Read Ngaju AMOS 2 Bible Online

AMOS 2 - Ngaju bible

AMOS 2

¹ TUHAN hamauh, “Oloh lewu Moab jari kinjap mawi dosa, awi te batantu Aku akan mahukum ewen. Ewen manawah raja Edom je jari matei te, ganan ewen mungkar kubure hayak manduan kare tulange tuntang mamapuie manjadi kawo.

²Awi te Aku akan manyoho apui akan lewu Moab, tuntang manusul lepah lingis kare kota Keriot. Oloh Moab akan matei intu bentok auh karidun parang, metoh tarompet impahiau, tuntang lahap parang inangkariak.

³Oloh ije mimbing kuasa intu Moab tuntang kakare oloh ije marentah akan impatei awi-Ku.”

⁴TUHAN hamauh, “Oloh Yuda jari kinjap mawi dosa, awi te aku batantu akan mahukum ewen. Ewen malanggar kare parentah-Ku tuntang dia paduli kare auh ajar-Ku. Ewen impalayang awi kare hatalla beken ije inyembah awi tato hiang ewen.

⁵Awi te, Aku akan manyoho apui akan tanah Yuda tuntang manusul lepah lingis kare dinding kota Yerusalem.”

⁶TUHAN hamauh, “Oloh Israel jari kinjap mawi dosa, awi te batantu Aku akan mahukum ewen. Oloh bujur je dia olih manahor utange, jari injual ewen manjadi jipen. Kalote kea gawin ewen dengan oloh je belom susah je dia olih manahor utange, aloh utang te baya tumon regan ije kapasang sandal.

⁷Ewen mahenyek oloh korik je jaton eka kaharape, tuntang dia paduli oloh je belom susah. Bapa tuntang anak batiroh dengan ije jipen bawi je sama, sampai mamapa arang-Ku je barasih.

⁸Intu genep eka sombayang, kare oloh batiroh hunjun baju je induan ewen kilau sanda bara oloh je belom susah. Intu Human Hatallan ewen, ewen mihop anggor ije induan ewen bara kare oloh je butang dengan ewen.

⁹ Aloh kalote, o ungkup-Ku, akan keton aku mambinasa oloh Amori je gantong sama kilau batang lentang tuntang dehen kilau batang tabalien.

¹⁰Keton jari iimbit-Ku balua bara Misir, tuntang ingagalangku mahalau padang tunis benyem epat puluh nyelo katahie. Tanah oloh Amori jari inengaku akan keton jadi lewon keton kabuat.

¹¹ Aku jari mintih pire-pire bara anak keton akan manjadi nabi, tuntang pire-pire oloh tabelan keton akan manjadi oloh Nasir.[2] En dia jete toto, o oloh Israel? Aku, TUHAN jari hakotak.

¹²Tapi keton manenga anggor akan indu ihop oloh Nasir, sampai ewen malanggar sumpah Nasir. Tuntang keton mangahana kare nabi manyampai auh petehku.

¹³Toh aku akan mahenyek keton sampai petak, sampai keton manarahing kilau auh kareta je sarat dengan gandom.

¹⁴Oloh je balias hadari mahin dia olih maliwus arepe; oloh abas akan nihau kaabase, tinai oloh menteng akan dia tau manyalamat arepe.

¹⁵Oloh je mamanah dia olih tahan, oloh je balias hadari dia akan tau hadari, tuntang oloh je manongkang kuda dia akan liwus.

¹⁶Hong andau te tantara je pangkahanyie mahin malekak pakakas parange, palus hadari. Aku, TUHAN jari hakotak.”