Read Ngaju NUMERI 13 Bible Online

NUMERI 13 - Ngaju bible

NUMERI 13

¹TUHAN hamauh dengan Moses,

²“Bara genep suku Israel soho ije biti bara marak kare pamimpin ewen akan mangalati tanah Kanaan je kareh inenga-Ku akan oloh Israel.”

³Tumon parentah Hatalla te, Moses manyoho ewen bara Padang Paran. Uras oloh te iete kare pamimpin bara marak oloh Israel: [SUKU] — [PAMIMPIN] Ruben — Samua anak Sakur Simeon — Sapat anak Hori Yuda — Kaleb anak Yepune Isaskhar — Yigal anak Yosep Epraim — Hosea anak Nun Benyamin — Palti anak Rapu Sebulon — Gadiel anak Sodi Manase — Gadi anak Susi Dan — Amiel anak Gemali Aser — Setur anak Mikael Naptali — Nahbi anak Wopsi Gad — Guel anak Maki

¹⁶Jete kare oloh pangalati je inyoho Moses akan mangalati tanah te. Hosea anak Nun ingganti arae awi Moses jadi Yosua.

¹⁷Metoh Moses manyoho ewen haguet, ie mameteh ewen, “Tanjong akan hila utara, manintu hila salatan tanah Kanaan tuntang palus akan tanah je habukit.

¹⁸Ngalati kilen ampie lewun ewen te, en oloe are atawa isut, en ewen abas atawa balemo.

¹⁹Riksa en lewu te bahalap atawa dia. En oloe melai intu kare dukoh je talampas atawa huang kare lewu je hakota.

²⁰Keleh atei keton menteng. Ite en tanah te basiwoh tuntang are upon kayue. Ela kalapean mimbit buli bua je aton intu hete.” Metoh te wayah bua anggor jari nampara.

²¹Kare oloh te haguet akan hila utara tuntang mangalati lewu te nampara bara padang pasir Sin intu hila salatan akan utara sampai lewu Rehob, tokep jalan akan Hamat.

²²Solake ewen haguet akan hila salatan lewu te tuntang sampai akan lewu Hebron, eka kare oloh Ahiman, Sesai tuntang Talmai, turonan Enak. Hebron imangun uju nyelo helo bara lewu Soan intu Misir.

²³Ewen palus sampai intu petak rampar Eskol.[3] Intu hete ewen manetek ije kapating bua anggor je kalote kabehate, sampai musti imikul dengan batang kayu awi due biti. Ewen mimbit kea pire-pire dalima tuntang bua ara.

²⁴Eka te inyewut petak Rampar Eskol awi pating bua anggor je inetek oloh Israel intu hete.

²⁵Limbah mangalati lewu te epat puluh andau katahie, oloh pangalati te buli haluli

²⁶tuntang manenga laporan akan Moses, Aron tuntang hapus ungkup Israel je kanjerae hapumpong intu Kades, intu padang pasir Paran. Ewen manyarita taloh je jari gitan ewen tuntang mamparahan kare bua je imbit ewen.

²⁷Koan ewen dengan Moses, “Ikei jari mangalati lewu te tuntang mite je lewu te tatau hayak basiwoh. Toh aton isut bua dinon ikei bara hete.

²⁸Tapi oloh lewu te uras ganca-gancang. Kare lewun ewen hai-hai tuntang hakota. Tinai ikei mite kare oloh turonan raksasa intu hete.

²⁹Oloh Amalek melai intu hila salatan lewu te. Oloh Het, Yebus tuntang Amori melai intu tanah je habukit. Tapi oloh Kanaan melai eka je manyaroroi saran tasik tuntang manyaroroi Sungei Yordan.”

³⁰Tapi Kaleb mampong atei kare oloh je bakotok dengan Moses. Koan Kaleb, “Lewu te musti itah manyarange tuntang itah marabute metoh toh kea, awi itah sukup kaabas uka mampakalah ewen.”

³¹Tapi kare oloh je haluli dengan Kaleb te hamauh, “Dia, itah dia olih manyarang ewen. Oloh lewu te labih abas bara itah.”

³²Palus ewen manyiar sarita tanjaro marak oloh Israel tahiu lewu je jari ingalati ewen te. Koan ewen, “Lewu te paham bahaya, akan oloh lewu te mahin kea. Kare oloh je gitan ikei intu hete hai toto bitie.

³³ Tinai ikei mite kare oloh je kilau raksasa, iete turonan oloh Enak. Inanding dengan ewen, itah mangkeme kilau sangkalap; batantu kalote pangkeme ewen taharap ikei.”