Read Ngaju AMOS 6 Bible Online

AMOS 6 - Ngaju bible

AMOS 6

¹Calaka keton je belom mangat intu Sion, tuntang keton je mangkeme sanai intu Samaria — keton o kare oloh hai bara marak bangsa Israel je tamam toh, keton je bahut inalih awi rayat tantai eka balaku dohop!

²Lius ite intu Kalne, tanjong palus akan lewu Hamat je hai te, limbah te akan lewu Gat intu Palestina. En ikau manyangka kare lewu te labih bahalap bara kare lewu intu Israel? En tanah ewen labih hai bara tanah keton?

³Keton jua-juan manyewut je andau calaka magon kejau, tapi kare gawim baya mampajeleng panumah andau kapehe te.

⁴Calaka keton je menter intu hunjun ranjang je bahala-halap tuntang pesta mampatei sapi tuntang tabiri je tabela!

⁵Keton rajin mangarang nyanyi, kilau je inampa awi Dawid, tuntang keton mampahiau kare lagu te mahapan kacapi.

⁶Keton mihop anggor bara galas je inyuang kontep, tuntang keton mahapan minyak je mangat ewaue tuntang je pangkahalape, tapi keton dia kapehe atei tagal karusak Israel.

⁷Tagal te keton toh jadi oloh je pangkasolake iunda akan eka tawanan. Kare pesta hai tuntang kare pesta korik ain keton akan jaton tinai.

⁸Hapan auh je karas, TUHAN Hatalla Je Jaton Tikas Kuasae tuntang je Pangkahai jari manenga pampingat toh, “Aku basingi dengan kajohon ungkup Israel; aku dia sanang dengan kare istana ain ewen je bahalap. Lewu eka rajan ewen marentah hayak dengan kare taloh je aton intu huange akan inyarah-Ku akan musoh.”

⁹Amon aton sapuluh biti oloh je manyahokan erepe intu huang ije huma, ewen akan matei kea.

¹⁰Ije biti bara oloh huma ije halaluan gawi mangubure, akan dumah tuntang balua mimbit hantun jalahae. Ie akan mantehau oloh je aton intu hila likut huma te, “En magon aton oloh je belom beken bara ikau?” Palus tarahining auh tombah, “Jaton!” Oloh huma je halaluan gawi mangubur hantu te akan hamauh, “Ela hakotak tinai! Itah dia tau mayewut aran TUHAN.”

¹¹Amon TUHAN manenga parentah, kare huma hai korik akan imparusak.

¹²En olih kuda hadari intu bukit batu? En puji oloh maluku tasik mahapan sapi? Tapi keton jari manumbak-nambalik kaadilan manjadi pulih je mampatei, tuntang taloh je bujur manjadi taloh je sala.

¹³Keton mangamburau je keton jari mampakalah Lodebar. [4] Keton kea hamauh, “Ikei sukup kaabas uka marabut Karnaim.”[5]

¹⁴TUHAN, Hatalla Je Pangkahai tuntang Je Jaton Tikas Kuasae kabuat hamauh, “Ungkup Israel, Aku akan mangirim tantara bara ije bangsa beken uka manyarang lewum. Ewen akan mantakan keton bara jalan akan Hamat intu hila utara sampai Janah Araba intu hila Salatan.”