Aku mimbit ewen balua bara kare eka keton manjuale, tuntang Aku kareh mambaleh kapapan keton mawi ewen.

⁸Kare anak keton bawi hatue kareh injual-Ku akan oloh lewu Yuda, je kareh manjual tinai akan Seba, lewu je kejau toto. Aku, TUHAN jari hakotak.

⁹Sanan auh toh akan kare bangsa: Keleh batatap akan baparang tuntang bahado kagancang! Keleh mirak kare pangkalima tuntang kare pahlawan; keleh mamumpong kare saradadu tuntang miar!

¹⁰ Tasal kare isin luku ain keton manjadi padang, tuntang taja ain keton manjadi lunjo. Tuntang oloh balemo keleh hamauh, ‘Aku olih hakalahi sama kilau tantara!’

¹¹Has, dumah bajeleng,[2] o kare bangsa bara hete-hete! Keleh mamumpong arep keton intu janah kanih.” O TUHAN, soho kare pangkalima Ayum manyarang ewen.

¹²TUHAN hamauh tinai, “Keleh kare bangsa tata-tatap tuntang haguet akan Janah Basara. Intu hete aku TUHAN kareh mamutus pakaran kare bangsa hakaliling ungkup-Ku.

¹³ Ewen paham papa; keleh mambiwis ewen sama kilau gandom masak intu tana. Keleh mangkijak-manandik ewen sama kilau anggor intu eka mahamis je kontep sampai batusoh.

¹⁴Bakoya-koyan oloh aton intu Janah Basara. Basa intu hete Andau ain TUHAN kareh bajeleng sampai.

¹⁵Matanandau tuntang bulan manjadi kaput, tuntang kare bintang dia tinai balawa.”

¹⁶ TUHAN nyakungkong bara Sion bukit Ayue; auh Ayue mangaruntong bara Yerusalem. Langit tuntang petak hungge Awie. Tapi TUHAN kareh tetep mambela tuntang mangalindong Israel, ungkup Ayue.

¹⁷“O Israel, toh ikau kareh akan katawan, je aku toh TUHAN, Hatallam. Aku melai intu Sion, bukit aing-Ku ije barasih. Maka Yerusalem kea manjadi lewu ije barasih, oloh luar dia kareh tame hete tinai.

¹⁸Hong wayah te kare bukit erep awi kabon anggor. Meto kareh kuman oru intu kare bukit je basiwoh. Danum kare sungei hong Yuda kareh dia puji lepah. Ije sungei kareh manahasak bara Human TUHAN, tuntang mambisa Janah Akasia hapan danum sadingen.

¹⁹Misir kareh manjadi padang benyem je keang. Tuntang Edom manjadi languen jaton oloe. Awi ewen jari manyarang oloh Yuda, tuntang mampatei oloh lewu je jaton kasalae.

²⁰Akan dahan ewen aku kareh mambaleh[3] buno oloh je mamuno ie kareh matei imbawas-Ku. Tapi Yuda tuntang Yerusalem kareh harajur aton oloe tuntang bukit Sion kareh tetep eka-Ku melai.”