Read Ngaju YONA 4 Bible Online

YONA 4 - Ngaju bible

YONA 4

¹Yona samasinde dia sanang dengan taloh te; ie sangit haream.

² Palus ie balakudoa, “O TUHAN, en dia jari insanangku helo bara aku malihi humangku bihin, je Ikau batantu kareh mawi gawi kilau toh? Jete bukue aku palus hadari akan Spanyol! Aku katawan je Ikau Hatalla je panyayang tuntang pamasi, olih manyarenan kalait Aim, asi tuntang sintan Aim jaton bara tikas tuntang harajur tatap uka mobah tirok Ayum handak mahukum.

³ Toh o TUHAN nauhe aku matei ih, awi labih bahalap aku matei bara belom.”

⁴Tombah TUHAN, “Dia aton bukue ikau sampai sangit kalote.”

⁵Limbah te Yona haguet akan hila timor lewu, palus mondok intu hete. Ie manampa ije pasah tuntang manganjungen arepe intu huange, sambil mentai narai je manjadi kareh intu Niniwe lewu hai te.

⁶Palus TUHAN Hatalla mampalembut ije taloh imbul je olih manganjungen Yona, sampai ie mangkeme mangat. Punae, Yona rajin toto dengan taloh imbul te.

⁷Tapi tampalawei andau jewue, Hatalla manyoho uret kuman batang taloh imbul te, balalu dawee balayu.

⁸Limbah matanandau lembut, Hatalla mampadumah riwut je balasot bara hila timor. Yona bilak tujah buah lasut andau je kilau mamapui takoloke. Ie palus bagalabah tuntang handak matei. Koae, “Labih bahalap aku matei ih bara belom!”

⁹Tapi Hatalla hamauh dengae, “Ikau dia patut paham kapehe atei tagal taloh imbul te!” Tombah Yona, “Pea dia? Puna patut aku sangit toto sampai matei.”

¹⁰Palus koan TUHAN dengae, “Taloh imbul toh belom baya huang ije alem bewei, tuntang ie balayu tinai huang andau jewue; ikau samasinde dia mampalembute atawa mahagae. Aloh kalote ikau kapehe atei awi ie balayu.

¹¹Pea aku kareh dia kapehe atei amon manirok Niniwe, lewu je hai. Awi beken bara kare meto je dia taraise te, intu hete aton kea 120.000 biti anak je hindai tau mangabeken taloh je bahalap dengan taloh je papa.”