Read Ngaju NUMERI 15 Bible Online

NUMERI 15 - Ngaju bible

NUMERI 15

¹TUHAN manenga akan Moses

²kare atoran toh je musti ilalus awi bangsa Israel intu lewu je kareh inenga TUHAN akan ewen.

³Akan parapah je ingehu atawa parapah panggenep nasar atawa parapah kahias atei atawa parapah intu kare pesta tumon je jadi-jadi, keton tau maluput akan TUHAN: sapi hatue, tabiri hatue, atawa kambing. Ewau kare parapah te manyanang atei TUHAN.

⁴Ewe-eweh je maluput tabiri atawa kambing indu parapah je ingehu akan TUHAN, musti mimbit kea akan genep kongan meto te, ije kilo tepong je inyampur dengan ije liter undus saitun akan parapah taloh kinan, tinai ije liter danum anggor.

⁶Amon je ilupute te ije kongan tabiri hatue, musti iluput kea due kilo tepong inyampur dengan ije satengah liter undus saitun akan parapah taloh kinan,

⁷tinai ije satengah liter danum anggor. Ewau parapah te manyanang atei TUHAN.

⁸Amon je iluput te ije kongan sapi hatue akan parapah je ingehu atawa parapah hapa malalus nasar,

⁹musti iluput kea telo kilo tepong inyampur dengan due liter undus saitun akan parapah taloh kinan, tuntang due liter danum anggor.

¹⁰Ewau parapah te manyanang atei TUHAN.

¹¹Jete je musti iluput haya-hayak dengan genep kongan sapi hatue, tabiri hatue, tabiri atawa kambing.

¹²Amon je iluput te labih bara ije kongan meto, maka parapah tepong, undus tuntang danum anggor te musti indahang manumon takar je buah.

¹³Taloh te musti ilalus awi genep bitin oloh Israel metoh ie maluput parapah. Ewau parapah te manyanang atei TUHAN.

¹⁴Oloh asing je melai marak keton, aloh baya hanjulo atawa akan manetep, musti manumon kakare atoran te amon ie maluput parapah taloh kinan je ewaue manyanang atei TUHAN.

¹⁵ Uras kare parentah tuntang atoran te sama akan keton tuntang akan oloh asing je melai intu marak keton, basa keton tuntang ewen te sama intu tampayah TUHAN. Taloh te ilalus palus katatahie.

¹⁷TUHAN manenga akan Moses

¹⁸kare atoran toh je musti ilalus awi bangsa Israel intu lewu je kareh inenga TUHAN akan ewen.

¹⁹Amon keton manampara kuman kare taloh je dinon keton bara tanah te, keton musti manyare belahe mangat iluput jadi parapah je ingabeken baya akan TUHAN.

²⁰Amon keton mamapui rote bara gandom je solake inggetem, rote te musti iluput akan parapah je ingabeken baya akan TUHAN. Cara malupute sama dengan cara maluput gandom je panyolake je inepe keton jadi tepong.

²¹Sampai katatahie genep rote bara gandom je solake inggetem te musti inenga keton akan parapah je ingabeken tantai akan TUHAN.

²²Amon keton dia tantai ihat mangalapean ije bara kare atoran je jari inenga TUHAN akan Moses, nampara bara andau TUHAN manenga atoran te palus girir-manggirir, hayak kasalan te ilalus awi ungkup dia katawan atoran, maka hapus ungkup musti maluput ije kongan sapi hatue akan parapah je ingehu. Haya-hayak dengan jete musti iluput parapah taloh kinan tuntang danum anggor kilau je jari inantu. Ewau parapah te manyanang atei TUHAN. Beken bara jete musti iluput ije kongan tabiri hatue akan indu parapah ampun dosa.

²⁵Palus imam musti malalus upacara ampun dosa akan ungkup. Maka ewen kareh iampun tagal kasalan te je ialalus ewen dia tantai ihat. Tuntang awi ewen jari mimbit parapah ampun dosa dengan parapah je ingehu akan TUHAN.

²⁶Hapus ungkup Israel tuntang oloh asing je melai intu marak awen kareh iampun. Jete tagal samandiai ewen te tamput huang kasalan je dia tantai ihat te.

²⁷ Amon ije biti bewei je mawi dosa dia tantai ihat, ie musti maluput ije kongan kambing bawi je umure ije nyelo akan parapah ampun dosa.

²⁸Imam musti mawi upacara ampun dosa te intu taharep TUHAN, mangat oloh te iampun dosae.

²⁹Atoran te kea buah akan eweh bewei je mawi dosa dia tantai ihat, aloh ie te oloh Israel atawa oloh asing je melai manetep intu marak ewen.

³⁰Tapi amon oloh Israel atawa oloh asing tantai ihate mawi dosa, ie manawah TUHAN. Oloh te musti ihukum matei,

³¹awi ie malawan TUHAN, tuntang tantai ihat malanggar parentah TUHAN. Oloh te matei awi kasalae kabuat.

³²Metoh oloh Israel aton intu padang pasir, ije biti oloh hatue tarasondau kanjerae manampunan dereh kayu intu andau Sabat.

³³Oloh te iimbit manaharep Moses, Aron tuntang hapus ungkup,

³⁴palus inahan awi hindai batantu en taloh je musti imutus akae.

³⁵TUHAN hamauh dengan Moses, “Oloh te musti ihukum matei. Ie musti iimbit akan luar watas kare kemah tuntang intu hete hapus ungkup musti mamanting ie hapan batu sampai matei.”

³⁶Palus hapus ungkup mimbit ie akan luar watas kemah tuntang mamanting ie hapan batu sampai matei, kilau je irentah TUHAN.

³⁷TUHAN manyoho Moses,

³⁸ mansanan akan oloh Israel, “Tampa rewei intu kare puting pakaian keton tuntang meteng tali biru intu genep rewei te. Jete musti keton mawie girir-manggirir.

³⁹Rewei te pampingat: Genep katika keton mitee, keton mingat kare parentah-Ku tuntang manumoe. Tuntang awi te keton kareh dia mangalapean Aku mangat keton dia manumon kahandak keton kabuat.

⁴⁰Kare rewei te akan pampingat uka manumon kare parentah-Ku sampai keton toto-toto manjadi oloh ayung-Ku.

⁴¹Aku toh TUHAN, Hatallan keton; Aku mimbit keton balua bara Misir mangat Aku jadi Hatallan keton. Aku toh TUHAN.”