Read Ngaju AMOS 5 Bible Online

AMOS 5 - Ngaju bible

AMOS 5

¹Hining, o ungkup Israel! Aku handak manyanyi ije nyanyi kapehen atei:

²Israel sama kilau oloh bujang bawi je manjato ie dia akan mendeng tinai! Intu hunjun petak danum ayue kabuat ie inalua, jaton ije je mandohop mampendeng ie.

³Pangkahai TUHAN hamauh, “Ije lewu hong Israel mirak sakoyan biti tantara, tapi je buli haluli baya saratus biti; lewu ije beken mirak saratus biti, tapi je buli haluli baya sapuluh biti.”

⁴TUHAN hamauh dengan ungkup Israel, “Keleh haluli manalih Aku, maka keton akan belom.

⁵Ela haguet akan Berseba uka sombayang. Ela manggau Aku intu Betel, awi Betel akan lilap. Ela kea haguet akan Gilgal, awi oloh lewu te akan iunda akan eka tawanan.”

⁶Keleh mules haluli manalih TUHAN, maka keton akan belom. Amon keton dia mules haluli manalih Ie, Ie akan dumah sama kilau apui je tayap tuntang mangehu lepah oloh Israel. Intu Betel jaton oloh ije tau mambelep apui te.

⁷Calaka keton, keton je mobah taloh bujur manjadi taloh sala tuntang manduan hak oloh!

⁸ TUHAN manampa kare bintang intu langit bintang Tampong Bua tuntang Patendo. Ie mobah kakaput manjadi kalawa tuntang handau manjadi hamalem; danum bara tasik inusoh akan petak. Je manguan kare taloh handiai te arae TUHAN.

⁹Ie mambinasa oloh je abas hayak dengan kota ain ewen.

¹⁰Keton basingi dengan oloh je malawan katulas tuntang je hakotak bujur huang basara.

¹¹Keton mahenyek oloh je belom susah tuntang gandom ewen irampas keton. Awi te keton akan dia melai huang human keton je bahalap, je jari imangun keton te. Keton dia akan mihop anggor bara kare kabon anggor je imbul keton.

¹²Aku katawan kapaham kahain kapapan keton tuntang dosan keton. Keton mahenyek oloh bujur; keton manarima suap tuntang manalua oloh je belom susah je imutus dia bujur intu basara.

¹³Awi gawin keton te, maka kare oloh je pintar mangkeme labih bahalap benyem ih hong wayah je papa kilau te.

¹⁴Keleh malalus kahalap tuntang ela malalus kapapa, mangat keton belom. Palus TUHAN Je Jaton Tikas Kuasae akan toto-toto melai marak keton kilau je koan keton.

¹⁵Keleh manyingi taloh je papa tuntang sinta taloh je bahalap, hayak mandehen kaadilan. Ayaue TUHAN akan masi dengan kare oloh je batisa bara bangsa Israel.

¹⁶TUHAN, Hatalla Je Jaton Tikas Kuasae hamauh, “Intu kare jalan lewu, oloh akan manangis tuntang mungoh awi kapehen ateie. Kare oloh pamalan mahin intehau mangat omba managis hayak dengan kare oloh je imbayar akan manatum oloh matei.

¹⁷Hong kakare kabon anggor oloh akan manangis awi Aku dumah tuntang mahukum keton. Aku, TUHAN jari hakotak.”

¹⁸Toto, calaka keton je taharu dengan andau TUHAN! En gunae andau te akan keton? Andau te baya andau je kaput, dia ie andau je balawa akan keton.

¹⁹Ampie sama kilau oloh je hadari bara singa, tapi hasondau dengan bahuang. Atawa kilau oloh je buli akan huma tuntang basinggoh hapan lengee intu dinding, palus inutok handipe.

²⁰Andau TUHAN puna mimbit kakaput, andau derem je harenep.

²¹ TUHAN hamauh, “Aku basingi tuntang muta mite kare andau pesta agaman keton.

²²Amon keton mimbit parapah ije ingehu tuntang parapah gandom, Aku dia akan manarimae. Aku dia akan maku manarima kare meto ain keton je basepu-seput te je iluput keton akang-Ku kilau parapah hapan badamai.

²³Paterai kare nyanyin keton je mambisau Aku te; Aku dia maku mahining auh kacapin keton.

²⁴Labih bahalap malalus gawin kaadilan uka mahasor sama kilau danum, tuntang kabujur sama kilau sungei je dia puji teah.

²⁵ O ungkup oloh Israel, katika Aku magah keton mahalau padang pasir epat puluh nyelo katahie, Aku dia balaku parapah bara keton.

²⁶Tapi toh keton manyembah Sakut je inirok keton rajan keton, tuntang Kewan, bintang je inara keton te. Awi te kare hampatong je jari inampa keton te musti iimbit awi keton kabuat,

²⁷katika Aku manganan keton akan lewu je labih kejau bara Damaskus. Aku TUHAN je bagare Hatalla Je Jaton Tikas Kuasae jari hakotak.”