Read Ngaju YONA 1 Bible Online

YONA 1 - Ngaju bible

YONA 1

¹ Sinde andau, TUHAN hakotak dengan Yona, Anak Amitai.

²Koae, “Lius akan Niniwe, lewu hai te, uka maancam ie. Awi katawang-Ku je oloh lewu te paham kadarhakae.”

³Tapi Yona salenga haguet manalih eka beken uka mangejau arepe bara TUHAN. Ie haguet akan Yopa, tuntang tabarong sondau kapal je handak tolak akan Spanyol. Limbah mambayar ongkos pangguete, ie lumpat kapal, palus balayar hayak oloh kapal akan Spanyol, uka mangejau arepe bara TUHAN.

⁴Yona mohon akan eka je pangkapendae tuntang menter intu hete, palus batiroh manyangit. Limbah te TUHAN mampadumah riwut barat akan tasik, palus taloh manjadi basaloh balewut, je mahampas kapal te bilak hancor. Kare oloh kapal mikeh toto tuntang mangkariak balaku awat, genep bitie dengan dewa ayue kabuat. Mangat kapal dia[1] kahem, ewen manganan puat[2] kapal te akan huang tasik.

⁶Metoh kapten kapal te mohon akan penda, ie sondau Yona intu hete kanjerae batiroh. Palus ie hamauh, “Ayo, misik! keleh balakudoa akan dewa ayum balaku dohop. Eweh katawae ie kareh masi itah sampai itah dia binasa.”

⁷Limbah Yona tuntang kapten te mandai akan hunjun, kare oloh kapal te hamauh sama arep ewen, “Ayo itah manenonge mangat itah katawan eweh je sala sampai itah buah calaka toh!” Ewen palus manenonge, maka aran Yona je buah.

⁸Balalu koan ewen dengan Yona, “En toto ikau je mambuku calaka toh? Ikau bara kueh? Bangsa oloh kueh? Mbuhen ikau aton intu hetoh?”

⁹Tombah Yona, “Aku toh oloh Ibrani. Aku manyembah TUHAN, Hatalla hong sorga, ie manampa tasik tuntang petak.”

¹⁰Limbah te inyaritae mbuhen ie hadari bara TUHAN. Mahining auh te kare oloh kapal labih mikeh tinai, tuntang hamauh dengae, “Salaya toto gawim te!”[3]

¹¹Pandehan te riwut barat sasar paham palus kare oloh kapal misek ie, “Narai je ilalus ikei akam mangat riwut barat toh tende?”

¹²Tombah Yona, “Jakah aku akan huang tasik, batantu riwut barat tende. Awi toh aku katawan, je aku mawi buku taloh basaloh-balewut toh mantakan keton.”

¹³Tapi kare oloh kapal magon mancoba salepah kaabase mandayong kapal te akan pantai. Tapi riwut barat sasar mamok kea, sampai gawin ewen te ngahus bewei.

¹⁴Awi te ewen mantehau TUHAN, “O TUHAN, ikei balaku, ela ah mambinasa ikei awi ikei mampatei oloh je dia mawi kasalan en-en dengan ikei. O TUHAN, Ikau jari malalus kare taloh kanahuang Ayum.

¹⁵Palus ewen manjakah Yona akan huang tasik. Balalu riwut barat te terai mamok.

¹⁶Kare oloh kapal te manjadi mikeh toto dengan TUHAN, tuntang limbah lumpat akan hunjun petak ewen maluput parapah tuntang manjanji kare taloh je akan hapae manahor sahur akan TUHAN.

¹⁷ Pandehan te TUHAN mampadumah ije kongan lauk hai je manelen Yona. Palus Yona melai huang kanain lauk te katahin telo andau telo alem.