Read Ngaju NUMERI 11 Bible Online

NUMERI 11 - Ngaju bible

NUMERI 11

¹Sinde andau bangsa te nampara bakotok dengan TUHAN tahiu kare kapehen ewen. Mahining kare kakotok te, TUHAN balait tuntang mampadumah apui mawi ewen. Apui te tayap intu marak ewen tuntang mangehu belah kare kemah.

²Kare oloh te mangkariak balaku dohop dengan Moses; palus Moses balakudoa intu TUHAN, balaku apui te belep.

³Ganan taloh je manjadi te, eka te inggare Tabera,[2] awi intu hete apui TUHAN hanyala huang bentok ewen.

⁴Intu pangguet kare oloh Israel te aton kea kare oloh asing je omba. Ewen te handak toto kuman isin meto, tuntang oloh Israel kea nampara bakotok. Koan kotok ewen, “O, jaka aton isin meto akan itah!

⁵Itah taraingat dengan balut je kinan itah inenga bewei intu Misir; dengan tantimon, samangka, prei, bawang bahandang, bawang baputi!

⁶Toh itah lepah kaabas ganan jaton panginan, baya manhu ih je gitan itah.”

⁷ Ampin manhu te kilau kare bawak korik, warnae baputi henda-henda.

⁸ Metoh hamalem, manhu te badoruh haya-hayak dengan ambun akan eka kare kemah. Hanjewue kare oloh mananjong kanih-kate uka mamumponge. Jete palus inggiling atawa inepe jadi tepong, tuntang mawie jadi wadai bunter je lapis. Angate kilau wadai je inyanga hapan undus saitun.

¹⁰Moses mahining kare oloh Israel te bakotok, sambil mendeng habaris-habaris intu baun bauntonggang kemah ewen. Palus hasep kasangit TUHAN sampai Moses kapehe atei.

¹¹Ie hamauh dengan TUHAN, “Mbuhen Ikau manyusah aku kilau toh? En Ikau dia sanang dengangku? Mbuhen Ikau manyarah tanggong jawab akan hapus oloh te akangku?

¹²En aku je manihi tuntang manak ewen te? Mbuhen ikau manyoho aku jadi kilau oloh mian je mentang anak korik, sampai aku musti mian ewen harajur katahin panjalanan akan tanah je inajanjim akan tato hiang ewen?

¹³Item, ewen harajur ngamue balaku isin meto. Hong kueh aku musti manggau isin meto akan hapus oloh te?

¹⁴Aku dia olih meton tanggong jawab je kahain te; lalau babehat gawi toh akangku!

¹⁵Amon TUHAN raju-rajur mawi aku kilau toh, keleh pasi aku; labih bahalap mampatei aku bajeleng mangat aku dia tinai mananggong kapehe toh.”

¹⁶Palus TUHAN hamauh dengan Moses, “Mumpong bara bangsa Israel uju puluh oloh bakas-bakas je ingaku kilau pamimpin bangsa. Imbit ewen intu taharep-Ku huang Kemah-Ku, palus soho ewen mendeng hete tokep balikatm.

¹⁷Aku kareh mohon tuntang hakotak dengam intu eka te, belahe kuasa je jari inenga-Ku akam, kareh inenga-Ku akan ewen. Palus ewen tau mandohop ikau meton tanggong jawab akan bangsa toh, tuntang dia usah ikau metoe kabuat.

¹⁸Lius sanan auh toh akan bangsa te: Parasih arep keton akan andau jewu; keton kareh kuman isin meto. TUHAN jari mahining auh tangis tuntang kakotok keton je keton mipen kuman isin meto, tuntang je pambelom keton labih bahalap metoh intu Misir. Toh TUHAN kareh manenga akan keton isin meto, tuntang keton tau kumae.

¹⁹Keton kareh kumae dia baya katahin ije atawa due andau, atawa lime andau, atawa sapuluh andau, tinai dia baya due puluh andau,

²⁰tapi genep ije bulan katahie keton kumae, sampai keton buah kapehe tuntang muta meak awie. Taloh te manjadi tagal keton jari mangabele TUHAN je aton intu bentok keton. Tinai kea tagal keton jari manangis intu taharep Ie tuntang bakotok je keton jari malihi tanah Misir.”

²¹Palus Moses hamauh dengan TUHAN, “Bangsa je impipingku toh aton 600.000 biti karee. Kilen Ikau tau hakotak je Ikau kareh manenga akan ewen isin meto je sukup katahin ije bulan?

²²Hong kueh aton sapi tuntang tabiri kalote karee je musti inyambalih akan mambesoh ewen? En kakare lauk intu tasik sukop akan mampakanan ewen?”

²³Tombah TUHAN, “En kuasang-Ku aton tikase? Ikau tau bajeleng mitee en taloh je inyewut-Ku te buju-bujur manjadi atawa dia!”

²⁴Palus Moses balua tuntang ie manyampai akan bangsa te taloh je jari insanan TUHAN. Moses mamumpong uju puluh pamimpin tuntang manyoho ewen mendeng hakaliling Kemah TUHAN.

²⁵Palus TUHAN mohon intu huang baunandau tuntang hakotak dengan Moses. TUHAN manduan belahe bara kuasa je inengae akan Moses tuntang manengae akan uju puluh pamimpin te. Metoh roh TUHAN te mohon akan hunjun ewen, ewen palus nampara mangkariak kilau nabi, tapi dia tahi.

²⁶Due bara marak uju puluh kapala te, Eldad tuntang Medad, melai intu Kemah tuntang dia haguet haya-hayak dengan je beken akan Kemah TUHAN. Intu Kemah te Roh mohon akan ewen. Ewen due palus nampara teha-tehau hai auhe sama kilau nabi.

²⁷Balalu ije biti oloh tabela hadari balua uka mansanan akan Moses taloh je manjadi intu Eldad tuntang Medad.

²⁸Yosua anak Nun, je jari mandohop Moses bara pesae tabela, hamauh dengan Moses, “Soho ewen terai Bapa!”

²⁹Moses tombah, “Mbuhen ikau manirok tahiu aku? Aku paham haream maharap mangat TUHAN manenga roh ayue akan hapus bangsae, tuntang mawi ewen samandiai jadi nabi!”

³⁰Palus Moses haluli akan kemah hayak dengan uju puluh pamimpin Israel te.

³¹Salenga TUHAN mampadumah riwut bara tasik. Riwut te mimbit kare burong puyuh je tarawang randah toto, sampai ije meter intu hunjun petak. Ewen tarawang intu hunjun kare kemah te sampai kekejau pire-pire kilometer lakau hete.

³²Hapus andau te, hapus alem tuntang hapus andau limbah te, kare oloh rami manawan burong puyuh. Genep biti manawan paling isut sakoyan kilo. Kare burong te inatai ewen kaliling kemah mangat keang.

³³Metoh magon are isin meto indu kinan, TUHAN balait dengan bangsa te tuntang mampadumah panyakit marak ewen.

³⁴Palus eka te inggare “Kubur kabongo,” awi hete ingubur kare oloh je matei ganan kabongo.

³⁵Bara hete bangsa te bindah akan tanah Haserot, palus mampendeng kemah intu eka te.