Read Ngaju AMOS 9 Bible Online

AMOS 9 - Ngaju bible

AMOS 9

¹Aku mite TUHAN mendeng tokep mesbeh. Ie mansanan parentah kalotoh, “Pantu nyangi-nyangit takolok jihi intu humangku mangat kakare palataran hongge. Palongkang kare jihi te manitu kare takolok oloh. Ewen je dia matei akan impatei-Ku huang katika parang. Jaton ije je tau mandari arepe, ije mahin jaton je tau liwus.

²Aloh ewen manggau jalan mohon akan lewun oloh matei, Aku akan maraup ewen. Amon ewen mandai akan langit, aku akan mampamohon ewen bara hete.

³Amon ewen manyahokan intu tantan Bukit Karmel, aku akan manggau tuntang manyingkap ewen. Amon ewen manyahokan hong palempang tasik, Aku akan manyoho naga laut[7] manungap ewen.

⁴Amon ewen inawan awi musoh, Aku akan manyoho mangat ewen impatei. Ateiku himat uka mampalomos ewen, tuntang Aku dia baka mandohop ewen.”

⁵Petak hagerek tuntang olon huange kapehe atei, ganan TUHAN Je Pangkahai tuntang Pangkapaham Kuasae manigonge. Kilau danum batang danum Nil je mohon mandai awi pasang, kalote ewen mandai palus manjato.

⁶TUHAN mamangun human Ayue kejau hong hunjun langit, intu hunjun petak Ie manyangkulep langit kilau tatudung tuntang danum bara tasik akan inusoh Awie akan hunjun petak, maka je malalus kare taloh te arae te TUHAN!

⁷TUHAN hamauh, “O oloh Israel, Aku manantuani oloh Sudan sama kilau aku manantuani keton. Aku jari mimbit oloh Filistin bara Kreta tuntang oloh Siria bara Kir sama kilau aku mimbit keton bara Misir.

⁸Aku, TUHAN Je Pangkagantonge, kanjerang-Ku manantuani kerajaan Israel je badosa toh, tuntang Aku akan mampalomose bara hunjun petak. Tapi turonan Yakob dia urase imbinasa awi-Ku. Aku TUHAN jari hakotak.

⁹Aku akan manenga parentah tuntang mangiap Israel kilau oloh mangiap gandom hapan nyiro. Mangat manganan kare taloh je dia baguna bara marak ewen, Aku akan mangiap ewen marak kare bangsa.

¹⁰Kare oloh badosa hong marak ungkup-Ku hamauh, ‘Hatalla dia baka manalua itah buah calaka.’ Tapi sapunae ewen akan impatei huang eka parang.”

¹¹ TUHAN hamauh, “Kareh sampai katikae Aku mahalalian karajaan Dawid. Katika toh karajaan te sama kilau huma je baduroh. Tapi kare dinding batu lewue akan ingambuah-Ku tuntang imangung-Ku haluli sampai jadi sama kilau horan.

¹²Oloh Israel akan manguasa lewun oloh Edom je magon batisa tuntang kare bangsa je bihin Aku tempoe. Aku, TUHAN jari hakotak tuntang aku akan malalus taloh te.”

¹³TUHAN hamauh, “Kareh sampai katikae gandom bajeleng toto lembut sampai gawin oloh manggetem dia hakalayan. Batang anggor akan lembut bagulong sampai oloh dia hakalayan mawi danum anggor. Danum anggor akan mahantis bara kare bukit gantong tuntang mahasor bara kare bukit.

¹⁴Aku akan manenga tinai akan ungkup-Ku Israel kutoh kamangat pambelom. Ewen akan mamangun tinai kare lewun ewen je jari baduroh, palus ewen akan melai hete. Ewen akan bakabon anggor, tuntang mihop anggore te. Ewen akan malan manana tuntang kuman buae.

¹⁵Aku akan mina ungkup-Ku intu lewu je jari inenga-Ku akan ewen. Ewen akan induan tinai bara hete. Aku TUHAN, Hatallan ewen jari hakotak.”