Read Ngaju NUMERI 14 Bible Online

NUMERI 14 - Ngaju bible

NUMERI 14

¹Hapus alem ungkup Israel kariak-kalalok tuntang baratongoi manangis.

²Ewen bakotok dengan Moses tuntang Aron hayak hamauh, “Labih bahalap itah matei intu Misir atawa intu padang pasir toh! Nauh itah matei ih!

³Kanduen TUHAN mimbit itah akan lewu te? Kareh itah matei huang parang tuntang kare anak sawan itah jadi tawanan. En dia labih bahalap itah haluli ih akan Misir!”

⁴Palus ewen hamauh sama arepe, “Keleh itah mintih ije pamimpin tuntang haluli akan Misir!”

⁵Palus Moses tuntang Aron sontop intu taharep rayat.

⁶Yosua anak Nun tuntang Kaleb anak Yepune, due bara kare oloh pangalati te, marabit pakaian ewen tanda kapehe atei.

⁷Ewen hamauh dengan hapus rayat te, “Lewu je ingalati ikei te malabien kahalape.

⁸Amon TUHAN tau dengan itah, Ie kareh mimbit itah akan hete hayak manenga lewu je tatau tuntang basiwoh te akan itah.

⁹ Ela malawan TUHAN, ela mikeh dengan kare oloh je melai intu lewu te, awi murah bewei itah kareh mampakalah ewen. Je mangalindong ewen jari malihi ewen. TUHAN mampahayak itah. Ela mikeh.”

¹⁰Hapus rayat maancam handak mamedak ewen hapan batu sampai matei. Tapi salenga kare oloh te mite kalawan kahain TUHAN mamala intu hunjun Kemah Ayue.

¹¹TUHAN hamauh dengan Moses, “Kilen katahie hindai kare oloh toh malawan Aku? Sampai hamparea ewen dia maku parcaya dengang-Ku, aloh Aku jari mawi kalote karee taloh heran marak ewen?

¹²Aku kareh mambinasa ewen awi-Ku mampadumah panyakit pes. Tapi ikau kareh iawi-Ku jadi bapa ain ije bangsa je labih hai tuntang labih abas bara ewen!”

¹³ Palus Moses hamauh dengan TUHAN, “Yoh, TUHAN, kare oloh Misir mahining taloh te! Padahal hapan kuasan Aim ikau jari mimbit ikei balua bara lewu te.

¹⁴Ewen kareh manyaritae akan kare oloh intu lewu toh. Iete ewen jari mahining auh Aim, TUHAN, mampahayak ikei. Ewen jari mahining kea je Ikau jari mamparahan Arep akan ikei metoh Ikau mananjong intu hila baun ikei hong tihang baunandau amon handau, tuntang tihang apui amon hamalem.

¹⁵Amon Ikau mampatei hapus ungkup Ayum toh, maka kare bangsa je puji mahining tahiu kahaim te kareh mansanan je

¹⁶Ikau mampatei ungkup Ayum intu padang pasir awi Ikau dia olih mimbit ewen akan lewu je jari injanji Awim.

¹⁷Awi te, TUHAN aku balaku, parahan kuasan Aim akan ikei tuntang lalus taloh je jari injanji Awim. Ikau jari hamauh,

¹⁸ ‘Aku, TUHAN, dia gulong balait. Aku mamparahan sintang-Ku tuntang kaketep-Ku paham malabien. Aku mampun oloh je badosa tuntang je malawan Aku. Aloh kalote, kasalan oloh bakas kareh imaleh-Ku akan kare anak esoe, sampai turonan je katelo tuntang je kaepat.’

¹⁹Toh, TUHAN, tagal kahain sintan Aim tuntang Ikau baketep dengan janji Ayum, aku balaku, ampun dosan kare oloh toh, kilau Ikau jari mampun ewen bara metoh ewen malihi tanah Misir.”

²⁰Palus TUHAN hamauh, “Yoh, aku kareh mampun ewen kilau je ilakum.

²¹ Tapi Aku bajanji tagal arep-Ku tuntang tagal Aku je belom tuntang bakuasa intu kalunen toh,

²²je bara kare oloh toh jaton ije je magon belom akan tame lewu je jari injanji-Ku dengan tato hiang ewen. Awi ewen dia maku manumon auh-Ku, hayak harajur maningkes Aku. Padahal ewen jari mite kalawang-Ku je hai, tuntang kare taloh heran je ilalus-Ku intu Misir tuntang intu padang pasir.

²³Dia! Ewen dia akan tame lewu te. Bara marak ewen je malawan Aku, jaton ije je mahunje lewu te.

²⁴ Tapi dia kalote dengan rewar-Ku Kalep. Ie baketep dengang-Ku. Awi te Aku kareh mimbit ie akan lewu je jari inamee. Toh oloh Amalek tuntang oloh Kanaan melai intu tanah te. Tapi tanah te kareh jadi ayun turonan Kaleb, rewar-Ku te. Andau jewu keton musti haluli tuntang haguet akan padang pasir akan hila Telok Akaba.”

²⁶TUHAN hamauh dengan Moses tuntang Aron,

²⁷“Sampai hamparea kare oloh papa te bakotok taharep Aku? Uras kotok ewen jari ihining-Ku.

²⁸Keton musti tombah auh ewen kalotoh: TUHAN hamauh, ‘Aku sumpah tagal Aku je belom, je keton kareh iawi-Ku kilau je insanan keton taharep-Ku. Aku, TUHAN, jari hakotak.

²⁹ Keton jari bakotok dengang-Ku.

³⁰Awi te keton kareh matei; kare hantun keton hakalampah intu padang pasir toh. Beken bara Kaleb tuntang Yosua, jaton ije bara marak keton je umure duepuluh nyelo kahunjun kareh tame lewu je injanji-Ku dengan keton te.

³¹Keton jari hamauh je kare anak keton kareh jadi tawanan. Tapi ewen te je kareh imbit-Ku akan lewu je ingabele keton te. Lewu te kareh jadi petak danum ewen.

³²Tapi keton kareh matei intu padang pasir toh.

³³ Epat puluh nyelo katahie kare anak keton kareh manamuei intu padang pasir. Awi keton dia baketep, kare anak keton kareh pehe, sampai oloh je pangkalepahe intu marak keton kareh matei.

³⁴Keton kareh mananggong kajarian dosan keton epat puluh nyelo katahie. Ije nyelo itong akan ije andau bara genep epat puluh andau je hapan keton akan mangalati tanah te. Keton kareh katawan kilen angate amon Aku malawan keton!

³⁵Aku sumpah je Aku kareh malalus taloh te mawi keton, kare oloh papa je pakat handak malawan Aku. Intu padang pasir toh keton samandiai kareh matei. Aku, TUHAN, jari hakotak.’ ”

³⁶Kare oloh je inyoho Moses akan mangalati tanah te haluli mimbit laporan je dia toto tahiu lewu te. Taloh te mawi oloh Israel bakotok dengan TUHAN. Awi te TUHAN mahukum ewen sampai ewen matei buah panyakit.

³⁸Bara due walas oloh pangalati te baya Yosua tuntang Kaleb ih je magon belom.

³⁹Limbah Moses manyampai peteh TUHAN akan bangsa Israel, bangsa te manatum awi kapehe atei.

⁴⁰Hayak jajewu tinai, ewen tatap handak mandai tantan bukit. Koan ewen, “Puna ikei jari badosa. Tapi toh ikei jari tatap indu haguet akan eka je insanan TUHAN.”

⁴¹Tapi Moses hamauh, “Mbuhen keton toh handak malanggar parentah TUHAN? Keton kareh dia olih mimbit hasil!

⁴²Keton kareh impakalah awi kare musoh keton awi TUHAN dia mampahayak keton.

⁴³Metoh keton hataharep dengan oloh Amalek tuntang dengan oloh Kanaan te, keton kareh matei intu kalahi. TUHAN kareh dia mampahayak keton awi keton dia maku manumon auh Ayue.”

⁴⁴Tapi kare oloh Israel te magon bahanyi kea manintu tantan bukit te, aloh Moses tuntang Patin Janji dia malihi kare kemah te.

⁴⁵Balalu oloh Amalek tuntang oloh Kanaan je melai intu hete manyarang tuntang mampakalah kare oloh Israel hayak manggoang ewen sampai akan Horma.